U hrodzienskim Farnym kaściole adbyłosia biskupskaje paśviačeńnie ksiandza Juzafa Stanieŭskaha
1 lutaha ŭ hrodzienskim katedralnym kaściole sv. Franciška Ksavieryja ksiondz prełat Juzaf Stanieŭski, šmathadovy rektar i vychavaciel Vyšejšaj duchoŭnaj sieminaryi ŭ Hrodnie, pryniaŭ biskupskaje paśviačeńnie.
Hałoŭnym paśviačajučym byŭ biskup Hrodzienski Alaksandr Kaškievič, asistujučymi — Mitrapalit Minska-Mahiloŭski arcybiskup Tadevuš Kandrusievič i biskup Pinski Antoni Dziamjanka.
Usio žyćcio biskupa Juzafa Stanieŭskaha było źviazana z Hrodzienščynaj. Jon naradziŭsia ŭ Zanievičach niedaloka ad Hrodna, vyvučaŭ fiłafosiju i teałohiju ŭ hrodzienskaj sieminaryi, dzie paźniej byŭ rektaram, vykonvaŭ roznyja funkcyi ŭ miascovym Kaściole. Na praciahu hadoŭ zajmaŭsia farmacyjaj novych pakaleńniaŭ duchavienstva i dapamahaŭ mnohim maładym ludziam u adkryćci šlachu da Chrystovaha śviatarstva.
Z hetaha času jon budzie padtrymlivać u pastyrskim słužeńni biskupa Hrodzienskaha Alaksandra Kaškieviča jak dapamožny biskup dyjacezii. Jak skazaŭ biskup Kaškievič u hamilii padčas Imšy z udzialeńniem paśviačeńnia,
«Śviaty Ajciec, naminujučy biskupa Juzafa, syna hrodzienskaj ziamli, prahnie dać našamu miascovamu Kaściołu dobraha pastyra, jaki viedaje svaju aŭčarniu, jaje kłopaty i patreby, viedaje, čym jana žyvie, čaho prahnie i čakaje».
Va ŭračystaści ŭdzielničali Apostalski Nuncyj u Biełarusi arcybiskup Kłaŭdyjo Hudžeroćci, usie biskupy Biełarusi, Mitrapalit Vilenski (Litva) arcybiskup Hintaras Hrušas, Apostalski vizitatar dla hreka-katolikaŭ Biełarusi archimandryt Siarhiej Hajek. Sabrałosia duchavienstva z usioj krainy, šmatlikija vierniki dyjacezii, hości z Hiermanii, Polščy, Ukrainy, Hruzii, Rasii, Litvy, śviatary Pravasłaŭnaj Carkvy, jakija pradstaŭlali jepiskapa Hrodzienskaha i Vaŭkavyskaha Arciemija, pastar Jevanhielična-luteranskaj supolnaści ŭ Hrodnie Uładzimir Tatarnikaŭ. Prysutničali pradstaŭniki miascovych uładaŭ i dypłamatyčnaha korpusu.
Va Ukrainie zahinuła 24-hadovaja biełaruskaja dobraachvotnica Maryja Zajcava20
Kamientary