Napiaredadni tradycyjnaj Nočy muziejaŭ — z 18 na 19 maja — raskazvajem, kudy varta zavitać u stalicy i za jaje miežami. Kvitki na prahramy ŭ hetym hodzie — ad 2 da 30 rubloŭ.
Nazirać za Miesiacam i bolš daviedacca pra Soniečnuju sistemu
Prahrama Nacyjanalnaha mastackaha muzieja ŭ hetym hodzie pryśviečanaja temie śviatła. Raskazvać pra jaho buduć movaj mastactva i lekcyj, šou i instalacyj.
Rekamiendujem zavitać na sustreču ź viadomym fatohrafam i astranomam Viktaram Małyščycam — jon zaprašaje ŭsich achvotnych razam ź im panazirać za Miesiacam z 21:00 da dvuch nočy — Viktaru dakładna jość što pra jaho raspavieści.
Ź cikavych majstar-kłasaŭ u hetym hodzie — rośpis šopieraŭ, vycinanka i malunki kavaj.
«Viarnuć svoj dvuchtysiačny»
Dosyć šyrokuju litaraturna-muzyčnuju prahramu ŭ hetym hodzie prapanuje Muziej historyi biełaruskaj litaratury. Budzie i ekspromt-teatr ad narodnaha litaraturnaha teatra «Žyvoje słova», i majstar-kłas pa tradycyjnych biełaruskich lalkach ad Hanny Silivončyk, i vystup fołk-dueta «RALLA» — vyhladaje, što sumavać nie pryjdziecca.
Tych ža, chto choča «viarnuć svoj dvuchtysiačny hod», čakaje litaraturny muziej Pietrusia Broŭki. Čaho tolki varty majstar-kłas pa hulni ŭ humačku i mahčymaść zapoŭnić siabroŭskuju ankietu (pamiatajecie, takija raniej padsoŭvali siabry i adnakłaśniki, dzie pytalisia, kim ty chočaš stać i jakim hurtam reśpiektuješ?).
Dadatkovym pahružeńniem u minułaje stanie kalektyŭny prahlad rekłamy z 90-ch i nulavych, kreatyŭnaść i raźniavolenaść jakoj u tyja časy zaškalvała.
Ekskursija pa miemach
Minskaja halereja «Farba» prapanuje zavitać da ich na ekskursiju pa miemach — abiacajuć bolš za 100 šedeŭraŭ u ich halerei na płoščy Svabody, 8. Tak što kali vy amatar dasłać siabram ci kaleham u rabočym čacie žmieńku miemaŭ i chacieli b raźbiracca ŭ hetym płaście kultury jašče lepš, to samy čas.
Miem-ekskursija na biełaruskaj movie startuje 18 maja ŭ 19.30.
Rośpis kubkaŭ biełaruskim arnamientam
U staličnaj halerei «Art-fabryka» mierapryjemstvy startujuć z 16.00 i praciahnucca da hadziny nočy. Prahrama dosyć abjomnaja. Raim abaviazkova zavitać na majstar-kłas Paŭliny Čarapok pa raśpisvańni kubkaŭ vitražnymi farbami ŭ styli biełaruskaha arnamientu — pačatak a 20-j.
Fołk-dyskateka
Dziaržaŭny litaraturny muziej Janki Kupały ŭ hetym hodzie śviatkuje 80-hodździe i da hetaje daty padrychtavaŭ tematyčnuju vystavu. Ale pry hetym imianińnik płanuje sam arhanizavać rozyhryš padarunka ŭ honar svajho dnia narodzinaŭ.
Desiertam viečaryny stanie vystup hurta «Araceja» — etničnyja miełodyi ŭ sučasnaj apracoŭcy dla vašych solnych ci kampaniejskich tancaŭ.
Pačuć pieśni papularnaha tyktokiera
Kali vy zasiadajecie ŭ tyktoku, to mahli bačyć videa pra biełaruskuju movu ad Illi Šynkarenki — jany nabirajuć dziasiatki tysiač prahladaŭ. 18 maja chłopiec vystupić u muziei Bahdanoviča: vykanaje jak pieśni na vieršy biełaruskich kłasikaŭ tak i svaje ŭłasnyja.
Pa-za miežami stalicy
Pa sapraŭdnuju aŭtentyčnaść raim adpraŭlacca za miežy Minska, sieŭšy na mašynu ci hramadski transpart. Vialiki vybar krutych interaktyvaŭ prapanoŭvaje, naprykład, Vietkaŭski muziej staravierstva i biełaruskich tradycyj. Vas čakaje i viadomy abrad «Pachavańnie strały», i pieśni ŭ vykanańni fołk-kalektyvaŭ, i prahlad filma pra abradavy cykł Paleśsia, a jašče — atrymańnie karysnych viedaŭ pa stvareńni viasielnych vianočkaŭ.
Što niečakana, usie aktyŭnaści ŭ hetym muziei — biaspłatnyja, ale kamanda budzie radaja lubym danatam.
Połacki historyka-kulturny muziej-zapaviednik u svaju čarhu padrychtavaŭ šyrokuju dziciačuju prahramu, u jakoj — śpiecyjalnaja teatralizavanaja dzieja «Uroki manacha Simiaona» da 395-hodździa z dnia naradžeńnia połackaha aśvietnika.
Dadatkovyja cikavostki — u filijale muzieja, pryśviečanaha ručnomu tkactvu Paazierja: vystava «Biełaruski tradycyjny stroj u minijaciury» i hulnia-kvest z pryzami.
Krychu bližej da Minska — Suła i admysłovaja prahrama dla tych, chto choča biaśpiečna pakazytać svaje niervy ŭ hetyja dni pry dapamozie mistyčnych lehiend i apoviedaŭ na łakacyjach. A jašče naviednikaŭ zavablivajuć fakielnym šeściem — uviečary pavinna vyhladać vielmi instahramna.
Kamientary
Tam dzie jon tryvały i smačny, zmarnujeciesia ŭ čarzie.
Tam dzie darmovy śniadanak niščymny niesmak čarhi niama, bo sensu niama