Biełaruskaja aktrysa, jakaja syhrała palitźniavolenuju Kaciarynu Andrejevu, adčyniła kniharniu va Urocłavie
Biełaruskaja aktrysa Alaksandra Vajciachovič syhrała šmat dobrych rolaŭ. Adna z apošnich — rola žurnalistki «Biełsata» Kaciaryny Andrejevaj u filmie režysiorki Mary Tamkovič. A niadaŭna Alaksandra adčyniła kniharniu va Urocłavie.
05.07.2024 / 09:12
Alaksandra Vajciachovič z mužam. Tut i dalej fota ź jaje archivu
Alaksandra kaža, što knihi — heta adno z samych vialikich jaje zachapleńniaŭ paśla akciorstva.
— Kniharni mianie zaŭsiody vabili — vielmi padabajecca pach novych knih. Ja maryła pra ŭłasnuju kramu daŭno, ale heta zdavałasia čymści nierealnym.
Čatyry hady tamu Alaksandra z mužam i synami pierajechała va Urocłaŭ. U niejki momant jana źviarnuła ŭvahu na toje, jak ciažka znajści dzieciam knižku na ruskaj movie. A popyt na ich vialiki, bo ŭ Polščy šmat i biełarusaŭ, i ŭkraincaŭ, i rasijan. Biełaruskamoŭnyja knihi nabyć jašče bolš składana.
Alaksandra adznačaje, što dumała zrabić biełaruski kutok va Urocłavie — kab biełarusam było dzie sabracca razam, pravieści niejkaje mierapryjemstva, nabyć biełaruskija knihi.
— Nasamreč, mary mahli b tak i zastacca tolki marami, bo hrošaj na realizacyju idei nie było. Ale ja raptam ubačyła cudoŭnaje pamiaškańnie pa adrasie, jaki zdaŭsia mnie idealnym — vulica Teatralnaja. Budynak litaralna nasuprać lalečnaha teatra.
Nie doŭha dumajučy, Alaksandra paviedamiła ŭ instahramie, što źbiraje danaty na pieršy ŭniosak — tak zvanuju kaucyju (zakład). U jaje atrymałasia sabrać nieabchodnuju sumu.
— Na ŭsich astatnich etapach mnie dapamoh muž. Tamu što kaucyja — heta, viadoma, kropla ŭ mory. Treba było zakuplać knihi, pradumvać dyzajn, nabyvać meblu.
Kniharniu Alaksandra nazvała NookBook. Nazva nievypadkovaja: u aktrysy jość kinaškoła Nook (u pierakładzie heta «ŭtulny kutok»), tamu jana vyrašyła raźvivać brend dalej.
— Ja ničoha nie viedała pra toje, jak handlavać knihami, tamu treba było šmat čaho vyvučyć. Taksama my chacieli, kab u kniharni była kava — pryjšłosia raźbiracca z sanitarnymi normami. Ale ŭsio atrymałasia.
Ad pačatku pracy nad idejaj da adkryćcia kniharni nie prajšło i miesiaca. Krama ŭžo paŭtara tydni pracuje.
— U nas jość palička z knihami na biełaruskaj movie, ale, kaniešnie, płanujem jaje pašyrać. Baču popyt na kłasiku biełaruskaj litaratury (ja jaje taksama vielmi lublu), ale, na žal, pryvieźci jaje davoli składana. Zvyčajna vydaviectvy prapanoŭvajuć abo sučasnych biełaruskich aŭtaraŭ, abo tvory zamiežnych piśmieńnikaŭ, pierakładzienyja na biełaruskuju. Pakul što siarod biełaruskamoŭnych knih bolš za ŭsio tvoraŭ sučasnych aŭtaraŭ dla dzietak.
A jašče Alaksandra prydumała cikavy servis — arendu knih. Heta prapanova dla tych, chto ŭvieś čas na čamadanach i nie choča abrastać mnostvam rečaŭ.
— U kniharni ja realizavała jašče adnu maru: pačała malavać paštoŭki i pisać na ich pryhožyja vyrazy. A taksama ŭ NookBook možna nabyć chendmejd talenavitych biełaruskich majstroŭ.
Płanujecca, što na bazie kniharni buduć prachodzić roznyja mierapryjemstvy, pačnie pracavać knižny kłub, siabry jakoha buduć abmiarkoŭvać pračytanaje.
— Usio adbyvajecca tak, jak ja maryła. Zachodziać ludzi z vulicy, my šmat razmaŭlajem ź imi. Časta palaki va ŭzroście raskazvajuć, što ich babuli i dziaduli taksama ź Biełarusi. Mnie padabajecca słuchać čužyja historyi.
U Varšavie zdymajuć mastacki film pavodle historyi kachańnia Kaciaryny Andrejevaj i Ihara Iljaša
10 traŭnia startuje prodaž novaha ramana Bachareviča