Svabodu stupniam! Jakija pieravahi i niebiaśpieki toić «basanohi abutak»
Trend na abutak barefoot, jaki paśpieŭ ukaranicca na Zachadzie, narešcie pryjšoŭ u Biełaruś. Jakija plusy i minusy chavajuć modnyja čaraviki — raskažam u hetym materyjale.
U 1935 hodzie hrupa italjanskich alpinistaŭ-amataraŭ pad kiraŭnictvam Vitale Bramani raspačała adčajnuju sprobu ŭzyści na pik Rasika ŭ inavacyjnaj amunicyi — lohkich botach. Abutak z padešvaj z toŭstaha fietru vydatna ŭtrymlivaŭ stupniu, nie dajučy joj ślizhać. Adnak ekśpierymient akazaŭsia pravalnym: ciepłapravodnaść botaŭ była nie na vyšyni, i adrazu šaściora siabroŭ atrada abmarozili nohi, nie zmahli spuścicca i ŭ vyniku zahinuli.
Sam Bramani vyžyŭ. Spraviŭšysia z šokam, jon pastaviŭ pierad saboj ambicyjnuju metu — vynajści čaraviki, jakija dapamohuć spartsmienam paźbiahać traŭmaŭ i buduć palapšać ich vyniki. Tak była zasnavana kampanija Vibram, jakaja praz 60 hadoŭ vypuścić adnu ź pieršych par «basanohaha abutku».
Jak dziŭny abutak uvajšoŭ u modu
U kancy dzievianostych novy dyzajnier brenda Robiert Fliry prydumaŭ madel Vibram FiveFingers, abo «palčatak dla noh». Abutak z adsiekami dla palcaŭ spadabaŭsia entuzijastam fitniesu: johi i biehuny z zadavalnieńniem raskuplali ekscentryčnyja krasoŭki.
Z marafonskich darožak trend pryjšoŭ na modnyja podyumy. U 2020 hodzie vyjšła kałabaracyja Balenciaga i Vibram: razam brendy stvaryli čaraviki-škarpetki, baciljony na abcasie i krasoŭki na šnuroŭcy.
Nieŭzabavie byŭ raspracavany drop z Suicoke. Viadomaja japonskaja marka stvaryła paŭbociki z paznohciami, jakija možna farbavać. Ale amatary sportu lubiać basanohi abutak nie za jarki dyzajn.
U čym sens trendavaj madeli
Viadoma, što stupni majuć značnuju kolkaść niervovych kančatkaŭ, praź jakija ŭ mozh pieradajecca sensarnaja zvarotnaja suviaź — źviestki pra navakolnaje asiarodździe, jakija ŭpłyvajuć na pačućcio raŭnavahi i prastoravuju aryjentacyju. Hruby abutak uskładniaje pieradaču takoj suviazi i zatrymlivaje impulsy, patrebnyja mozhu dla analizu.
Akramia taho, sučasny abutak časta byvaje vuzkaj i vyciahnutaj formy z žorstkim naskom. U takim — vialiki palec i miezieniec zdušvajucca, što z časam pryvodzić da defarmacyi stupni i prablem z sustavami.
U adroźnieńnie ad kłasičnych madelaŭ, basanohi abutak nie abmiažoŭvaje palcaŭ, nie maje supinataraŭ abo amartyzataraŭ, a taksama maje vyklučna tonkuju padešvu — jaje taŭščynia nie pavinna pieravyšać 8 mm, a samyja «krutyja» brendy naohuł źnizili hety pakazčyk da 4 mm. Barefoot pavinien być hnutkim i biez namahańniaŭ skručvacca ŭ trubačku va ŭsich płoskaściach.
Ličycca, što našeńnie takoha abutku harantuje razhruzku sustavaŭ i spryjaje ŭmacavańniu ciahlic, źviazak i suchažyllaŭ stupni. Zrešty, nie ŭsio tak adnaznačna.
Boty nie dla ŭsich
Artapiedy da hetaha času nie syšlisia ŭ mierkavańni, čaho bolš ad našeńnia svabodnych bot — škody abo karyści. U lubym vypadku, pierajści na takija madeli na praktycy akazvajecca nie prosta.
Amataram «basanohaści» treba padrychtavacca: bol i niepryjemnyja adčuvańni ŭ pačatku noski — častyja spadarožniki takich čaravikaŭ. Tamu pačynać ich vykarystańnie treba z hadziny ŭ dzień, pastupova pavialičvajučy čas. Byvałyja «basiaki» kažuć, što, kab pryvyknuć da novaha abutku, stupniam spatrebicca ad pary miesiacaŭ da niekalkich hadoŭ.
U abutku z tonkaj padešvaj častata krokaŭ stanovicca bolšaj, a sam krok — karaciejšym. Źmianiajecca i miechanika chady: kali ŭ zvyčajnych čaravikach pieršaj ziamli dakranajecca piatka, to ŭ barefoot apora prychodzicca na siaredniuju abo piaredniuju častku stupni. Darečy, maleńkija dzieci biehajuć mienavita tak — z naska na piatku. Miarkujecca, što heta dapamahaje źmienšyć siłu sutyknieńnia ź ziamloj i praźmierny cisk na zadniuju častku stupni.
Ale, niahledziačy na markietynhavyja zapeŭnieńni, jakija va ŭnison raschvalvajuć karyść takoha abutku, isnuje hrupa ludziej, jakim trendavyja boty ŭvohule procipakazanyja. Pry padešviennaj fascyi, dyjabietyčnaj stupni, balučych mazalach i natoptyšach basanohi abutak moža pahoršyć stan. Tamu płanavać pierachod na «basanohaść» treba paśla kansultacyi ź lekaram.
Kamientary
Opiraťsia na sovkovych ortopiedov, kotoryje nie učatsia i nie chotiat ni v čiem raźbiraťsia - nieuvažienije k chorošim śpiecialistam