U niekalkich jeŭrapiejskich krainach napiaredadni Kaladaŭ na fonie raspaŭsiudžvańnia novaha štamu «amikron» pabili rekordy pa kolkaści vypadkaŭ zaražeńnia kavidam za sutki. U SAAZ čakajuć, što ŭ nastupnyja tydni «amikron» vycieśnić inšyja varyjanty
Šerah jeŭrapiejskich krain pierad Kaladami zarehistravali rekordy pa kolkaści zaražeńniaŭ karanavirusam za sutki, paviedamiŭ Reuters.
U Vialikabrytanii 24 śniežnia paviedamili pra 122,1 tys.novych vypadkaŭ zaražeńnia. Za apošni tydzień u krainie vyjavili 707,3 tys. infikavanych, što na 230 tys., ci amal u paŭtara raza bolš, čym tydniem raniej.
Pakazčyk pabiŭ maksimum taksama ŭ Francyi i Italii 94,1 tys.i 50,5 tys. vypadkaŭ za sutki adpaviedna.
Rekordy fiksujucca na fonie raspaŭsiudu novaha štamu «amikron». Da prykładu, u Irłandyi, u jakoj taksama pabity maksimum (11,1 tys.), z hetym varyjantam źviazanyja bolš za try čverci novych vypadkaŭ
Pry hetym u Italii ličać, što pik chvali COVID-19 jašče nie dasiahnuty.
«U studzieni budzie vielmi mocny rost zachvorvańnia», - pryvodzić Corriere della Sera słovy navukovaha daradcy ministra achovy zdaroŭja Valtera Rykardzi.
U Suśvietnaj arhanizacyi achovy zdaroŭja (SAAZ) taksama prahnazujuć, što ŭ nastupnyja tydni amikron-štam vycieśnić inšyja varyjanty karanavirusa, što vykliča «značny ŭsplosk» kolkaści novych pacyjentaŭ. U Jeŭropie hetuju mutacyju vyjavili ŭ 38 z 53 krain, jakija kuryrujucca Jeŭrapiejskim padraździaleńniem SAAZ. Jana ŭžo daminuje ŭ Vialikabrytanii, Danii i Partuhalii.
Va Ukrainie zahinuła 24-hadovaja biełaruskaja dobraachvotnica Maryja Zajcava20
Kamientary