Зорку сусветнага футбола падазраюць у згвалтаванні
Стакгольмская паліцыя разглядае справу сусветна вядомага французскага футбаліста Кіліяна Мбапэ, якога абвінавацілі ў згвалтаванні жанчыны падчас прыезду ў Швецыю, піша мясцовая газета Expressen.
15.10.2024 / 16:32
Кіліян Мбапэ. Фота: AP Photo/Manu Fernandez
Паводле інфармацыі выдання, меркаванае злачынства адбылося ў гатэлі Bank. Паліцыя ўжо канфіскавала з месца здарэння вопратку і ніжнюю бялізну ў якасці доказаў, а таксама запісы з камер.
Паведамляецца, што якраз тут на мінулым тыдні спыняўся футбаліст — яго таксама заўважылі ў адным з рэстаранаў і ў начным клубе.
Заяву на нападніка мадрыдскага «Рэала» падала жанчына, якая 12 кастрычніка звярнулася ў бальніцу па медыцынскую дапамогу для ахвяр сексуалізаванага гвалту. Само меркаванае згвалтаванне адбылося 10 кастрычніка.
Шведскія выданні ўдакладняюць, што Мбапэ прысвоены статус «абгрунтавана падазраваны» — самы нізкі ўзровень падазрэнняў.
Сам спартсмен называе навіны фэйкавымі і звязаў з'яўленне паведамлення з пачаткам судовых слуханняў у спрэчцы са сваім былым клубам — французскім «Пары-сэн-Жэрмэн».
Беларускі тэлеканал набыў правы на паказ матчаў пад эгідай УЕФА
БФФ прэзентавала новую форму нацыянальнай зборнай. Не абышлося без налёту сілавікоў