Памятаеце нашумелае фота кадэтаў з «Пагоняй»? Адзін з герояў праз пяць год расказаў, як склаўся іх лёс
На мінулым тыдні «Салідарнасць» нагадала пра гісторыю кадэтаў Ястрамбельскай школы-інтэрната, нашумелай пяць гадоў таму. Тады чацвёра трэцякурснікаў сфатаграфаваліся ў майках з «Пагоняй» і пасля публікацыі фота ў сацсетках праславіліся на ўсю краіну.
Пасля публікацыі ў выданне звярнуўся адзін з былых кадэтаў, які трапіў на фота. Мікіта Гвоздзеў распавёў «Салідарнасці» пра падзеі пяцігадовай даўніны, а таксама пра тое, як гэтая гісторыя паўплывала на яе герояў.
— Фатаграфію выклаў я. Мы з хлопцамі гэты момант не абмяркоўвалі: ставіць яе кудысьці ці не, — кажа Мікіта.
Паводле яго слоў, да той гісторыі падобныя фатаграфіі ў вучылішчы не былі рэдкасцю, таму ён не перажываў за магчымыя наступствы. Ды і не прадбачыў іх. У іншых кадэтаў былі майкі і шапкі з сімволікай, бел-чырвона-белыя сцягі.
— Я не шкадую, што так зрабіў. Хлопцы быццам бы таксама да гэтага паставіліся нармальна. Тады нам здавалася, што гэта звычайная справа, патрыятызм. Думалі, што такім фота ўжо нікога не здзівіш, — успамінае Мікіта падзеі кастрычніка 2015-га.
У выпускным фотаальбоме вучылішча за 2017 год Мікіты няма. Ён распавёў, што забраў дакументы праз некалькі месяцаў пасля той гісторыі:
— Трэцюю чвэрць пасля Новага года я ўжо вучыўся ў сваёй роднай школе.
Малады чалавек кажа, што яго рашэнне перавесціся ў школу не было звязана з ціскам адміністрацыі вучылішча:
— Выкладчыкі да сітуацыі паставіліся з разуменнем. Зразумела, што дырэктару далі па шапцы. З намі правялі выхаваўчую гутарку, пазбавілі на тыдзень звальненняў за парушэнне формы адзення.
Наш суразмоўца кажа, што пасля той гісторыі кадэты перасталі публікаваць падобныя фота: «Ідэі ў галаве засталіся, але здымкі больш нікуды не ішлі».
Зараз Мікіта заканчвае ўніверсітэт. Адзін з удзельнікаў фота з «Пагоняй» пасля заканчэння вучылішча з'ехаў працягваць вучобу за мяжу. Двое іншых вучацца ў Беларусі. Маладыя людзі падтрымліваюць кантакт.
— Я застаўся ранейшым, пры сваіх ідэях. Пра хлопцаў шмат чаго не скажу, але не думаю, што іх сустрэну на вуліцы ў балаклавах.
Каментары