Zastacca biełaruskaj u Polščy — ci realna? - videarepartaž

A ci viedajecie vy, što pa toj bok Biełaviežskaj puščy, za Zachodnim Buham i šenhienskaj miažoj, taksama žyvuć biełarusy? «NN» raspačynaje sieryju videarepartažaŭ pra biełarusaŭ Padlašša, terytoryi na zachadzie byłoha Vialikaha Kniasta Litoŭskaha, jakaja ciapier znachodicca ŭ składie Polščy. Što heta za ludzi? Jak vyhladaje ich žyćcio?

Ci možna zastavacca biełarusam u Polščy — i ŭ abjadnanaj Jeŭropie?

Našaja pieršaja hierainia — 30-hadovajaIłona Karpiuk, vakalistka hurtu «Ilo&friends». Iłona naradiłasia ŭ Hajnaŭcy — heta miastečka ŭ biełastockim vajavodstvie, u niejkich dvuch dziasiatkach kiłamietraŭ ad miažy ź Biełaruśsiu. Baćki Iłony razmaŭlali ŭ siamji pa-polsku, a dziady — pa-biełarusku. Ad ich jana i navučyłasia movie prodkaŭ.

«Pamiataju, u čas kanikuł ustavali zranku z stryječnymi bratami, i babula ŭstavała. I tak składana joj było pa-polsku havaryć, ale pytałasia: «Co chcecie źjeść na śniadańnie?» My ŭ peŭny momant skazali: «Babcia, havarycie pa-svojmu, usio razumiejem», —

Uśviedamleńnie nacyjanalnaj tojesnaści prychodziła da jaje pastupova. Važnuju rolu ŭ hetym adyhrała vučoba ŭ biełaruskim licei i dziejnaść u «Biełaruskim abjadnańni studentaŭ». Tam Iłona sustreła svajo kachańnie — Radasłava Dambroŭskaha. «Biełaruskaść nas źjadnała», kaža jana.

Ź niadaŭniaha času Iłona pracuje mieniedžaram kulturnych prajektaŭ u biełastockaj opiery. Novy budynak opiernaha teatra — ultrasučasny hmach sa škła i bietona — heta najbujniejšaja inviestycyja ŭ halinie kultury va ŭsim Jeŭrasajuzie apošniaha času. Raźlik zrobleny na toje, kab z dapamohaj hetaha teatra pieratvaryć Biełastok u mižnarodny rehijanalny kulturny centr. A teatr — jaki, darečy, «pa sumiaščalnictvie» vykonvaje funkcyju Jeŭrapiejskaha centra kultury — zrobicca placoŭkaj dla praviadzieńnia mižnarodnych fiestyvalaŭ.

«Dla mianie być jeŭrapiejkaj — heta być svabodnaj», — kaža Iłona Karpiuk. I zastajecca pry hetym biełaruskaj.

My pabačyli Iłonu ŭ roznych miescach: na pracy, doma, na repietycyi jaje hurtu. Darečy, śpiavaje jana taksama pa-biełarusku. Naturalna, nijakich «zabaronaŭ» i «čornych śpisaŭ» dla biełaruskamoŭnych vykanaŭcaŭ u Polščy nie isnuje. Prapanujem i vam paznajomicca z hetaj biełaruskaj ź Biełastoka z dapamohaj našaha videasiužetu.

• 0
• 0
• 0
• 0
• 0
• 0
• 0
• 0