«Zrazumieła, što vartaja lepšaha». Kryścina Cimanoŭskaja razvodzicca
Mienš čym dva miesiacy tamu lohkaatletka Kryścina Cimanoŭskaja raspaviadała «Našaj Nivie», što za dva hady vymušanaj emihracyi jana trojčy razychodziłasia z mužam, ale im udałosia pieražyć najbolš składanyja momanty i ŭ ich usio dobra. A siońnia spartoŭka napisała ŭ instahramie, što zaraz zajmajecca pytańniami razvodu.
«Viadoma, ja nie budu ŭ padrabiaznaściach raskazvać ab pryčynach i kałupacca va ŭžo minułych adnosinach. Ja adpuściła. U padziacy i spakoi. Bieź isteryk i depresij. Ja vyrasła i zrazumieła, što vartaja lepšaha. Vartaja kachańnia, pryniaćcia i zdarovych adnosin», − adznačyła Kryścina ŭ sacsietkach.
Para była razam 9 hadoŭ, ź ich 6 u aficyjnym šlubie. Kryścina i Arsienij Zdanievič paznajomilisia ŭ 2013 hodzie (tady dziaŭčyna vučyłasia ŭ 11 kłasie Respublikanskaha vučylišča alimpijskaha reziervu ŭ Minsku). Praź miesiac maładyja ludzi pačali sustrakacca. Pa ŭspaminach Kryściny, tady mnohija kazali, što jany nie buduć razam, ale jana adrazu była ŭpeŭnienaja ŭ surjoznaści adnosin.
Kryścina maryła ab tym, kab joj zrabili prapanovu pad Ejfielevaj viežaj. I Arsienij hetuju maru ździejśniŭ častkova − jon zaprasiŭ kachanuju ŭ francuzski restaran u biełaruskaj stalicy, dzie była minijaciurnaja Ejfieleva vieža. A aficyjant prynios bukiet i zaručalnyja piarścionki.
U žniŭni 2017-ha para pabrałasia šlubam. U niejki momant Arsienij vyrašyŭ syści sa sportu (jon taksama zajmaŭsia lohkaj atletykaj) i ŭładkavaŭsia ŭ Respublikanski centr alimpijskaj padrychtoŭki ŭ Minsku, kab być pobač z žonkaj i dapamahać joj treniravacca. Adnak zarobak tam byŭ śmiešny, i jamu davodziłasia padzarablać taksistam načami i vychodnymi.
Paźniej Arsienij uładkavaŭsia na pracu ŭ bujny fitnes-centr i jaho dachody adčuvalna vyraśli. Kryścina zhadvaje, što ŭ pieršyja ž miesiacy pracy muž staŭ atrymlivać 2500 rubloŭ zamiest 1000 — i heta z ulikam taho, što jon byŭ na vyprabavalnym terminie i atrymlivaŭ tolki 40% ad patencyjna mahčymaha zarobku. Ale tut zdaryŭsia skandał na Alimpijadzie ŭ Tokia, i Arsieniju pryjšłosia kinuć usio ŭ Biełarusi i ekstranna evakuiravacca da žonki ŭ Polšču. Jon navat nie paśpieŭ aficyjna zvolnicca i atrymać zarobak za apošni miesiac pracy.
U intervju «Našaj Nivie» Kryścina kazała, što emihracyja stała dla ich adnosin składanym vyprabavańniem: «Mahčyma, prablemy byli praz naš raptoŭny pierajezd, praz toje, što my aboje zhubili ŭsio, što ŭ nas było. Niejki čas ja była ŭ depresii, i heta nie vielmi dobra adbivałasia na našych adnosinach».
Spartoŭka padkreślivała, što muž dapamahaje joj z treniroŭkami, jeździć na spabornictvy i nazyvała jaho svajoj hałoŭnaj aporaj. U honar šostaj hadaviny viasiella ŭ žniŭni para abmianiałasia niatannymi padarunkami. Arsienij padaryŭ žoncy Audi, a jana jamu šviejcarski hadzińnik brendu Roamer.
Zdajecca, heta historyja kachańnia nabližajecca da zakančeńnia. U storyz Kryścina napisała, što biaskonca ŭdziačna Arsieniju za padtrymku ŭ hetyja ciažkija dva hady, ale adznačyła, što jon prynosiŭ šmat bolu i pakut, jakija niehatyŭna adbivalisia na jaje zdaroŭi. Pa słovach spartoŭki, jany hod sprabavali vyratavać adnosiny, u tym liku i z dapamohaj psichołaha, ale ŭ vyniku vyrašyli razyścisia.
Siońnia Kryścina źjechała ad muža. Praz dva dni jana płanuje palacieć u Hrecyju, a adtul užo dystancyjna šukać novuju kvateru dla siabie. «Pakul ja nie viedaju, dzie pačniecca majo novaje žyćcio. Usio, što ŭ mianie jość, heta mašyna i try čamadany rečaŭ».
Kamientary
Słava raźviołsia, Kristina ušła ot muža.
Soviet da lubov sojuzu śmiecha i sporta!