Žančynu-mera na Filipinach abvinavačvajuć u špijanažy na Kitaj
Detektyŭnaja historyja nabyvaje ŭsio bolšaje napružańnie. Abvinavačanaja źnikła. Raskazvajem padrabiaznaści.
20.07.2024 / 09:00
Elis Li Ho. Skryn videa: UNTVNewsandRescue / YouTube
Historyja Elis Li Ho (Alice Leal Guo) razyhryvajecca jak zajmalny detektyŭ. Žančyna ŭ 2022 hodzie pieramahła na vybarach mera horada Bamban (nasielnictva kala 80 tysiač) na poŭnačy ad stalicy Filipin Maniły ŭ pravincyi Tarłak.
Ničoha nie vyklikała tryvohu, ale ŭ sakaviku 2024 hoda joj vystavili adrazu niekalki abvinavačańniaŭ. Siarod ich vykarystańnie padroblenaha paśviedčańnia asoby, špijanaž na karyść Kitaja i prynaležnaść da sindykata filipinskaha afšornaha ihralnaha apieratara (POGO).
Usio pačałosia z taho, što śledčyja vyjavili, što Ho źjaŭlajecca ŭładalnicaj častki ziamli, na jakoj raźmieščana anłajn kazino sietki POGO (Philippine Offshore Gambling Operator — Filipinski afšorny apieratar azartnych hulniaŭ).
Nasamreč, za šyldaj kazino chavaŭsia centr anłajn-machlarstva. U sakaviku minułaha hoda ŭłady praviali rejd na abjekt i vyzvalili kala 700 rabotnikaŭ, u tym liku 202 hramadzian Kitaja i 73 inšych zamiežnikaŭ, jakich prymušali vydavać siabie za internet-paluboŭnikaŭ.
Złačynnyja hrupoŭki, jakija chavajucca pad POGO dajšli navat da budaŭnictva balnic, jakija prapanujuć kaśmietyčnyja apieracyi ŭciekačam, jakija žadajuć źmianić tvar.
Akramia vałodańnia častkaj ziamli, na jakoj znachodzicca kazino, na Ho byŭ zarehistravany viertalot i aŭtamabil Ford Expeditio, jaki znajšli na terytoryi adnoj z kampanij, što ŭvachodziać u POGO. Sama Ho śćviardžaje, što ŭsiu hetuju majomaść jana pradała da svajho abrańnia ŭ 2022 hodzie.
Što viadoma ab minułym žančyny
U mai 2024 hoda sprava Ho apynułasia ŭ centry ŭvahi padčas słuchańniaŭ u sienackaj kamisii pa spravach žančyn. Kiraŭnik kamisii źviarnuła ŭvahu, što imia Ho ŭspłyło tolki padčas vybaraŭ 2022 hoda. Heta vielmi niezvyčajna dla sielskich Filipin, dzie miascovyja čynoŭniki časta źviazany z palityčnymi dynastyjami.
Sam prezident Filipin Fierdynand Markas adznačyŭ, što viedaje bolšaść palitykaŭ u pravincyi Tarłak, ale nichto ź ich nie viedaje mera Bambana.
Akramia hetaha, ab Ho niama nijakich zapisaŭ ab naradžeńni ŭ balnicy abo školnych zapisaŭ na Filipinach.
Padčas rasśledavańnia ŭ sienacie Ho pryznałasia, što jaje paśviedčańnie ab naradžeńni było zarehistravanaje ŭ miascovych orhanach ułady tolki tady, kali joj było 17 hadoŭ.
Pavodle słoŭ žančyny, heta źviazana z tym, što jana naradziłasia doma, a nie ŭ balnicy. Žančyna śćviardžaje, što maci kinuła jaje, kali jana była jašče niemaŭlom, i jana vyrasła z baćkam na fiermie pa vyroščvańni śviniej.
Pa słovach Ho, jana navučałasia doma, ale pry hetym nie zmahła ŭzhadać nazvu arhanizacyi, jakaja zajmałasia jaje chatnim navučańniem, i nazvała tolki adnaho sa svaich nastaŭnikaŭ.
Ho skazała, što joj soramna być niezakonnanarodžanaj, i mienavita tamu jana bolšuju častku času pravodziła na siamiejnaj śvinafiermie i dapamahała baćku ŭ biznesie.
Nie taja, za kaho siabie vydaje
Paźniej vyśvietliłasia, što imiony baćki i maci, jakija paznačany ŭ paśviedčańni ab naradžeńni Ho, vydumanyja. Nasamreč takich ludziej nie isnuje.
Byli vyjaŭlenyja dakumienty, u adpaviednaści ź jakimi Elis Ho nasamreč moža być Ho Chua Pin, jakaja pryjechała na Filipiny 12 studzienia 2003 hoda, kali joj było 13 hadoŭ, razam z baćkami pa śpiecyjalnaj inviestarskaj vizie. Jaje sapraŭdnaja data naradžeńnia — 31 žniŭnia 1990 hoda.
Padčas dalejšaha rasśledavańnia byŭ znojdzieny dakumient z Nacyjanalnaha biuro rasśledavańniaŭ, jaki źmiaščaje fatahrafiju inšaj žančyny pa imieni Elis Li Ho. Žančyna maje takuju ž datu naradžeńnia, što zapisana ŭ paśviedčańni ab naradžeńni abvinavačanaj — 12 lipienia 1986 hoda.
Paźniej śledčyja vyśvietlili, što ŭ abvinavačanaj takija ž adbitki palcaŭ, jak i va ŭładalnika kitajskaha pašparta Ho Chua Pin.
10 lipieni kamitet sienata rasparadziŭsia vydać ordar na aryšt Elis Ho. Ale sama žančyna schavałasia.
Sprava nabyła šyroki rozhałas, žančynu stali abvinavačvać u špijanažy na Kitaj. Hetamu spryjaje i napružanaść u adnosinach pamiž Maniłaj i Piekinam z-za sprečnych terytoryj u Paŭdniova-Kitajskim mory.
«Čekist», vieteran ci špijon HUR? Mahčyma, u Polščy vykryli jašče adnaho ahienta biełaruskaha KDB
Za špijanaž aryštavali hramadzianku Litvy Alenu Ramanaŭskienie
U Polščy źnikła biełaruska, asudžanaja za špijanaž na karyść Rasii