Ryzyka źviazana z prablemami ŭ dvuch asnoŭnych sudnachodnych kanałach — Panamskim i Sueckim. U vypadku ź pieršym składanaści vyklikanyja zasuchaj, z druhim — napadami chusitaŭ na karabli ŭ Čyrvonym mory.
Dastaŭka pierad Kaladami tavaraŭ pa ŭsim śviecie moža być parušanaja z-za prablem z dvuma asnoŭnymi sudnachodnymi kanałami — Panamskim i Sueckim, piša RBK sa spasyłkaj na Financial Times.
U vypadku ź pieršym rolu adyhryvaje zasucha, padzieńnie ŭzroŭniu vady ŭ kanale pryviało da skaračeńnia jaho prapusknoj zdolnaści. U vypadku z druhim pahrozu ŭjaŭlajuć napady jemienskich chusitaŭ na sudny.
U trecim kvartale hetaha hoda bolš za pałovu kantejniernych pieravozak (pa abjomie) z Azii ŭ Paŭnočnuju Amieryku ci naadvarot pavinny byli prajści albo praz Panamski, albo praz Suecki kanały.
«Jość tavary, jakija prosta nie paśpiejuć prybyć da hetych Kaladaŭ», — papiaredziŭ hienieralny dyrektar Instytuta ekspartu i mižnarodnaha handlu Marka Fardžyjonie. Arhanizacyja pradstaŭlaje intaresy imparcioraŭ pa ŭsioj Vialikabrytanii.
Pa słovach Fardžyjonie, z-za prablem u Panamskim kanale mohuć adbycca zatrymki z pastaŭkami bytavoj elektroniki, u pryvatnaści, techniki Apple, taksama jość prablemy z zakupkami kaladnych padarunkaŭ.
Rost napadaŭ u Sueckim kanale razam sa składanaściami ŭ prachodzie praz Panamski mohuć pryvieści da katastrafičnych nastupstvaŭ. U tym liku, ličyć jon, kali nie zabiaśpiečyć ustojlivaść łancužkoŭ pastavak, to prablemy buduć i na praciahu nastupnaha hoda.
«Panamski kanał faktyčna zakryty. Kali b toje ž samaje zdaryłasia z Sueckim, jak by vy dastaŭlali zbožža [pa ŭsim śviecie]? Mienavita tady taryfy na dastaŭku pačnuć raści», — skazaŭ nienazvany jeŭrapiejski trejdar.
Va Ukrainie zahinuła 24-hadovaja biełaruskaja dobraachvotnica Maryja Zajcava20
Kamientary