Paplečnika Karač, deputata Viarchoŭnaha Savieta SSSR Pietrušenku buduć sudzić za «ekstremizm»
Tałačynski RAUS zavioŭ administracyjnuju spravu na stalinista z haradskoha pasiołka Kochanava Tałačynskaha rajona, adstaŭnoha pałkoŭnika Mikałaja Pietrušenku. Pra heta paviedamiła prarasijskaja aktyvistka ź Viciebska Elvira Mirsalimava, jakaja raniej taksama, niahledziačy na svaje zusim nie demakratyčnyja i nie nacyjanalnyja pohlady, trapiła ŭ tyja ž žorny.
23.04.2024 / 21:41
Mikałaj Pietrušenka
Pavodle apalnaj stalinistki, Mikałaj Pietrušenka ŭ asabistaj razmovie ź joj paviedamiŭ, što administracyjnuju spravu suprać jaho pačali, rasśledavali i pieradali ŭ sud Tałačynskaha rajona. Razhlad jaje pryznačany na 25 krasavika ŭ 10.00.
Pietrušenka, kali vieryć Mirsalimavaj, napoŭnieny aptymizmam: maŭlaŭ, «sprava ŭ sudzie rassyplecca jak minimum pa fakcie niedakazanaści abo spynienaja za adsutnaściu pravaparušeńnia».
Što mienavita jamu zakidajuć, pakul nieviadoma.
Mikałaj Pietrušenka — asoba viadomaja, i nie tolki ŭ Biełarusi. Na ŭvieś Saviecki Sajuz jon prasłaviŭsia ŭ kancy 1980-ch — pačatku 1990-ch hadoŭ, kali hety ŭradženiec Rečyckaha rajona byŭ narodnym deputatam SSSR, prytym vielmi publična aktyŭnym. Praŭda, vybiraŭsia jon nie ad Biełarusi, a ad Kazachskaj SSR, bo ŭ toj čas słužyŭ tam u savieckim vojsku, dasłužyŭšysia da zvańnia pałkoŭnika.
Pietrušenka byŭ u toj čas adnym z tvaraŭ antypierabudovačnych siłaŭ, pradstaŭniki jakich z trybuny Źjezda narodnych deputataŭ rezka krytykavali tahačasnaha kiraŭnika savieckaj dziaržavy Michaiła Harbačova i jaho atačeńnie z kansiervatyŭnych pazicyj, vystupali suprać navat tych vielmi niepaśladoŭnych i pałavinčatych reformaŭ, jakija Harbačoŭ sprabavaŭ pravodzić. Častyja i pałymianyja vystupleńni deputata ŭ vajskovaj formie ad Kazachstana, pramaŭlanyja z mocnym biełaruskim akcentam, stali adnym sa znakaŭ taho času.
Paśla fijaska palityčnych siłaŭ, jakija horača padtrymlivaŭ Pietrušenka, što mieła vynikam raspad Savieckaha Sajuza, saviecki pałkoŭnik nie zastaŭsia ładzić novaje žyćcio ŭ kazachstanskich stepach i nie atabaryŭsia na rasijskich prastorach. Paśla zvalnieńnia z vojska jon viarnuŭsia na radzimu ŭ Biełaruś. Pasialiŭšysia ŭ Kochanavie pad Tałačynom, adstaŭny pałkoŭnik zaniaŭsia fiermierstvam, ale nie pakidaŭ i hramadska-palityčnych spraŭ.
Na dziva, doŭhi čas Pietrušenka, pry ŭsioj adyjoznaści svaich pohladaŭ, nie znachodziŭ ahulnaj movy z režymam Łukašenki i šmat hadoŭ źjaŭlaŭsia siabram apazicyjnaj kamunistyčnaj partyi na čale ź Siarhiejem Kalakinym (paśla partyja «Spraviadlivy śviet»). Taksama jon supracoŭničaŭ z arhanizacyjaj «Naš dom», zasnavanaj Volhaj Karač. Aktyŭna publikavaŭsia ŭ miascovaj presie, kanfliktavaŭ ź miascovymi ŭładami, časam navat pryciahvaŭsia da administracyjnaj i navat kryminalnaj adkaznaści. Ale ŭ sacsietkach i inšych publičnych vystupleńniach praciahvaŭ baranić nie tolki kamunistyčnuju ideałohiju, ale i praktyku savieckich uładaŭ, u tym liku ździejśnienaje imi ŭ časy stalinizmu.
Zrešty, padziei 2020 hoda, zdavałasia b, kančatkova prymiryli Pietrušenku i ź biełaruskim režymam. Tady jahonaje proźvišča znajšłosia ŭ źlitych bazach tych, chto danosiŭ siłavikam na mirnych pratestoŭcaŭ. Ale, jak vyhladaje, zaličvać heta jamu nie śpiašajucca.
Prarasijskaja aktyvistka Mirsalimava atrymała hihancki štraf — za «adzinočny pikiet z BČB»
«Nazyvali palityčnaj prastytutkaj». Stalinistka Mirsalimava raskazała pra dva dni za kratami
Chto takaja Elvira Mirsalimava, jakuju ŭžo navat łukašenkaŭcy vinavaciać u biełarusafobstvie