Prodažy novych aŭto ŭ Biełarusi vyjšli na davajenny ŭzrovień, ale dola Geely skaračajecca. Čamu tak?
Pa vynikach krasavika aficyjnyja dylery pradali 3751 aŭto, tym samym upieršyniu pieravysiŭšy pakazčyki, jakija byli ŭ apošnija miesiacy pierad pačatkam poŭnamaštabnaj vajny va Ukrainie.
Kryzis skončyŭsia
Na treci hod paśla pačatku vajny biełaruskim dyleram udałosia vyjści na davajenny ŭzrovień prodažaŭ. Adnak na ahulnym fonie rostu prodažaŭ nazirajecca skaračeńnie doli biełaruska-kitajskaha vytvorcy Belgee (Geely). Pa vynikach krasavika ich dola skłała 54,8% ad ahulnaha abjomu prodažaŭ. Hod tamu na dolu Geely prychodziłasia 78,7%. Dola Geely pačała skaračajecca nie pieršy miesiac, naprykład, u lutym 2024 u Geely było 57% rynku novych aŭto.
Skaračeńnie doli Geely tłumačycca ŭ pieršuju čarhu tym, što Rasii prynamsi častkova ŭdałosia adnavić vytvorčaść novych aŭto. Praz heta ŭ sałony dyleraŭ pačało pastaŭlacca bolš madelaŭ aŭto, jakija vypuskajuć u Rasii.
Ci zastalisia čerhi na Geely?
Admietna, što dola Geely skaračajecca navat z ulikam taho, što možna biez prablem nabyć samuju tannuju madel — siedan Emgrand, jaki kaštuje ad 57 600 rubloŭ (kala $17 900). Letaś, kab nabyć Geely Engrand, treba było pa niekalki miesiacaŭ čakać u čarzie.
Ciapier čerhi zachavalisia tolki na Belgee X50 (Geely Coolray). Kab nabyć ajčynny krasovier, treba pačakać paŭtara-try miesiacy.
Skaračeńnie za hod doli Geely z amal 80% da 54,8% pakazvaje na toje, što cikavaść da aŭto ajčynnaj vytvorčaści ŭ pieršuju čarhu była abumoŭlena adsutnaściu alternatyvy. Paśla pačatku vajny vytvorčaść šerahu papularnych u biełarusaŭ aŭto — takich, jak VW Polo, Renault Logan, Sandero — była spyniena praz zychod zachodnich aŭtavytvorcaŭ z Rasii.
Ale, jak pakazvaje statystyka, cikavaść da aŭto rasijskaj i kitajskaj vytvorčaści taksama šmat u čym vyklikana adsutnaściu alternatyvy, a nie ščyraj luboŭju da kankretnych madelaŭ.
Što dobra dyleram, to prostamu biełarusu drenna?
Pradstaŭniki Biełaruskaj aŭtamabilnaj asacyjacyi adznačyli, što pierahledziać prahnozy na 2024 hod u bok pavieličeńnia na fonie ŭźnikłych dadatkovych pieraškod na šlachu aŭto ź Jeŭropy. Dadatkovyja abmiežavańni pa imparcie mašyn ź ES z abjomam ruchavika bolš za 1,9 litra jany nazyvajuć istotnym faktaram, jaki pazityŭna ŭpłyvaje na rynak dylerskich prodažaŭ.
Źjaŭleńnie ŭ Biełarusi lhotnaj razmytnioŭki ŭ 2019 hodzie pradstaŭniki aficyjnych dyleraŭ nieadnarazova nazyvali važnym faktaram, jaki ŭpłyvaje na dylerskija prodažy. Što čarhovy raz pakazvaje na toje, što dla zabieśpiačeńnia vysokaha popytu na biełaruska-kitajskija i rasijskija aŭtamabili patrebnyja vysokija abmiežavalnyja barjery na šlachu aŭto ź Jeŭropy i ZŠA.
Kiraŭnictva BAA nieadnarazova vystupała z zajavami pra toje, što isnavańnie ŭkaza №140, jaki dazvalaje peŭnaj katehoryi hramadzian razmytniać aŭto z 50%-ym dyskontam, niehatyŭna adbivajecca na prodažach novych aŭto aficyjnymi dylerami. Na ich dumku, ukaz treba skasavać abo prynamsi źmianić tak, kab razmytnieny pa lhocie aŭtamabil nielha było pradavać ciaham 3-5 hadoŭ.
Najlepšym hodam za apošnija časy dla biełaruskich dyleraŭ staŭ 2019 hod, kali im udałosia realizavać bolš za 60 tysiač adzinak techniki. Paśla abjomy prodažaŭ pačali skaračacca. U pandemijnym 2020-m było 46 tysiač, a ŭ pieradvajennym 2021 — 41 tysiača. Najhoršym akazaŭsia 2022, kali pa vynikach hoda aficyjnym dyleram udałosia pradać usiaho 14 843 aŭto. Dla paraŭnańnia, tolki za pieršyja čatyry miesiacy biahučaha hoda dylery pradali 11 366 novych lehkavych aŭto.
U davieranaj asoby Łukašenki zabrali biznes pad Hrodnam: «Na paroh vyjšaŭ niejki mužyk i zajaviŭ, što ŭpieršyniu mianie bačyć»5
Kamientary