Dakładnaja kolkaść paciarpierych nieviadomaja. Biełaruskija pravaabaroncy ŭ vieraśni pieradali ŭ AAN 450 zadakumientavanych vypadkaŭ katavańniaŭ i žorstkaha abychodžańnia z zatrymanymi i pratestoŭcami. Pa infarmacyi «Miedyjazony» ŭ žniŭni-vieraśni 2020 hoda achviarami dziejańniaŭ siłavikoŭ stała nie mienš za 1400 čałaviek. Siarod ich u tym liku žančyny i padletki. Ale hvałt praciahvaŭsia i paśla hetaha.
Śledčy kamitet paviedamlaŭ, što na 17 žniŭnia 2020 hoda z zajavami ab atrymańni cialesnych paškodžańniaŭ pry zatrymańni ci ŭ časie znachodžańni ŭ izalatary da ich źviarnułasia 700 čałaviek. Padčas učorašniaj razmovy z Łukašenkam SK nazvaŭ novuju ličbu — 5000. Nivodnaj kryminalnaj spravy pa hetych faktach tak i nie było zaviedziena.
Tahačasny ministr MUS Juryj Karajeŭ zajaŭlaŭ, što ŭ pieršyja dni pratestaŭ paciarpieŭ 131 supracoŭnik milicyi. Pra pabitych siłavikoŭ vykazvaŭsia i Alaksandr Łukašenka. «39 ci 40 rabiat, pierałamanych, i z pazvanočnikami pierałamanymi amapaŭcy dahetul lažać u špitali. A niekatoryja nikoli ŭžo nie ŭstanuć i da žonki svajoj nie padpaŭzuć», — kazaŭ jon u vieraśni ŭ intervju RT. Ale ni fota siłavikoŭ z takimi traŭmami, ni ich samich u sudach nichto nie bačyŭ.
Naprykancy žniŭnia 2020-ha Hienprakuratura abviaściła, što stvaryła Mižviedamasnuju kamisiju pa rasśledavańni aktaŭ hvałtu z boku supracoŭnikaŭ orhanaŭ. Jaje ŭznačaliŭ vychadziec z KDB Dźmitryj Hara (ciapierašni kiraŭnik SK). Pra vyniki pracy hetaj kamisii ničoha nie viadoma.
Ułady sprabujuć pierakanać, što hvałtu nie było. Što 60% fota ź siniakami — fejk. Ale ścierci tysiačy fotazdymkaŭ i videa niemahčyma.
15 lipienia 2020 hoda. Dzień, kali brali ludziej, jakija pryjšli da CVK padać skarhi.
10 žniŭnia 2020 hoda. Začystka la «Karony» na Kalvaryjskaj u Minsku. Adzin ź siłavikoŭ strelić u žurnalistku «Našaj Nivy» Natallu Łubnieŭskuju, jana paŭtara miesiacy pralažyć u balnicy z kulavym ranieńniem.
10 žniŭnia 2020 hoda. Na vulicach stalicy ŭtvarajucca vializnyja zatory. Mnohija kiroŭcy pacierpiać u časie razhonu, kali ŭ mašyny buduć kidać śviatłošumavyja hranaty, a kiroŭcaŭ pačnuć vyciahvać i kidać u aŭtazaki.
10 žniŭnia 2020 hoda. Razhon na Puškinskaj.
10 žniŭnia 2020 hoda. Uvachody i vychady ŭ mietro kantralujuć siłaviki. Ludziej chapajuć i vałakuć u aŭtazaki.
10 žniŭnia 2020 hoda. U toj dzień mnohija atrymali ciažkija ranieńni.
Kamientary