U ZŠA zaćvierdzili navatarskija tabletki ad paślarodavaj depresii
Raźbirajem, čym adroźnivajecca «bebi-bluz» ad kliničnaj paślarodavaj depresii (PRD), jak minimizavać pryhniečany stan paśla naradžeńnia dziciaci i jak pracuje novy preparat suprać PRD.
27.08.2023 / 22:56
Fota: vecteezy
Dla bolšaści maładych baćkoŭ viartańnie dadomu ź dziciem, napeŭna, samaje vialikaje ŭzrušeńnie ŭ žyćci. Dzieci — heta radaść, ale i ciažkaja nahruzka. Biassonnyja nočy, častaje karmleńnie i dohlad za biezdapamožnaj istotaj, jakaja całkam zaležyć ad vas, mohuć być vielmi źniasilvajučymi. Tym nie mienš z časam, niekatoraj praktykaj i, kali pašancuje, padtrymkaj siamji i siabroŭ mnohija baćki ŭ vyniku prystasoŭvajucca da novych rolaŭ i pierabudoŭvajuć svajo žyćcio naležnym čynam.
Ale niekatoryja maci akazvajucca ŭ stanie, jaki daloka pieraŭzychodzić typovy «dziciačy bluz» — pryhniečany stan duchu, charakterny (pa roznych danych) dla 40—80% maładych maci. Bebi-bluz vyklikaje stomlenaść, razdražnialnaść i ahulnaje pačućcio pryhniečanaści na praciahu pieršych niekalkich tydniaŭ paśla rodaŭ.
U bolšaści vypadkaŭ bebi-bluz uźnikaje praz try-piać dzion paśla rodaŭ i doŭžycca ad dvuch dzion da dvuch tydniaŭ. Simptomy paślarodavaj pryhniečanaści žančyna moža adčuvać ad niekalkich chvilin da pary hadzin na dzień. Kali praz dva tydni prajavy bebi-bluzu nie tolki nie źnikli, ale i pahoršali, ličycca, što pačałasia paślarodavaja depresija, jakaja, darečy, moža ŭźniknuć u maci ŭ luby momant na praciahu ažno dvuch hadoŭ paśla naradžeńnia dziciaci.
Pa danych Centra kantrolu i prafiłaktyki zachvorvańniaŭ ZŠA, u kožnaj vośmaj žančyny raźvivajecca paślarodavaja depresija (PRD). I kali PRD dosyć mocnaja, jana moža pryvieści navat da śmierci: pavodle vynikaŭ, apublikavanych u 2022 hodzie, na samahubstva siarod maładych maci prypadaje 20% usich vypadkaŭ maciarynskich śmierciaŭ.
Ciapier Upraŭleńnie kantrolu za praduktami i lekami ZŠA (FDA) zaćvierdziła novy preparat, jaki moža dapamahčy žančynam. Heta tabletka, jakuju treba prymać raz na dzień dva tydni. Zuranałon (zuranolone), jaki trapić na pryłaŭki pryblizna z kastryčnika 2023 hoda i budzie pradavacca pad markaj Zurzuvae, budzie pieršym pieraralnym mietadam lačeńnia PRD. Popular Mechanics piša pra toje, što treba viedać nakont novaha preparatu.
Pravilny dyjahnaz
Pa-pieršaje, treba razumieć, što takoje kliničnaja depresija ŭ cełym. Hety stan prymušaje čałavieka adčuvać niekatoryja abo ŭsie z nastupnych simptomaŭ: strata matyvacyi, bieznadziejnaść, mocnaja stomlenaść i surjoznyja źmieny apietytu i snu (biessań ci, naadvarot, zašmat snu). Tamu važna paćvierdzić aficyjny dyjahnaz kliničnaj paślarodavaj depresii ŭ lekara, kab dakładna viedać, ci jość jana ŭ vas. Stan zdajecca źniasilvajučym, u toj čas jak vyšej zhadany dziciačy bluz (što ŭźnikaje, napeŭna, praz harmanalnyja źmieny i, jak vynik, źmieny ŭ chimii mozha) — časovaje adčuvańnie pierapadaŭ nastroju. Heta ŭsio ž nie pieraškadžaje čałavieku znachodzić radaść i spraŭlacca sa štodzionnymi abaviazkami.
Jak pieramahčy paślarodavuju depresiju
U toj čas jak doktar moža vyznačyć, što ŭ niekatorych vypadkach patrebnyja leki, niekalki alternatyŭnych stratehij dapamohuć minimizavać ci ŭvohule paźbiehnuć PRD. Psichičnaje zdaroŭje jak padčas ciažarnaści, tak i paśla naradžeńnia dziciaci patrabuje šmatuzroŭnievaha padychodu.
Naprykład, dapamoha, jakuju siamja i navakolnyja mohuć akazać padčas ciažarnaści i ŭ pieršy, samy ciažki, hod, značna ŭmacujuć psichičny dabrabyt maładoj maci (i baćki). Pry nieabchodnaści kahnityŭnaja pavodzinskaja terapija i hutarkovaja terapija ŭ mnohich vypadkach źjaŭlajucca pravieranymi mietadami pamianšeńnia i navat praduchileńnia PRD. Tamu znajdzicie dobraha surazmoŭcu ŭ asobie siabroŭki, partniora, mamy ci kahości, kamu vy ciapier bolš za ŭsio daviarajecie i chto nie budzie asudžać ci abiasceńvać vašy adčuvańni.
Taksama varta adrehulavać racyjon. Padčas naładžvańnia łaktacyi mnohija žančyny nalahajuć na prostyja vuhlavody, jakija robiać pierapady nastroju bolš adčuvalnymi. Tamu kłasičnyja parady paźbiahać mučnoha i pić bolš vady (abiazvodžvańnie paharšaje pryhniečany stan) spraviadlivyja ŭ luboj situacyi. Leki varta razhladać u krajnim vypadku, kali nielha dapamahčy inšymi sposabami.
Taksama śpiecyjalisty rajać časam špacyravać u adzinocie, kab dać sabie i svajmu arhanizmu pieraklučycca i adpačyć ad adčuvańnia dnia surka. I, viadoma, nie treba imknucca zrabić usio idealna: vy žyviacie nie ŭ knizie z paradami, a ŭ realnym śviecie.
Jak Zurzuvae spraŭlajecca z paślarodavaj depresijaj
Žančyny prymajuć tabletki adzin raz na dzień na praciahu 14 dzion razam z tłustaj ježaj. Padčas daśledavańniaŭ kampanii niekatorym pacyjentkam spatrebiłasia ŭsiaho try dni, pierš čym jany adčuli siabie lepš.
Vytvorcy praviali dva randamizavanyja daśledavańni z udziełam 196 žančyn. Usie jany mieli simptomy ŭ trecim trymiestry abo na praciahu čatyroch tydniaŭ paśla rodaŭ. Pałova žančyn prymała Zurzuvae, a inšaja pałova atrymlivała płaceba. 170 žančyn prajšli padvojnyja ślapyja vyprabavańni, što aznačaje, što ni ŭdzielniki, ni daśledčyki nie viedali, u jakich žančyn byŭ sapraŭdny preparat. Da kanca vyprabavańniaŭ žančyny, jakija prymali Zurzuvae, pakazali «značnaje palapšeńnie simptomaŭ u paraŭnańni z hrupami płaceba», havorycca ŭ pres-relizie. Stanoŭčy efiekt praciahvaŭsia 45 dzion, paśla čaho daśledavańnie było skončana.
U adroźnieńnie ad niekatorych inšych antydepresantaŭ, naprykład, jak fłuaksiecyn (pradajecca pad handlovaj markaj «Prozak»), zuranałon nie pavyšaje ŭzroŭniu sierataninu — niejramiedyjataru, jaki dziejničaje jak harmon i pieradaje paviedamleńni ad mozha, rehulujučy šerah funkcyj arhanizma, uklučajučy tempieraturu, son i hoład. Sieratanin taksama ŭpłyvaje na nastroj, a nizki jaho ŭzrovień u mozhu niepasredna źviazany z depresijaj.
Sierataninavym antydepresantam patrabujecca značna bolš času, kab pačać dziejničać, ale zuranałon dziejničaje niepasredna na niervovyja kletki mozha. Viadomy jak niejraaktyŭny steroid, zuranałon imituje formu prahiesteronu, jaki naturalna vypracoŭvajecca mozham i ŭzrovień jakoha značna padvyšajecca padčas ciažarnaści. Kali hety śpiecyfičny prahiesteron (jaki nazyvajecca dakładna ałaprehnanałonam (allopregnanolone) rezka padaje, jak heta adbyvajecca paśla rodaŭ, mozhu ciažej źnizić uzrovień tryvohi i dać rady stresu. U niekatorych žančyn heta spryjaje ryzycy ŭźniknieńnia PRD. Pryjom zuranałonu pieraralna moža dapoŭnić adsutny ałaprehnanałon i dapamahčy mozhu kiravać vysokim uzroŭniem stresu. Adnak dakładny miechanizm, z dapamohaj jakoha hetyja niejraaktyŭnyja steroidy ŭpłyvajuć na nastroj, nie da kanca zrazumieły.
Što treba ŭličvać, pierš čym prymać Zurzuvae
Niahledziačy na svaju zručnaść, Zurzuvae pryznačajuć z ahavorkami, tamu što ŭ hetym lačeńni ŭsio jašče jość niekatoryja nieviadomyja rečy.
Žančynam, jakija kormiać hrudźmi, rekamiendujecca zrabić paŭzu padčas pryjomu preparatu, bo navukoŭcy pakul nie viedajuć, ci moža steroid traplać u hrudnoje małako. Taksama mohuć być pabočnyja efiekty, u tym liku sanlivaść, hałavakružeńnie, zabłytanaść śviadomaści, dyjareja, stomlenaść, katar i infiekcyi močavydzialalnych šlachoŭ. FDA taksama papiaredžvaje, što vykarystańnie Zurzuvae moža vyklikać suicydalnyja dumki i pavodziny i što preparat moža nanieści škodu dziciaci.
Žančynam padčas jaho prymianieńnia i na praciahu tydnia paśla pryjomu rekamiendujecca vykarystoŭvać efiektyŭnyja srodki kantracepcyi. Pry hetym daśledavańnie ŭsio ž nie pakazała suicydalnych pavodzin siarod žančyn, jakija prymali Zurzuvae, a taksama strat prytomnaści abo simptomaŭ admieny.
Tabletki taksama nielha źmiešvać z ałkaholem abo inšymi preparatami, jakija vyklikajuć depresiŭny efiekt. Instrukcyja papiaredžvaje taksama, što Zurzuvae moža paŭpłyvać na zdolnaść čałavieka kiravać aŭtamabilem i vykonvać inšyja patencyjna niebiaśpiečnyja vidy dziejnaści. A žančynam, jakija ŭžo dasiahnuli dobrych vynikaŭ z dapamohaj inšaha antydepresantu, mahčyma, lepš prytrymlivacca jaho.
Košt preparatu pakul nie abvieščany vytvorcam.
Čytajcie taksama:
Jak miljardy mikraarhanizmaŭ u kišečniku mohuć umacavać vaša psichičnaje zdaroŭje
Niejrabijołah prapanavaŭ piać prostych pryjomaŭ, jakija dapamohuć źnizić ryzyku depresii
Navukoŭcy atrymali pieršy pramy dokaz suviazi pamiž nizkim uzroŭniem sierataninu i depresijaj