Kolki kalijnych uhnajeńniaŭ letaś vyrabiła i ekspartavała Biełaruś
Voś jakija acenki dajuć ahladalniki rynku i asnoŭnyja kankurenty «Biełaruśkalija».
02.02.2024 / 10:29
Vytvorčaść kalijnych uhnajeńniaŭ u Biełarusi za 2023 hod skaraciłasia da 3,8 młn ton suprać 4 młn ton u 2022-m. Takija danyja źmiaščaje ahlad minieralnych syravinnych tavaraŭ, padrychtavany Nacyjanalnym infarmacyjnym centram karysnych vykapniaŭ ZŠA (USGS).
Na spravazdaču źviarnuŭ uvahu Office Life.
U joj havorycca, što Biełaruś pierajšła na ekspart kaliju pa čyhuncy ŭ Kitaj i z partoŭ Rasii. Pry hetym pastaŭki na źniešnija rynki zastavalisia značna nižejšyja za ŭzrovień da 2022 hoda, kali kraina była adnym ź viadučych eksparcioraŭ.
Suśvietnaja vytvorčaść kalijnych uhnajeńniaŭ letaś źniziłasia praz toje, što vytvorcy skaracili zapasy na fonie niavyznačanaści pastavak praz ekanamičnyja sankcyi ŭ dačynieńni da Biełarusi i Rasii, što pryviało da rostu cen u pieršaj pałovie 2022 hoda.
Pavodle acenak USGS, suśvietnyja ceny na kalijnyja ŭhnajeńni pačali padać u druhoj pałovie 2022 hoda. Tady zapasy pavialičylisia, i hetaja tendencyja zachavałasia i ŭ 2023 hodzie.
Vytvorčaść u Kanadzie źniziłasia zbolšaha z-za zabastoŭki dokieraŭ u lipieni 2023 hoda, jakaja pryviała da skaračeńnia pastavak kalijnych uhnajeńniaŭ z porta Vankuvier. Heta pryviało da časovaha zakryćcia niekatorych šacht u Kanadzie. Zdabyča na ich adnaviłasia paśla spynieńnia zabastoŭki ŭ žniŭni.
Suśvietnaje spažyvańnie kaliju ŭ składzie ŭhnajeńniaŭ vyrasła z 35,7 młn ton u 2022 hodzie da 37,1 młn ton u 2023-m. Azija i Paŭdniovaja Amieryka zastajucca viadučymi rehijonami pa spažyvańni kaliju.
Pavodle prahnozaŭ, suśvietnyja štohadovyja mahutnaści pa vytvorčaści kalijnych uhnajeńniaŭ vyrastuć z 64,3 młn ton kaliju (K2O) u 2023 hodzie prykładna da 67,6 młn ton da 2026-ha. Bolšaja častka pryrostu budzie zabiaśpiečana za košt novych rudnikoŭ i prajektaŭ pašyreńnia ŭ Łaosie i Rasii. Novyja rudniki ŭ Biełarusi, Brazilii, Kanadzie, Efiopii, Maroka, Ispanii i ZŠA płanavałasia ŭvieści ŭ ekspłuatacyju paśla 2026 hoda.
Pavodle acenak, suśvietnyja zapasy kaliju składajuć kala 250 młrd ton. Abjom hetych resursaŭ, u pryvatnaści zapasy Kitaja, Łaosa i Rasii, USGS pierahledzieŭ na asnovie spravazdač urada.
Raniej Nacyjanalny infarmacyjny centr karysnych vykapniaŭ ZŠA paviedamlaŭ, što ŭ 2022 hodzie zdabyča kaliju ŭ Biełarusi skaraciłasia na 60%, da 3 młn ton. Ciapier acenka 2022 hoda pavialičanaja da 4 młn ton.
Kankurenty «Biełaruśkalija» — kanadskaja Nutrien i amierykanskaja Mosaic Company — ličać, što pastaŭki biełaruskaha kaliju na suśvietny rynak u 2023 hodzie mahli skłaści 5-6 młn ton.
Pavodle prahnozu biełaruskaha ŭrada, Biełaruś da 2025 hoda pavinna vyrablać 16-17 młn ton kalijnych uhnajeńniaŭ u hod.
Čytajcie taksama:
Kiraŭniki «Biełaruśkalija» pajšli na vybary i apublikavali dekłaracyi. Jakija ŭ ich zarobki?
Trendy ŭ biełaruskaj ekanomicy, jakija buduć u 2024 hodzie
«Biełaruśkalij» choča adsudzić u Litvy miljard dalaraŭ za zabaronu pieravozki kalijnych uhnajeńniaŭ
Alejnik: Turcyja hatova sadziejničać źniaćciu sankcyj suprać biełaruskich kalijnych uhnajeńniaŭ
Suśvietnyja ceny na kalijnyja ŭhnajeńni viarnulisia na pieradvajenny ŭzrovień