Biełaruś zaniepakojena parušeńniem pravoŭ čałavieka ŭ «h.zv. krainach raźvitaj demakratyi»

Biełaruś vykazvaje hłybokuju zaniepakojenaść «imklivym rostam vypadkaŭ parušeńnia pravoŭ čałavieka ŭ hetak zvanych krainach raźvitaj demakratyi».

Pra heta zajaviła pradstaŭnik upraŭleńnia hłabalnaj palityki i humanitarnaha supracoŭnictva MZS Taćciana Laškova padčas dyskusii Hienasamblei AAN pa pytańni zaachvočvańnia i abarony pravoŭ čałavieka. Vystupleńnie adbyłosia 31 kastryčnika ŭ Ńju-Jorku.

«Siońnia zachodnija krainy ŭsio bolš asacyjujucca z rasavaj dyskryminacyjaj i parušeńniem pravoŭ mihrantaŭ i biežancaŭ, antysiemityzmam, šavinizmam, nieafašyzmam, siłavymi, navat žorstkimi razhonami demanstracyj, katavańniami, pieraśledam žurnalistaŭ, relihijnaj nieciarpimaściu, parušeńniem maralnych i duchoŭnych kaštoŭnaściaŭ», — cytuje Laškovu pres-słužba MZS Biełarusi.

Pavodle jaje słoŭ, za apošnija miesiacy ŭ Hiermanii zafiksavana aktyvizacyja dziejnaści arhanizacyj i partyj nieanacysckaha tołku, u pryvatnaści Nacyjanał-demakratyčnaj partyi, partyi «Za Hiermaniju». U Vialikabrytanii ŭ dačynieńni da žurnalistaŭ mieli miesca parušeńni pravoŭ na svabodu i asabistuju niedatykalnaść, na abaronu ad samavolnaha aryštu abo zatrymańnia, na svabodnaje vykazvańnie mierkavańnia, padkreśliła jana.

«Miarkujem, što ŭ Polščy, dzie ŭ lipieni 2013 hoda było vyniesiena apraŭdalnaje rašeńnie ŭ dačynieńni da asob, jakija abvinavačvalisia ŭ apahańvańni pomnikaŭ savieckim voinam u Varšavie, nie realizujecca abaviazacielstva dziaržavy pravodzić palityku likvidacyi ŭsich form rasavaj dyskryminacyi, — skazała Laškova. — U Čechii maje miesca rost nacyjanalistyčnych nastrojaŭ, achviarami jakich stanoviacca, u pieršuju čarhu, pradstaŭniki narodnaści roma. Prablema rasavaj dyskryminacyi taksama aktualnaja dla Šviejcaryi».

Pavodle słoŭ Laškovaj, Biełaruś pravodzić manitorynh vypadkaŭ parušeńnia pravoŭ čałavieka ŭ krainach Zachadu.

«Pa vynikach praviedzienaj nami ŭ 2012 hodzie pracy my padrychtavali dakład. U kancy 2013 hoda my rychtujemsia vydać druhi dakład ab parušeńni pravoŭ čałavieka ŭ krainach «prasunutaj demakratyi», jakija pamyłkova pazicyjanujuć siabie ŭ jakaści «nastaŭnikaŭ» u śfiery pravoŭ čałavieka», — paviedamiła pradstaŭnik MZS.

Jana taksama zaznačyła: «Biełaruś nieadnarazova padkreślivała niedapuščalnaść prymianieńnia adnabakovych mier ekanamičnaha prymusu i razhladaje ich jak sposab palityčnaha nacisku na suvierennyja dziaržavy. Pry hetym asobnyja dziaržavy, jakija zrabili ich miechanizmam svajoj źniešniaj palityki na karyść svaich palityčnych intaresaŭ, całkam ihnarujuć toj fakt, što takija miery karennym čynam padryvajuć ekanamičnyja i sacyjalnyja pravy nasielnictva krain, jakija padviarhajucca sankcyjam».

Laškova zaklikała da zasnavańnia adpaviednaj śpiecyjalnaj pracedury Savieta pa pravach čałavieka pa acency ŭpłyvu adnabakovych prymusovych mier na ažyćciaŭleńnie pravoŭ nasielnictva ŭ dziaržavach, suprać jakich nakiravanyja takija miery. «Ličym niedapuščalnym prymianieńnie Jeŭrasajuzam i ZŠA ekanamičnych sankcyj», — padkreśliła jana.

Pavodle słoŭ pradstaŭnika źniešniepalityčnaha viedamstva, Biełaruś taksama zaniepakojena tym, što zamiest akazańnia realnaj praktyčnaj i ekśpiertnaj dapamohi dziaržavam pa efiektyŭnaj arhanizacyi vykanańnia dahavornych abaviazacielstvaŭ u śfiery zaachvočvańnia i abarony pravoŭ čałavieka, kamitety, u pryvatnaści Kamitet pa pravach čałavieka, i asobnyja ekśpierty biaruć na siabie nieŭłaścivyja «sudovyja» funkcyi. «Pahardlivaje staŭleńnie da pazicyi dziaržaŭ, niadobrasumlennaje manipulavańnie niepravieranaj infarmacyjaj z sumnieŭnych krynicaŭ traktujecca jak niezaležnaść, paniaćcie ab adkaznaści pierad abraŭšymi ich dziaržavami vypustošvajecca z praktyčnaj dziejnaści dahavornych orhanaŭ pa pravach čałavieka», — skazała Laškova.

Jana padkreśliła, što Biełaruś ličyć nieabchodnym najchutčejšuju raspracoŭku kodeksa pavodzinaŭ členaŭ dahavornych orhanaŭ pa pravach čałavieka, pavyšeńnie padspravazdačnaści dahavornych orhanaŭ kanfierencyjam bakoŭ adpaviednych mižnarodnych dahavoraŭ.

Kažučy pra situacyju ŭ Biełarusi, Laškova zaznačyła, što respublika nadaje «maksimalnuju ŭvahu pytańniu zaachvočvańnia i abarony ŭsich katehoryj pravoŭ čałavieka — hramadzianskich i palityčnych, ekanamičnych, sacyjalnych i kulturnych».

Biełaruś aktyŭna ŭzajemadziejničaje z Savietam pa pravach čałavieka i pravaabarončymi miechanizmami, padkreśliła pradstaŭnik MZS. Pavodle jaje słoŭ, u 2013 hodzie ŭ Biełarusi sumiesna z Upraŭleńniem viarchoŭnaha kamisara pa pravach čałavieka (UVKPČ) byli praviedzieny mierapryjemstvy pa tematycy abarony achviaraŭ handlu ludźmi, niedapuščeńnia rasavaj dyskryminacyi. Zapłanavany sieminary pa tematycy pravoŭ invalidaŭ, pravoŭ dziciaci, sacyjalna-ekanamičnych pravoŭ.

Laškova zaznačyła, što ŭ 2010 hodzie Biełaruś paśpiachova prajšła pieršy cykł Univiersalnaha pieryjadyčnaha ahladu (UPA). «Na siońnia nami ŭžo vykanany amal usie rekamiendacyi, uchvalenyja pa vynikach ahladu. Zaraz my aktyŭna rychtujemsia da druhoha cykła UPA, jaki adbudziecca ŭ 2015 hodzie. U Biełarusi zapłanavany šerah mierapryjemstvaŭ pad ehidaj Prahramy raźvićcia AAN (PRAAN) i UVKPČ, pryśviečany padrychtoŭcy da druhoha cykła UPA. Pryčym u hetych mierapryjemstvach biaruć udzieł i ŭrad, i pradstaŭniki hramadzianskaj supolnaści», — skazała jana.

Laškova taksama paviedamiła, što ŭ žniŭni 2013 hoda Biełaruś paśpiachova prezientavała ŭ Kamitecie pa likvidacyi rasavaj dyskryminacyi dakład ab vykanańni pałažeńniaŭ Mižnarodnaj kanviencyi ab likvidacyi ŭsich form rasavaj dyskryminacyi. «Kamitet nazvaŭ «uražalnymi» inicyjatyvy Biełarusi, skiravanyja na likvidacyju rasavaj dyskryminacyi, u pryvatnaści na pavyšeńnie zaniataści i adukacyi členaŭ cyhanskich abščyn, — skazała pradstaŭnik MZS. — Členy kamiteta vysoka acanili mižnacyjanalnuju i mižkanfiesijnuju situacyju ŭ Biełarusi. Była adznačana vialikaja ŭvaha, jakaja nadajecca pytańniam zaachvočvańnia kulturnaj raznastajnaści, raźvićcia i zachavańnia kultur nacyjanalnych supolnaściaŭ Biełarusi».

• 0
• 0
• 0
• 0
• 0
• 0
• 0
• 0