Biełaruski dyzajnier šyje abutak u Ńju-Jorku, jaki nosić Madonna i Dženifier Łopes
Što za abutak?
08.07.2024 / 12:59
Barys Zubaraŭ. Skryn videa: golosameriki.com
Pra ŭradženca Minska Barysa Zubarava raskazali ŭ «Hołasie Amieryki».
Svaju majsterniu ŭ Ńju-Jorku mužčyna razam sa svaim kampańjonam adkryŭ u 1992 hodzie. Admietna, što pry viadzieńni biznesu Barys nie karystajecca ni kampjutaram, ni asabistym mabilnikam.
«Ja ceły dzień razmaŭlaju ź ludźmi. Chto choča mianie ŭbačyć, pryjdzie ŭ mahazin», — tłumačyć mužčyna i demanstruje skrutak papiery, na jakim jon viadzie zapisy.
Praŭda, u majsterni jość biznes-telefon, pa jakim ludzi mohuć daviedacca, ci adkryta majsternia. A pracy dyzajniera vykładaje ŭ instahram jaho partnior.
Zubaraŭ raskazvaje, što abutak, jaki jon šyŭ, možna ŭbačyć na hałoŭnym hieroi filma Party Monster, jakoha hraje Makalej Kałkin. Akramia hetaha, jaho nosiać Madonna, Ryjana, Dženifier Łopes, Kiejt Mos. Majstar stvaryŭ niekalki pratatypaŭ madelaŭ krasovak dla Nike, rabiŭ abutak dla pakazaŭ Balenciaga. A taksama — dla fotasiesij u modnych časopisaŭ.
Čaraviki na vysokaj płatformie na akcioru Makalei Kałkinie. Fota: eastvillageshoerepair_bk / instagram
«Ja viedaju pieršaha bojfrenda Madonny, jaje dzicia. Jany raniej byli maimi susiedziami. (…) Ja nikoli nie chadžu ni na jakija fešn-uik (tydni mody. — «NN»). Ja ich usie rablu adsiul — da Japonii, Anhlii, Francyi. Amierykanskija try razy na hod. (…) Kali ja jašče byŭ dziciem i vučyŭsia ŭ mastackaj škole, ja zaŭsiody rabiŭ svaje tvory ŭ supraćlehły bok ad taho, što možna», — raskazvaje Zubaraŭ.
Majstar chvalicca, što zarehistravaŭ patent na płatformu z rehulavanaj vyšynioj (Adjustable Height Platform) pad markaj ZUBO.
Płatforma z rehulavanaj vyšynioj pad markaj ZUBO. Fota: eastvillageshoerepair_bk / instagram
«Jaje možna zrabić luboha koleru, dyzajnu, vyšyni. Možna pačać z adnoj cali i dajści da šaści-vaśmi. U toj ža čas heta kala sta dyzajnaŭ słajoŭ. Vy možacie ŭziać svoj čaravik i ŭstavić u płatformu», — tłumačyć Zubaraŭ.
«My rabili heta tady, kali heta było nie modna. U nas svaja moda», — adznačaje majstar i zhadvaje, što kali jon pačynaŭ svaju pracu nad abutkam z vysokaj płatformaj, ludzi śmiajalisia i nie razumieli.
«Ale mianie nikoli nie cikaviła, što kamu padabajecca. Ja rablu toje, što padabajecca mnie. A kali ludziam heta padabajecca, heta značyć, što ja rablu niešta pravilna», — dadaje Zubaraŭ.
U internecie pa zapycie «East Village Shoe Repair» možna znajści vialikuju kolkaść publikacyj pra majsterniu hetaha ŭradženca Minska. Na akaŭnt u instahramie padpisana 13,6 tysiačy čałaviek.
Biełarus adkryŭ u Varšavie punkt ź dziŭnym fastfudam
Majstar z Homiela, jaki zrabiŭ załatuju hitaru dla Prynsa