Małasolnyja ahurki: u čym ich karyść i navošta dadavać u słoik liście duba i parečak

Małasolnyja ahurki pa sposabie pryhatavańnia ničym nie adroźnivajucca ad marynavanych ci salonych ahurkoŭ, ale ich jaduć praz karotki pramiežak času. Dziakujučy hetamu ŭ ich bolš vitaminaŭ i mienš soli.

Rasoł robicca takim ža čynam: biarecca anałahičny nabor śpiecyj i takaja ž kolkaść soli. Hetyja dźvie raznavidnaści adroźnivajucca tolki praciahłaściu pieryjadu zakisańnia i smakam. Małasolnyja ahurki hatovyja da ŭžyvańnia praź dzień-dva-try. Čakać salonych prychodzicca ad tydnia da dziesiaci dzion.

Małasolnyja ahurki — krynica naturalnych prabijotykaŭ, abo, jak jašče ich nazyvajuć, «dobrych bakteryj». Jany stanoŭča ŭpłyvajuć na stravavańnie i zasvajalnaść ježy, a taksama na imunnuju sistemu arhanizma, bo dapamahajuć zmahacca z roznymi vidami virusnych infiekcyj, dyjarejaj i charčovaj alerhijaj.

Kab pryhatavać tradycyjnyja małasolnyja ahurki, vam spatrebicca:

• 1,5 kh śviežych hruntavych ahurkoŭ, nievialikich, sa skurkaj biez paškodžańniaŭ,
• małaja hałoŭka abo pałova vialikaj hałoŭki śviežaha časnaku,
• niekalki halinak kropu,
• trochi korania chrenu i / abo niekalki listoŭ,
• 2 stałovyja łyžki soli,
• 2 litry vady.

U 5-litrovy kantejnier lohka źmiaščajecca 1,5 kh ahurkoŭ. Vy možacie vykarystoŭvać vialiki słoik, harščok abo kieramičnuju bočku.

Pamiž ahurkami pakładzicie chren i śpiecyi.

Zakipiacicie vadu, rastvarycie ŭ joj sol, astudzicie i zalicie ahurki.

Ahurki treba prycisnuć hniotam, kab jany nie vytyrkalisia z rasołu.

Minimalny čas saleńnia — dzień-dva. Pieršyja sutki hurki trymajuć pry pakajovaj tempieratury, kab pavietra dachodziła da rasołu (kab pasudzina była nienakrytaja ci prykrytaja marlaj).

Jość sposab pryhatavać małasolnyja ahurki bolš chutka — heta tak zvanyja ahurki, pryhatavanyja «nasucha». Treba pakłaści ich u cełafanavy pakiet, dadać śpiecyi, pasypać sollu, dobra strasianuć pakiet, kab usie składniki jak śled pieramiašalisia, a potym pakłaści ŭ chaładzilnik prykładna na vosiem hadzin. Hatova!

Što jašče možna dadać dla smaku

Akramia vady, soli, kropu, jakija paŭtarajucca amal u kožnym recepcie, pry hatavańni małasolnych ahurkoŭ možna ekśpierymientavać ź inšymi dadatkami, jakija palapšajuć i źmianiajuć smak.

Łaŭrovy list, pierac, harčyca, liście duba i parečak, vinahradu i višni, čabor, bazilik, cukar, miod, hreckija arechi ― usio zaležyć ad taho, što vy lubicie.

Voś jašče dva recepty sa smakavymi varyjacyjami.

Małasolnyja ahurki ź liściem čornych parečak

• 1 litr haračaj vady
• 2 stałovyja łyžki soli
• 2 kh śviežych ahurkoŭ
• 1 pučok śviežaha kropu
• 5 zubčykaŭ časnaku
• 4 listy čornych parečak

Staranna vymyjcie ahurki. Pakładzicie pučok kropu na dno hlinianaha harška abo słoika. Vykładzicie ŭ jomistaść ahurki. Ačyścicie zubčyki časnaku i taksama pakładzicie ich u słoik. Liście parečak vymyjcie i pakładzicie da ahurkoŭ. Zakipiacicie vadu i dadajcie sol. Źmiašajcie da rastvareńnia soli i adrazu ž zalivajcie ahurki. Nakryjcie i pakińcie da nastupnaha dnia.

Małasolnyja ahurki ź liściem duba abo višni

Składniki na litrovy słoik:

• kala 500 h ahurkoŭ,
• 1 litr kipiačonaj vady,
• 1 stałovaja łyžka soli ź nievialikaj horkaj (pažadana kamiennaj, nie jodavanaj),
• 1 list chrenu,
• 2-3 vialikija zubčyki časnaku,
• 3-4 halinki kropu (čym bolš, tym lepšy vodar),
• kavałačak korania chrenu — prykładna 3-4 sm,
• višniovaje ci dubovaje liście.

Aŭtarka recepta raić na litr vady kłaści 1 stałovuju łyžku soli ź nievialikaj horkaj, a na litrovy słoik vykarystoŭvać kala 500 mł rasołu.

Jak hatavać:

1. Zakipiacicie 1 litr vady i dadajcie 1 stałovuju łyžku soli z horkaj. Staranna pieramiašajcie i astudzicie (u momant, kali vy zalivajecie ahurki, vada moža być ledź ciopłaj).
2. Staranna vymyjcie ahurki, krop i chren. Narežcie chren na niekalki bolš drobnych častak (naprykład, na čatyry). Ačyścicie časnok i padzialicie jaho na zubčyki. Akuratna razdušycie kožny zubčyk časnaku, prycisnuŭšy jaho tupym bokam naža da stalnicy.
3. Ahurki možna spakavać u vialiki słoik, kieramičny posud abo ŭ niekalki słoikaŭ. Dla saleńnia «tut i ciapier» — h. zn. u vypadku małasolnych ahurkoŭ — lepš za ŭsio padychodzić kieramičny posud.
4. Na samaje dno słoika pakładzicie list i kavałačak chrenu, častku kropu, zubčyk časnaku.
5. Dosyć ščylna vykładzicie ahurki ŭ słoik, pažadana ŭ viertykalnym stanoviščy. Pakinuty časnok, chren i krop zapchnicie pamiž ahurkami.
6. Zalicie ahurki papiarednie pryhatavanaj ledź ciopłaj vadoj z sollu, jany pavinny być całkam pakrytyja. Kali vy robicie ahurki ŭ słoiku, dosyć ščylna ich układzicie i nakryjcie słoik nakryŭkaj abo marlaj (pavinien być dostup pavietra, tamu ščylna nie zakryvajcie).
7. Ahurki treba schavać ad sonca (bo inakš jany zhnijuć, a nie prasolacca). Prykładna praz 2-3 dni jany buduć hatovyja da ŭžyvańnia — vada pamutnieje. Kožny nastupny dzień budzie rabić małasolnyja ahurki bolš salonymi.

Bolš pra ježu:

Šeść sałataŭ z ahurkom: ad znajomych da niečakanych

Jak skłaści letni racyjon? Raźbirajem mify i praviły

Bambł-kava — sapraŭdny letni chit. Aściarožna, hety napoj moža stać vašym ulubionym

• 18
• 0
• 2
• 2
• 4
• 10
• 13
• 0