На АНТ расказалі пра новых затрыманых па абвінавачаннях у «тэрактах» — некаторых арыштавалі сем'ямі
На АНТ выпусцілі фільм пра «сетку СБУ» ў Беларусі. У ім расказалі пра некалькі спраў, у тым ліку пра дыверсію ў Мачулішчах. З яго сталі вядомы новыя імёны затрыманых і абвінавачанні, якія ім выстаўляюцца.
05.04.2023 / 00:09
Дзмітрый Маставы. Скрыншот відэа АНТ
Прадпрымальнік, які, па версіі прапаганды, узяў Швеца на працу для прыкрыцця
Некаторыя з дэталяў агучваліся дзяржТБ раней.
Паводле сюжэту прапаганды, украінец Мікалай Швец, затрыманы за дыверсію ў Мачулішчах. быў знаёмы з прадстаўніком СБУ і быў навучаны кіраваць дронамі.
Спачатку яго нібыта хацелі паслаць у Расію, а пасля план змяніўся — за паўмесяца да дыверсіі сказалі, што ехаць трэба будзе на аэрадром у Мачулішчах.
Швец, сцвярджае прапаганда, меў псеўданім «Гаспар».
З Кіева мужчына выязджаў на цягніку ў Варшаву, а пасля паехаў у Лодзь да Віктара Якуціка. Якуцік, па версіі прапаганды, пазней перадаваў дроны.
Швец спрабаваў уехаць у Беларусь двойчы. Першы раз развярнулі — ён паказаў спачатку ўнутраны расійскі пашпарт, пасля ўкраінскі, а пасля нібы прасіў не ставіць адзнаку аб перасячэнні мяжы («бо бяжыць ад вайны і не хоча, каб па вяртанні былі праблемы»), пасля чаго яму адмовілі ва ўездзе. Другі раз ён заехаў паспяхова праз Расію, на рэйсавым аўтобусе з Пскова.
У пачатку лютага Швец атрымлівае дроны, адзін Якуцік перадае праз «Яндэкс. Дастаўку», другі праз свайго знаёмага — Дзяніса Сакалова. Сакалоў, як сцвярджаюць у сюжэце, раней уладкаваў Швеца на працу ў сваю праектную кампанію ў Мінску — архітэктарам-тэхнікам на палову стаўкі.
Дзяніс Сакалоў. Скрыншот відэа АНТ
Кватэру для Швеца нібы шукалі яшчэ мінулай восенню. Знайшлі праз Андрэя Сцяпурку. Той знайшоў кватэру ў знаёмай бацькоў — Ларысы Кучынскай.
Ларыса Кучынская. Скрыншот відэа АНТ
Як вынікае з сюжэта, затрымалі і Кучынскую, і бацькоў Сцяпуркі. Іх прапаганда абвінавачвае ў здзяйсненні акту тэрарызму.
Айцішнік, які нібы вёў трансляцыю з аэрадрома
У сюжэце прагучала яшчэ адно новае імя затрыманага — Дзмітрый Маставы. Айцішнік, жыхар Сенніцы. Паводле АНТ, ён прапанаваў «Беларускаму Гаюну» зліваць інфармацыю пра аэрадром. Дзмітрый нібы наладзіў трансляцыю з камп'ютара, якая два тыдні ішла без перапынку.
Дзмітрый Маставы. Скрыншот відэа АНТ
Пазней, каб палепшыць якасць трансляцыі, ён прапанаваў павесіць дадатковую камеру на дом, сцвярджае прапаганда.
У акце тэрарызму абвінавачваюць таксама друкара Алега Сычова. Пра яго паведамлялася раней: ён быў гаспадаром катэджа ў вёсцы Чарцяж. Яму нібыта напісаў Сяргей Лапароў, муж псіхатэрапэўткі Яўгеніі Тычыцкай, з просьбай пасяліць у сябе чалавека. Каго — не ўдакладняў.
Алег Сычоў. Скрыншот відэа АНТ
Гродна. «Планаваў узарваць нафтабазу»
У сюжэце распавялі таксама пра іншых затрыманых з «сеткі СБУ» — але па іншым кейсе, у Гродне (не тым, дзе быў «тэрарыст у парыку»).
Адзін з іх — расіянін Андрэй Кулікоў. Ён нібыта здымаў на фота аб'екты ў Гродне — ваенкамат Гродна і Гродзенскага раёна, вайсковую часць 41780, нафтабазу раёна Аульс, нафтабазу раёна Дзевятоўка, генконсульства РФ.
Расказваюць, што год таму Кулікоў збег ад прызыву, а трапіць у Гродна яму дапамог расійскі апазіцыянер Данііл Крынары (Кавалеўскі). У снежні Крынары затрымалі ў Гродне і экстрадзіравалі ў Расію.
Кулікоў цяпер у СІЗА, яго абвінавачваюць па ч. 2 арт. 289 (акт тэрарызму) і ч. 2 арт. 126 (акт міжнароднага тэрарызму).
Другі фігурант — беларус Вадзім Пацэнка. На кадрах допыту ён кажа, што яму нібы паставілі задачу ўзарваць нафтабазу з дапамогай дрона і выбухоўкі.
Вадзім Пацэнка. Скрыншот відэа АНТ
Пацэнка таксама ў СІЗА, яму інкрымінуюць ч. 2 арт 289 (акт тэраразыму).
Згодна з заявай намесніка начальніка следчага ўпраўлення КДБ Канстанціна Бычака, усім фігурантам крымінальнай справы (не зразумела, размова толькі пра Мачулішчы ці пра кейс у Гродне таксама) інкрымінуецца ч. 3 арт. 289 (акт тэрарызму арганізаванай групай) і арт. 356 (здрада дзяржаве).
Затрымана больш за 20 чалавек.
«Сетка СБУ», паказаная ў сюжэце прапаганды. Скрыншот відэа АНТ