21 мая 2020 года. Віктар і Эдуард Бабарыкі ідуць падаваць дакументы ў ЦВК. Цяпер былы банкір у наваполацкай калоніі №1 — ён атрымаў 14 год строгага рэжыму. Эдуард усё яшчэ чакае суда ў СІЗА.
![](http://d3kcf2pe5t7rrb.cloudfront.net/img/w732d4webp1/photos/z_2021_08/2-2020_2021_belarus_protests_bun-0468-4884-8wbff.jpg.webp)
31 мая 2020 года. Пікет у падтрымку Святланы Ціханоўскай на Камароўцы. Каб пакінуць подпіс, людзі чакалі ў гіганцкіх чэргах.
![](http://d3kcf2pe5t7rrb.cloudfront.net/img/w732d4webp1/photos/z_2021_08/3-2020_2021_belarus_protests_bun_img-9447-u04ix.jpg.webp)
18 чэрвеня 2020 года. У гэты дзень затрымалі Віктара Бабарыку і яго сына. Увечары людзі выстройваюцца ў ланцугі салідарнасці на некалькі кіламетраў і не сыходзяць, нягледзячы на залеву.
![](http://d3kcf2pe5t7rrb.cloudfront.net/img/w732d4webp1/photos/z_2021_08/4-2020_2021_belarus_protests_bun-0146-8kwmg.jpg.webp)
19 чэрвеня 2020 года. Апошні дзень перадвыбарчых пікетаў скончыўся затрыманнямі. Мужчыну знялі наўпрост з ровара, а карэспандэнтку «Радыё Свабода» Аляксандру Дынько павялі ў бус падчас жывога эфіру.
![](http://d3kcf2pe5t7rrb.cloudfront.net/img/w732d4webp1/photos/z_2021_08/5-2020_2021_belarus_protests_bun-8320-o7vk6.jpg.webp)
22 ліпеня 2020 года. Вольга Севярынец чакае пасля сутак мужа Паўла пад Акрэсціна. Яго так і не выпусцяць: ні ў той дзень, ні пазней. У маі 2021 года Паўлу прысудзяць сем гадоў калоніі.
![](http://d3kcf2pe5t7rrb.cloudfront.net/img/w732d4webp1/photos/z_2021_08/6-2020_2021_belarus_protests_bun-1246-8hau8.jpg.webp)
24 ліпеня 2020 года. Трыа Ціханоўскай, Калеснікавай і Цапкала прыехала на сустрэчу з Віцебскам. Аб’яднаны штаб адправіўся ў тур па гарадах. Нават у райцэнтрах іх мітынгі збіралі тысячы людзей.
![](http://d3kcf2pe5t7rrb.cloudfront.net/img/w732d4webp1/photos/z_2021_08/7-2020_2021_belarus_protests_bun-2970-rlz9s.jpg.webp)
6 жніўня 2020 года. У Кіеўскім скверы адмянілі запланаваны мітынг трох штабоў і замест яго арганізавалі дзень адчыненых дзвярэй устаноў адукацыі. Але дыджэі Кірыл Галанаў і Улад Сакалоўскі нечакана ўключылі песню «Перамен» Цоя і паднялі рукі з белымі бранзалетамі.
![](http://d3kcf2pe5t7rrb.cloudfront.net/img/w732d4webp1/photos/z_2021_08/8-2020_2021_belarus_protests_bun-4209-tniza.jpg.webp)
9 жніўня 2020 года. Святлану Ціханоўскую атачылі журналісты ля ўчастка, дзе яна прагаласавала.
![](http://d3kcf2pe5t7rrb.cloudfront.net/img/w732d4webp1/photos/z_2021_08/9-2020_2021_belarus_protests_bun-5037-aivin.jpg.webp)
9 жніўня 2020 года. Увечары пасля выбараў людзі сабраліся ў цэнтры Мінска. Аўтазак на хуткасці ўехаў у натоўп, пратэстоўцы паспрабавалі яго спыніць. Адзін з мужчын, які павіс на кабіне, сарваўся і трапіў пад колы аўтазака, але застаўся жывы.
![](http://d3kcf2pe5t7rrb.cloudfront.net/img/w732d4webp1/photos/z_2021_08/11-2020_2021_belarus_protests_bun-6440-rf9c7.jpg.webp)
10 жніўня 2020 года. Пратэстоўцаў разганяюць з дапамогай святлошумавых гранат і гумавых куляў. Знаходзіцца ў горадзе было небяспечна: амапаўцы ўрываліся нават у крамы і затрымлівалі выпадковых гараджан.
![](http://d3kcf2pe5t7rrb.cloudfront.net/img/w732d4webp1/photos/z_2021_08/12-2020_2021_belarus_protests_bun-5825-lksxe.jpg.webp)
10 жніўня 2020 года. Людзі перыядычна размаўляюць з сілавікамі, просяць не ўжываць сілу і быць з народам. У гэтую ноч стала вядома пра першую ахвяру — застрэлілі Аляксандра Тарайкоўскага.
![](http://d3kcf2pe5t7rrb.cloudfront.net/img/w732d4webp1/photos/z_2021_08/13-2020_2021_belarus_protests_bun-8445-cxyee.jpg.webp)
13 жніўня 2020 года. Дзяўчаты ў белым з кветкамі выйшлі на вуліцы Мінска, каб заклікаць улады спыніць гвалт. Першая жаночая акцыя прайшла напярэдадні на Камароўцы.
![](http://d3kcf2pe5t7rrb.cloudfront.net/img/w732d4webp1/photos/z_2021_08/14-2020_2021_belarus_protests_bun-8556-2nu5f.jpg.webp)
13 жніўня 2020 года. Стыхійныя акцыі супраць гвалту ахапілі Мінск. Людзі ўсміхаюцца адно аднаму, машыны сігналяць, і здаецца, што чорныя дні адступаюць.
![](http://d3kcf2pe5t7rrb.cloudfront.net/img/w732d4webp1/photos/z_2021_08/15-2020_2021_belarus_protests_bun-8770-4nfb2.jpg.webp)
13 жніўня 2020 года. Уначы з турмаў сталі выпускаць затрыманых на пратэстах (за 9-12 жніўня было схоплена больш за сем тысяч чалавек). Пад Акрэсціна сабралася шмат сваякоў, якія не маглі знайсці сваіх блізкіх, і валанцёраў, гатовых адвезці людзей дамоў. Вызваленыя плачуць, бо перажылі страшнае: іх трымалі амаль без ежы і вады, у перапоўненых камерах. З дзяўчат здзекаваліся, мужчын збівалі.
![](http://d3kcf2pe5t7rrb.cloudfront.net/img/w732d4webp1/photos/z_2021_08/16-2020_2021_belarus_protests_bun-9914-tsi14.jpg.webp)
14 жніўня 2020 года. Дзяўчаты абдымаюць разгубленага вайскоўца. На некалькі дзён гвалт і затрыманні спыніліся, людзі патрабуюць дыялогу з уладамі.
![](http://d3kcf2pe5t7rrb.cloudfront.net/img/w732d4webp1/photos/z_2021_08/17-2020_2021_belarus_protests_bun-0511-5pars.jpg.webp)
15 жніўня 2020 года. Пахаванне Аляксандра Тарайкоўскага. МУС заявіла, што ён памёр, бо ў яго руцэ ўзарвалася самаробная выбуховая прылада, але відэа, якое з’явіцца пазней, абвергне гэтую версію. У завядзенні крымінальнай справы па факце забойства будзе адмоўлена.
![](http://d3kcf2pe5t7rrb.cloudfront.net/img/w732d4webp1/photos/z_2021_08/18-2020_2021_belarus_protests_bun-1290-sp32w.jpg.webp)
15 жніўня 2020 года. Людзі сабраліся ля БТ і патрабуюць паказаць праўду. На фота — танец «Лебядзінае возера». Улагоджваць сітуацыю прыехала Наталля Качанава.
![](http://d3kcf2pe5t7rrb.cloudfront.net/img/w732d4webp1/photos/z_2021_08/19-2020_2021_belarus_protests_bun-2-nf8dd.jpg.webp)
16 жніўня 2020 года. Першы нядзельны марш у Мінску, які сабраў каля 400 тысяч чалавек пад бел-чырвона-белымі сцягамі.
![](http://d3kcf2pe5t7rrb.cloudfront.net/img/w732d4webp1/photos/z_2021_08/20-2020_2021_belarus_protests_bun-2513-os72o.jpg.webp)
16 жніўня 2020 года. Людское мора ля Стэлы, дзе яшчэ нядаўна ўзрываліся гранаты. Пасля гэтых кадраў беларусамі захапляўся ўвесь свет.
![](http://d3kcf2pe5t7rrb.cloudfront.net/img/w732d4webp1/photos/z_2021_08/21-2020_2021_belarus_protests_bun-3505-wjqpv.jpg.webp)
17 жніўня 2020 года. Падчас выступу Аляксандра Лукашэнкі на МЗКТ рабочыя крычаць яму «Сыходзь». Людзі, што сабраліся каля завода, праводзяць верталёт з Лукашэнкам.
![](http://d3kcf2pe5t7rrb.cloudfront.net/img/w732d4webp1/photos/z_2021_08/22-2020_2021_belarus_protests_bun-3674-y0ct0.jpg.webp)
17 жніўня 2020 года. Рабочыя розных заводаў збіраюцца абвесціць забастоўку. Фарміруюцца стачкамы.
![](http://d3kcf2pe5t7rrb.cloudfront.net/img/w732d4webp1/photos/z_2021_08/23-2020_2021_belarus_protests_bun-4165-kp4br.jpg.webp)
17 жніўня 2020 года. Да медыкаў, якія патрабавалі аказаць пацярпелым належную дапамогу, выйшаў Уладзімір Каранік, міністр аховы здароўя на той момант. З сустрэчы ён з’язджаў пад воклічы «Ганьба!».
![](http://d3kcf2pe5t7rrb.cloudfront.net/img/w732d4webp1/photos/z_2021_08/24-2020_2021_belarus_protests_bun-6681-27tuo.jpg.webp)
23 жніўня 2020 года. Другі нядзельны марш сабраў на праспекце пад 200 тысяч чалавек.
![](http://d3kcf2pe5t7rrb.cloudfront.net/img/w732d4webp1/photos/z_2021_08/25-2020_2021_belarus_protests_bun-7395-6ejnl.jpg.webp)
23 жніўня 2020 года. Лукашэнка прыляцеў да Палаца Незалежнасці з аўтаматам. Калі пратэстоўцы сышлі, ён выйшаў да амапаўцаў. «Красаўцы!» — пахваліў сілавікоў Лукашэнка.
![](http://d3kcf2pe5t7rrb.cloudfront.net/img/w732d4webp1/photos/z_2021_08/26-2020_2021_belarus_protests_bun-9940-pf5xq.jpg.webp)
29 жніўня 2020 года. Суботні жаночы марш, які таксама стане традыцыйным. Жанчыны выходзілі асобна, бо іх спачатку не затрымлівалі.
![](http://d3kcf2pe5t7rrb.cloudfront.net/img/w732d4webp1/photos/z_2021_08/27-2020_2021_belarus_protests_bun-0925-64zea.jpg.webp)
30 жніўня 2020 года. Жанчына стаіць на каленях перад сілавікамі падчас нядзельнага марша.
![](http://d3kcf2pe5t7rrb.cloudfront.net/img/w732d4webp1/photos/z_2021_08/28-2020_2021_belarus_protests_bun-1079-u9r1g.jpg.webp)
30 жніўня 2020 года. Людзі ляглі на зямлю перад ачапленнем. Пратэстоўцы так падкрэслівалі, што іх акцыі мірныя.
![](http://d3kcf2pe5t7rrb.cloudfront.net/img/w732d4webp1/photos/z_2021_08/29-2020_2021_belarus_protests_bun-1223-lm9as.jpg.webp)
30 жніўня 2020 года. Дзве калоны пратэстоўцаў яднаюцца і працягваюць марш. Многія нясуць самаробныя падарункі і іранічныя плакаты з віншаваннямі да дня народзінаў Лукашэнкі.
![](http://d3kcf2pe5t7rrb.cloudfront.net/img/w732d4webp1/photos/z_2021_08/30-2020_2021_belarus_protests_bun-2164-6rphx.jpg.webp)
30 жніўня 2020 года. Дзяўчаты цалуюцца на фоне сцяны з сілавікоў — яшчэ адно фота, якое абляцела свет.
![](http://d3kcf2pe5t7rrb.cloudfront.net/img/w732d4webp1/photos/z_2021_08/31-2020_2021_belarus_protests_bun-2408-mm1q1.jpg.webp)
1 верасня 2020 года. Першая студэнцкая акцыя. У гэты дзень моладзь зладзіла шэсце па горадзе. Пасля пачаліся сядзячыя пратэсты ў холах і на прыступках універсітэтаў.
![](http://d3kcf2pe5t7rrb.cloudfront.net/img/w732d4webp1/photos/z_2021_08/32-2020_2021_belarus_protests_bun-3372-oudsh.jpg.webp)
1 верасня 2020 года. Адным з пунктаў вячэрніх збораў была плошча Незалежнасці. Жанчыны закрывалі сабой мужчын, каб тых не затрымалі. Аднойчы, калі людзі хаваліся ў Чырвоным касцёле, іх замкнулі звонку і выставілі ачапленне на прыступках.
![](http://d3kcf2pe5t7rrb.cloudfront.net/img/w732d4webp1/photos/z_2021_08/34-2020_2021_belarus_protests_bun-7727-gl56a.jpg.webp)
8 верасня 2020 года. Жаночыя маршы перасталі быць бяспечнымі. Дзяўчат і кабет прыціснулі да сцяны і не дазвалялі сысці.
![](http://d3kcf2pe5t7rrb.cloudfront.net/img/w732d4webp1/photos/z_2021_08/35-2020_2021_belarus_protests_bun-8724-5dg5b.jpg.webp)
9 верасня 2020 года. Канцэрт Змітра Вайцюшкевіча на Плошчы перамен. Дваровыя сустрэчы, на якіх запрашалі музыкаў, праходзілі па ўсім горадзе. Суседзі знаёміліся, ствараліся дваровыя чаты, прыдумляліся сцягі раёнаў.
![](http://d3kcf2pe5t7rrb.cloudfront.net/img/w732d4webp1/photos/z_2021_08/36-2020_2021_belarus_protests_bun-9052-dp3m0.jpg.webp)
12 верасня 2020 года. Жорсткія затрыманні падчас суботняга жаночага марша. Дзяўчат цягалі за валасы, кідалі ў аўтазак. На адным з такіх маршаў (19 верасня) была затрымана грамадзянка Швейцарыі Наталля Хершэ. Ёй прысудзілі 2,5 года калоніі за сарваную балаклаву.
![](http://d3kcf2pe5t7rrb.cloudfront.net/img/w732d4webp1/photos/z_2021_08/38-2020_2021_belarus_protests_bun-0441-jyfui.jpg.webp)
13 верасня 2020 года. Нядзельны марш на Дразды сабраў больш за 100 тысяч чалавек. Нават у элітным пасёлку знайшліся людзі, якія хавалі пратэстоўцаў ад сілавікоў у сваіх катэджах.
![](http://d3kcf2pe5t7rrb.cloudfront.net/img/w732d4webp1/photos/z_2021_08/39-2020_2021_belarus_protests_bun-4734-3y0ro.jpg.webp)
23 верасня 2020 года. Дзень таемнай інаўгурацыі. Таемнай яна была нават для асобных гасцей: спявачкі сёстры Груздзевы думалі, што іх запрасілі на культурнае мерапрыемства ў музей ВАВ. Увечары людзі выйшлі выказаць пратэст — іх жорстка разагналі. Жанчыне на фота разбілі галаву.
![](http://d3kcf2pe5t7rrb.cloudfront.net/img/w732d4webp1/photos/z_2021_08/40-2020_2021_belarus_protests_bun-8600-g474o.jpg.webp)
4 кастрычніка 2020 года. На маршы зламаўся вадамёт. Некалькі пратэстоўцаў разабралі яго на хаду, пасля чаго струмень з вадой стаў біць уверх.
![](http://d3kcf2pe5t7rrb.cloudfront.net/img/w732d4webp1/photos/z_2021_08/41-2020_2021_belarus_protests_bun-4342-xgymq.jpg.webp)
18 кастрычніка 2020 года. Марш на Партызанскім праспекце. У нейкі момант калона пратэстоўцаў развярнулася і пайшла на бусы з амапаўцамі, прымусіўшы іх уцякаць.
![](http://d3kcf2pe5t7rrb.cloudfront.net/img/w732d4webp1/photos/z_2021_08/42-2020_2021_belarus_protests_bun-4891-tk5ce.jpg.webp)
19 кастрычніка 2020 года. Марш пенсіянераў. Пажылыя ставілі сабе тэлеграм і вайбер, каб быць у курсе акцый. Да калоны далучаліся нават 80-гадовыя кабеты. У супрацьвагу ім лукашэнкаўцы сагналі калону адстаўнікоў з сілавых органаў.
![](http://d3kcf2pe5t7rrb.cloudfront.net/img/w732d4webp1/photos/z_2021_08/43-2020_2021_belarus_protests_bun-5242-s79nj.jpg.webp)
19 кастрычніка 2020 года. Нязломная Ніна Багінская. У яе безліч разоў адбіралі сцяг, але яна кожны раз уласнаруч шыла новы і выходзіла ў горад.
![](http://d3kcf2pe5t7rrb.cloudfront.net/img/w732d4webp1/photos/z_2021_08/44-2020_2021_belarus_protests_bun5964-r8z5w.jpg.webp)
22 кастрычніка 2020 года. Марш людзей з інваліднасцю. Адзін з удзельнікаў у інвалідным вазку — Георгій Сайкоўскі, якому ў часе разгону пратэстоўцаў на Пушкінскай гранатай адарвала ступню.
![](http://d3kcf2pe5t7rrb.cloudfront.net/img/w732d4webp1/photos/z_2021_08/20201026-img_6135-jmqug.jpg.webp)
26 кастрычніка 2020 года. Дзень, калі была абвешчаная нацыянальная забастоўка, да якой далучыліся і студэнты. Многія бізнэсы, якія ў гэты дзень не працавалі, пасля былі вымушаныя закрыцца пад ціскам бясконцых праверак.
![](http://d3kcf2pe5t7rrb.cloudfront.net/img/w732d4webp1/photos/z_2021_08/20201101-img_7853-4bbmv.jpg.webp)
1 лістапада 2020 года. Нядзельны марш на Курапаты, да мемарыяла ахвярам сталінскіх рэпрэсій. Сілавікі шмат разоў перакрывалі дэманстрантам дарогу, да фінальнай кропкі дайшлі некалькі тысяч чалавек. У той дзень былі затрыманыя больш за 300 чалавек.
![](http://d3kcf2pe5t7rrb.cloudfront.net/img/w732d4webp1/photos/z_2021_08/20201112-img_9656-bgn9q.jpg.webp)
12 лістапада 2020 года. Стыхійны народны мемарыял Раману Бандарэнку на Плошчы перамен. Напярэдадні людзі ў штацкім збілі маладога чалавека ў гэтым двары за тое, што ён паспрабаваў перашкодзіць зразанню бела-чырвоных стужак. Раман памёр на наступны дзень. Яму быў 31 год.
![](http://d3kcf2pe5t7rrb.cloudfront.net/img/w732d4webp1/photos/z_2021_08/45-2020_2021_belarus_protests_bun-7383-nasee.jpg.webp)
20 лістапада 2020 года. Пахаванне Рамана Бандарэнкі. За яго смерць дагэтуль ніхто не пакараны.
![](http://d3kcf2pe5t7rrb.cloudfront.net/img/w732d4webp1/photos/z_2021_08/46-2020_2021_belarus_protests_bun-7578-xlzea.jpg.webp)
22 лістапада 2020 года. Калі ў цэнтры сталіцы збірацца стала немагчыма, людзі пачалі ладзіць раённыя маршы. Група пратэстоўцаў пад грукат барабанаў заняла курган у мікрараёне Паўднёвы Захад.
![](http://d3kcf2pe5t7rrb.cloudfront.net/img/w732d4webp1/photos/z_2021_08/47-2020_2021_belarus_protests_bun-8283-lr5o5.jpg.webp)
9 лютага 2021 года. Суд над журналісткамі «Белсата» Кацярынай Андрэевай і Дар’яй Чульцовай. За стрым з акцыі памяці з Раманам Бандарэнкам на Плошчы перамен дзяўчатам далі па два гады калоніі. Іх выцягнулі з кватэры, дзе яны вялі трансляцыю.
![](http://d3kcf2pe5t7rrb.cloudfront.net/img/w732d4webp1/photos/z_2021_08/48-2020_2021_belarus_protests_bun-5582-2n4dg.jpg.webp)
25 сакавіка 2021 года. Дзень волі мінчукі адзначылі салютамі ў розных раёнах. Іх запускалі ў 23.34 — артыкул пад гэтым нумарам стаў народным: за ўдзел у несанкцыянаваных акцыях тысячы людзей атрымалі штрафы і суткі.
![](http://d3kcf2pe5t7rrb.cloudfront.net/img/w732d4webp1/photos/z_2021_08/50-2020_2021_belarus_protests_bun-5399-1xsr1.jpg.webp)
19 мая 2021 года. Кацярына Барысевіч абдымае дачку. Паўгода журналістка правяла за кратамі — за артыкул на Tut.by, дзе напісала, што ў крыві загінулага Рамана Бандарэнкі не было алкаголю. Кацярыну звінавацілі ў разгалошванні медыцынскай таямніцы, якое пацягнула цяжкія наступствы. Доктар Арцём Сарокін, які пацвердзіў інфармацыю для журналісткі, атрымаў два гады калоніі з адтэрміноўкай на год.
![](http://d3kcf2pe5t7rrb.cloudfront.net/img/w732d4webp1/photos/z_2021_08/51-2020_2021_belarus_protests_bun-4cyfy.jpg.webp)
26 мая 2021 года. Развітанне з Вітольдам Ашуркам. Ён быў асуджаны да пяці гадоў пазбаўлення волі і памёр у шклоўскай калоніі пры нявысветленых абставінах. Паводле афіцыйнай версіі, у палітвязня спынілася сэрца. Вядома, што апошнія дні яго трымалі ў ШІЗА. Вітольда пахавалі ў роднай Бярозаўцы пад бел-чырвона-белым сцягам.
Каментары