«Rośniefť» kuplaje Adeski NPZ

Dziaržaŭnaja kampanija «Rośniefť» abmiarkoŭvaje kuplu Adeskaha NPZ, jaki naležyć hrupie UJEPEK Siarhieja Kurčanki.

Pra heta piša «Kommiersant-Ukraina».

Jak piša vydańnie, «Rośniefť» nabyvaje ŭ VTB Adeski NPZ.

Pa ich dadzienych, damoŭlenaści byli dasiahnuty na minułym tydni. Da hetaha času zavod naležaŭ hrupie UJEPEK (Uschodnie-Jeŭrapiejskaja paliŭna-enierhietyčnaja kampanija) Siarhieja Kurčanki, jakoha ličyli blizkim da siamji byłoha prezidenta Viktara Janukoviča.

Kurčanka, jaki byŭ vymušany pakinuć Ukrainu ŭ lutym paśla źmieny ŭłady ŭ Kijevie, pa słovach surazmoŭcaŭ, zrazumieŭ, što nie zmoža pahasić kredyt, atrymany ŭ VTB na kuplu NPZ, i pieradaŭ aktyŭ banku, papiarednie damoviŭšysia z «Rośniefťju».

Damovu z VTB rasijskaja dziaržkampanija raźličvaje padpisać u bližejšy čas, śćviardžajuć surazmoŭcy.

U «Rośniefti» i VTB ad kamientaryjaŭ admovilisia.

Ukrainskija palityki i biznesmieny źviazvali pazicyi UJEPEK ź blizkaściu da ŭładaŭ, u pryvatnaści da syna Viktara Janukoviča Alaksandra, ale Kurčanka zapeŭnivaŭ, što źjaŭlajecca adzinym uładalnikam UJEPEK i nijakaha dačynieńnia da siamji prezidenta nie maje.

Adeski NPZ spynieny 25 lutaha, amal uvieś top-mieniedžmient raspuščany, na pradpryjemstvie raspačataja pravierka pa padazreńni ŭ kantrabandzie naftapraduktaŭ.

Krynicy kažuć, što maskoŭski ofis UJEPEK pakul funkcyjanuje, ale supracoŭniki ŭžo šukajuć novuju pracu. Sam Kurčanka, raspaviadajuć surazmoŭcy, pakinuŭšy Ukrainu, sprabavaŭ zastacca ŭ Biełarusi, ale miascovyja ŭłady admovili jamu.

Ź minułaha tydnia, kažuć krynicy, biznesmien znachodzicca ŭ Maskvie, sprabujučy ŭrehulavać adnosiny z rasijskimi partniorami.

UJEPEK pavinna za tankiernyja pastaŭki nafty «Łukojłu» i «Rośniefti» (apošniaj - bolš za 150 młn dalaraŭ), kažuć surazmoŭcy.

Jany śćviardžajuć, što Kurčanka sustrakaŭsia z kiraŭnikom «Rośniefti» Iharam Siečynym na minułym tydni, damoviŭšysia ab pierachodzie Adeskaha NPZ pad kantrol dziaržkampanii, — heta budzie zaličana jak pahašeńnie pazyki.

Krynicy nazyvajuć uhodu ŭ pieršuju čarhu palityčnaj. Sapraŭdy, da hetaha času rasiejskija naftaviki nie hareli žadańniem raźvivać biznes va Ukrainie, a chutčej naadvarot, imknulisia pazbavicca ad miascovych aktyvaŭ. Toj ža Adeski NPZ mahutnaściu 2,8 młn ton UJEPEK kupiła ŭ «Łukojła» ŭ sakaviku 2013 hoda.

Dla rasijskaj kampanii biznes staŭ nierentabielnym, kali «Ukrtransnafta» pierastała prapampoŭvać naftu pa maršrucie Lisičansk-Kremienčuh. Suma ŭhody nie raskryvałasia, krynicy aceńvali jaje na ŭzroŭni 250 młn dalaraŭ.

Prafinansavaŭ kuplu VTB, vydaŭšy 370 młn dalaraŭ Swisspro Capital Ltd, NPZ staŭ zabieśpiačeńniem (jurydyčna pakupnikom vystupiła kiprskaja Empson Ltd, jakaja ŭvachodzić u UJEPEK).

«Rośniefť» nie tolki nie cikaviłasia Adeskim NPZ, kali jaho pradavaŭ «Łukojł», ale i źbirałasia pryciahnuć UJEPEK u partniory pa raźvićci ŭłasnaha aktyvu va Ukrainie — Lisičanski NPZ.

• 0
• 0
• 0
• 0
• 0
• 0
• 0
• 0