Jak budzie iści pieršaja chutkasnaja linija tramvaja ad vakzała ŭ Sucharava KARTA
«Minskhrada» pakazała, pa jakim maršrucie budzie prakładzienaja chutkasnaja tramvajnaja linija z vakzała da mikrarajona Sucharava.
Płany budaŭnictva novych tramvajnych šlachoŭ isnavali daŭno, ale ich realizacyja pastajanna adkładałasia, bo pieravaha addavałasia stvareńniu novych linij mietro. Situacyja źmianiłasia paśla sustrečy staršyni Minhravykankama Anatola Sivaka z Alaksandram Łukašenkam.
Jak paviedamlajuć «Minsk-Naviny», pieršaja chutkasnaja trasa tramvaja startuje ŭ rajonie skryžavańnia vulic Šaranhoviča i Akademika Fiodarava, dzie płanujecca razvarotnaje kalco. Zatym pojdzie pa vulicach Šaranhoviča, Panamarenki, Charkaŭskaj, pierasiače čyhunku kala prypynku «Minsk-Paŭnočny». Tut chutkasnaja linija pavinna być źviazana ŭ adzin transpartny vuzieł sa stancyjaj mietro «Maładziožnaja». Dalej jaho trasa dojdzie da vulicy Kłary Cetkin, paviernie naprava da płoščy Franciška Bahuševiča, vulicy Babrujskaj i złučycca ź isnujučaj tramvajnaj sietkaj na płoščy Miaśnikova, pobač z čyhunačnym vakzałam.
Jak mienavita budzie dasiahacca vysokaja chutkaść tramvaja, pakul niezrazumieła. Na siońnia tramvai jeździać pa Minsku ź miziernymi 12-17 km/h (z ulikam prypynkaŭ). Pa płanach, chutkasny tramvaj moža mieć siaredniuju chutkaść 20-25 km/h na ziamli i 30 km/h na estakadach.
«Technika-ekanamičnaje abhruntavańnie prajekta chutkasny tramvajnaj trasy z Sucharava pavinna adkazać na mnohija pytańni, — raskazvaje načalnik vulična-darožnaj sietki i transparta «Minskhrada» Uładzimir Pryščepaŭ. — U pieršuju čarhu, u jakim vykanańni jana budzie pabudavana: naziemnym albo na estakadach. Ci ž u źmiašanym, hibrydnym varyjancie, da jakoha pakul i schilajucca śpiecyjalisty «Minskhrada». Prajezd na skryžavańni z asnoŭnymi haradskimi mahistralami mahčyma arhanizavać na roznych uzroŭniach. Chutkasny tramvaj u vyniku dapamoža źnizić pasažyrapatok mietrapalitena, pierasadačnaja stancyja jakoha «Kastryčnickaja» — «Kupałaŭskaja» ŭžo dasiahnuła svajho limitu, asabliva ŭ hadziny pik.
U jakim vykanańni budzie ruchomy sastaŭ — 2-3 vahony ci 5-6, — vyznačycca paźniej. Usio budzie zaležać ad ich pasažyraźmiaščalnaści. Miarkuju taksama, što ŭdzieł u tendary na vytvorčaść chutkasnych tramvajaŭ prymuć abodva biełaruskija pradpryjemstvy — «Biełkamunmaš» i «Štadler Minsk».
Chto taja prafsajuznaja aktyvistka z MAZa, jakaja paprasiła Łukašenku razabracca ŭ jutubie z «biehłymi»?5
Kamientary