U Maskvie kataliki malilisia pa-biełarusku i razvažali pra «čarku i skvarku»
15 lipienia, u dzień uspaminu śviatoha Banavientury, niekalki dziasiatkaŭ viernikaŭ Maskvy i rehijona sabralisia na śviatuju imšu na biełaruskaj movie ŭ kaplicy klaštara ajcoŭ franciškanaŭ, paviedamlaje Catholic.by.
Na pačatku śviatoj imšy padčas uvachodu, jaki simvalizuje duchoŭnuju pilihrymku, pad sklapieńniami kaplicy prahučaŭ śpieŭ-malitva «Malusia za ciabie, Biełaruś».
Celebravaŭ Jeŭcharystyju ajciec Piotr Karnialuk OFMConv, adkazny za dušpastarstva katalikoŭ-biełarusaŭ u Maskoŭskim rehijonie.
U pramoŭlenaj hamilii śviatar adznačyŭ, što ŭ prostych vobrazach siejbita i kinutaha im nasieńnia Jezus pakazvaje roznych ludziej i ich adnosin da Boha.
«Ci nie zanadta my čerstvyja, jakim «čarka i skvarka» ŭ hetym žyćci zamianiajuć žyćcio viečnaje? A moža, my lehkadumnyja, schilnyja žyć paviarchoŭnymi ŭražańniami? Chtości, moža, i cikavicca duchoŭnym rostam, ale zusim nie imkniecca da taho, kab atrymanyja ŭražańni źviazać z hłybokimi asnovami chryścijanskaha žyćcia. Takoje žyćcio časam stanovicca padobnym da farsu», — zaŭvažyŭ ajciec Piotr.
Jon dadaŭ, što hleba ŭ jevanhielskaj prypavieści — heta čałaviečaja duša. «Kali jana kamianistaja, suchaja, to kinutyja ziarniatki, moža, i ŭzyduć, ale biez karanioŭ nie zdolejuć padniacca ŭvyś i dać plon. Treba dbać pra hlebu, palivać i źniščać cierni. Nielha adnačasova słužyć i Bohu, i mamonie», — skazaŭ jon.
Asablivyja malitvy ŭ hety dzień byli za supakoj u śviecie, biaźvinna zahinułych i za vysokadastojnaha archimandryta Siarhieja Hajeka, pryznačanaha pastanovaj Papy Franciška apostalskim administrataram dla hreka-katalikoŭ u Biełarusi. Zaviaršyłasia nabaženstva ahulnym biełaruskim relihijnym śpievam.
U Biełarusi pierad vybarami mohuć błakavać internet — jak da hetaha padrychtavacca, kab być na suviazi1
Kamientary