Што вядома пра самага пажылога палітвязня — 75-гадовага жыхара Хойнікаў, якому за каментары прысудзілі 3,5 года калоніі
Анатоля Кірэйчыка абвінавацілі ў тым, што ён «абразіў» больш за 100 суддзяў і сілавікоў. А вёў працэс Яўген Шаршнёў — суддзя, які не раз адпачываў у Еўрасаюзе.
25.09.2024 / 12:35
Анатоль Кірэйчык у 2017 годзе. Фота з ягонай старонкі Укантакце
Анатолю Кірэйчыку 75 гадоў. Ён пенсіянер, да арышту жыў у Хойніках.
Бацька Анатоля, Сяргей Кірэйчік — франтавік родам з вёскі Буда Хойніцкага раёна. Быў узнагароджаны медалямі і ордэнамі. Буда была адселеная пасля катастрофы ў Чарнобылі.
У Кірэйчыкаў вялікая, актыўная і дружная сям'я, якую ў Хойніках ведаюць. У сацсетках Анатоля шмат фота з розных мерапрыемстваў. Сам ён любіць майстраваць і троху падарожнічае па ваколіцах горада і іншых мясцінах у Беларусі.
На пенсіі Анатоль з жонкай шмат займаліся ўпрыгожаннем участка і нават у 2013 годзе атрымалі за гэта грамату ад мясцовага кіраўніцтва.
Анатоля Кірэйчыка судзілі 18 мая 2024 года па трох артыкулах Крымінальнага кодэкса — «паклёп» (арт. 188 КК), «абраза прадстаўніка ўлады» (арт. 369 КК), «абраза суддзі» (арт. 391 КК) і «незаконнае захоўванне боепрыпасаў» (ч. 2 арт. 295 КК).
Анатоля абвінавацілі ў тым, што ён «размяшчаў каментары пад здымкамі прадстаўнікоў улады, дзе абражаў, публічна прыніжаў і ганьбіў іх гонар і годнасць». Такім чынам ён «абразіў» больш за 100 чалавек. Таксама дома ў яго знайшлі боепрыпасы, але Анатоль сказаў, што проста калекцыянаваў іх — зброі ў яго не было.
Анатоль Кірэйчык. Фота з ягонай старонкі ў Аднакласніках
Пакаранне — тры з паловай гады калоніі і 100 базавых штрафу. Паведамляецца, што з яго таксама спагоняць маральную шкоду.
Судзіў яго Яўген Шаршнёў, які вынес не менш 20 палітычна матываваных прысудаў па крымінальных справах з 2020 года, сярод якіх, напрыклад, 5 гадоў для 65-гадовага Пятра Старацітарава, які мае шмат спадарожных хваробаў.
Адметна, што Шаршнёў любіць падарожнічаць па краінах Еўрасаюза — у яго старых сацсетках некалькі фота з падарожжаў у Іспанію ды Харватыю.
Яўген Шаршнёў. Фота з ягонай старонкі Укантакце (архіўная копія)
Таксама праваабаронцам вядома пра 76-гадовага Міхаіла Ляпейку, якому ў 2021 годзе прысудзілі прымусовае лячэнне за «абразу» Лукашэнкі. Ён быў прызнаны палітвязням, але яго далейшы лёс незразумелы — ён можа як знаходзіцца на лячэнні, так і ўжо вярнуцца дадому.
Самыя пажылыя палітвязні — хто яны і за што іх арыштавалі
Што адбылося з палітвязнем Пятром Старацітаравым, адным з самых багатых бізнэсменаў Гомельшчыны?
Як засцерагчы сябе ў VK, Facebook і «Аднакласніках» — падрабязны гайд