«50 hadzin u apošniaj dyktatury Jeŭropy». U Biełaruś pryjechali miehapapularnyja błohiery z ZŠA i Kanady — voś navošta
Papularnyja jutubiery z 9 miljonami padpisantaŭ naviedali Biełaruś i źniali błoh pra žyćcio ludziej u krainie. Ciarod zakranutych ŭ videa temaŭ — saŭdzieł Biełarusi ŭ vajnie suprać Ukrainy.
23.07.2024 / 00:26
Viadoŭcy jutub-šou Yes Theory Stafan Tejłar i Tomas Breh na fonie Kurhana Słavy ŭ Minskaj vobłaści. Fota: instahram staronka Stafana Tejłara
Kamanda miehapapularnaha jutub-kanała Yes Theory (kanadska-amierykanski treveł-błoh z 9 miljonami padpisantaŭ i 11 miljardami sumarnych prahladaŭ) praviała ŭ Biełarusi 50 hadzin. Videa vyjšła na kanale tolki ciapier, ale sami zdymki adbyvalisia jašče ŭ pačatku lipienia.
U Biełaruś adpravilisia viadoŭcy kanała Stafan Tejłar (błohier sa Šviecyi) i Tomas Breh (suzasnavalnik kanała Yes Theory i franka-kanadskaja telezorka). Ich vypusk atrymaŭ nazvu «50 hadzin u apošniaj dyktatury Jeŭropy» i ŭžo sabraŭ bolš za 600 tysiač prahladaŭ.
Voś što adbyvałsia ŭ samim vypusku.
«Kali ŭbačycie čałavieka va ŭniformie, trymajcie dystancyju»
Pa słovach aŭtaraŭ vypusku, jany trapili ŭ Biełaruś praź Litvu i praviali na miažy niekalki hadzin. Niekatoryja ludzi ŭ Litvie papiaredžvali błohieraŭ pra niebiaśpieku naviedvańnia Biełarusi, a taksama paraili trymać tam dystancyju ad «ludziej va ŭniformie».
U samoj krainie viadoŭcy pasprabavali naniać jakoha-niebudź hida ci anhła-ruskaha pierakładčyka, ale nichto nie pahadziŭsia.
Mužčyny pryznalisia, što choć i rehularna naviedvali «palityčna adčuvalnyja krainy», ale ŭ Biełarusi ŭpieršyniu sutyknulisia ź niehaścinnaj atmaśfieraj i poŭnaj adsutnaściu žadańnia hidaŭ dapamahać im u vyvučeńni asiarodździa.
U pačatku videa aŭtary taksama adznačyli, što vydatna viedajuć palityčnuju situacyju ŭ krainie i tamu dziela svajoj biaśpieki i biaśpieki vypadkovych biełarusaŭ u kadry nie buduć zavodzić vostryja temy dla razmovaŭ.
Tym nie mienš viadoŭcy za kadram zhadali, što Biełaruś dapamahaje Rasii ŭ vajnie suprać Ukrainy.
Adzin ź viadoŭcaŭ jutub-kanała Yes Theory Stafan Tejłar hladzić vystup Łukašenki na vajskovym paradzie 3 lipienia ŭ Minsku. Skrynšot ź videa jutub-kanała Yes Theory
Adnym ź mierapryjemstvaŭ, jakoje naviedali viadoŭcy Yes Theory, staŭ vajskovy parad 3 lipienia ŭ Minsku, jaki ładziŭsia sumiesna z rasijskimi sałdatami i technikaj.
Tejłar i Breh za kadram padkreślili, što ŭbačanaje vyklikała ŭ ich vielmi supiarečlivyja emocyi, asabliva na fonie vajny va Ukrainie.
«Kali my padyšli bližej da paradu, było ciažka apisać ubačanaje. Z adnaho boku, minčuki radavalisia, śviatkujučy niezaležnaść svajoj krainy. Ź inšaha boku, bačyć takuju demanstracyju sučasnaj vajennaj mašyny, uličvajučy ciapierašniuju vajnu ŭ rehijonie, było bolš čym tryvožna.
Heta vyklikała ŭ nas supiarečlivyja emocyi, a taksama stała napaminam pra toje, dzie my znachodzimsia. Pytać kaho-niebudź z prysutnych pra ich dumki my nie stali», — raspaviadajuć viadoŭcy Yes Theory.
Parad 3 lipienia vačyma viadoŭcaŭ Yes Theory. Skrynšot ź videa jutub-kanała Yes Theory
Parad 3 lipienia vačyma viadoŭcaŭ Yes Theory. Skrynšot ź videa jutub-kanała Yes Theory
Što było ŭ videa jašče?
Kamanda Yes Theory naviedała Kurhan Słavy, minskuju Stełu, Park Horkaha i pahulała nočču pa Vierchnim horadzie i Niamizie. Błohiery adznačyli, što Minsk pa architektury i najaŭnaści savieckich ściahoŭ nahadvaje SSSR bolš, čym Rasija.
Na nastupny dzień błohiery pajechali ź Minska na mižharodnim ciahniku ŭ vypadkovym kirunku i apynulisia ŭ vioscy Viazynka (Maładziečanski rajon Minskaj vobłaści). Asnoŭnaj metaj viadoŭcaŭ staŭ «pošuk biełaruskich babul» i aśviatleńnie ich pobytu.
Na ździŭleńnie błohieraŭ, miascovyja žychary sustrakali ich vietliva i ščyra, puskali ŭ svaje damy, častavali ich i raspaviadali svaje historyi.
Ź miascovymi žycharami vioscy Viazynka. Fota: instahram staronka Stafana Tejłara
Ź miascovymi žycharami vioscy Viazynka. Fota: instahram staronka Stafana Tejłara
Viadoŭcy Yes Theory pažadali biełarusam žyć svabodna i mirna, a taksama kab u rehijonie skončyłasia vajna.
«U Biełarusi my sustrelisia z samymi dobrymi ludźmi, jakich ja tolki sustrakaŭ. Tych, što lubiać ludziej, ale žyvuć u trochi inšych abstavinach, čym my. Žadaju, kab narod žyŭ svabodna, a taksama kab u susiedniaj Ukrainie skončyłasia vajna. Dy pieramoža mir», — zajaviŭ šviedski błohier Stafan Tejłar.
Usio videa całkam pra Biełaruś z kanała Yes Theory na anhlijskaj movie možna pahladzieć unizie.
Nahadajem, što ŭ čas vychadu videa adbyvajecca čarhovy surjozny mižnarodny skandał, źviazany sa śmiarotnym prysudam hramadzianinu Hiermanii Ryka Kryhieru «za teraryzm».
Padrabiaźniej pra situacyju možna pračytać voś tut.
Polski turyst pryjechaŭ u Biełaruś i raschvaliŭ jaje na ŭsie łady. Jon akazaŭsia nieanacystam
Ci šmat u śviecie zastałosia kiraŭnikoŭ dziaržaŭ, jakija pryjšli da ŭłady raniej za Łukašenku?