Makron tajemna źniaŭ darahi hadzińnik padčas intervju ab piensijnaj reformie. Jaho abvinavacili ŭ kryvadušnaści VIDEA
Prezident Francyi Emanuel Makron apynuŭsia pad ahniom krytyki paśla taho, jak padčas teleintervju ab piensijnaj reformie, jakaja vyklikała masavyja pratesty ŭ krainie, źniaŭ pad stałom darahi hadzińnik, piša Bi-bi-si.
25.03.2023 / 10:40
Paśla vychadu intervju ŭ efir pres-słužba Makrona zajaviła, što prezident Francyi źniaŭ hadzińnik, bo jon hučna ŭdaryŭ pa stale.
U Francyi ŭ razhary pratesty z nahody prezidenckaj inicyjatyvy ab pavyšeńni piensijnaha ŭzrostu. Makron choča pavysić jaho z 62-ch da 64-ch hadoŭ.
Intervju brali ŭ sieradu — Makronu zadali pytańnie, paśla čaho jon rezka apuściŭ ruki na stoł, i pačuŭsia huk ad udaru hadzińnika pa pavierchni. Potym Makron apuściŭ ruki pad stoł, nie pierastajučy havaryć, a kali telehledačy znoŭ ubačyli ruki, hadzińnika ŭžo nie było.
Žest Makrona pryciahnuŭ uvahu krytykaŭ i apazicyi. Klemans Huet, deputat ad levaj partyi «Niaskoranaja Francyja», abvinavaciła prezidenta ŭ kryvadušnaści.
Nieŭzabavie paśla intervju ŭ sacsietkach źjavilisia śćviardžeńni, što hadzińnik prezidenta kaštuje kala 86 tys.dalaraŭ, ale ŭ Jelisiejskim pałacy zajavili, što heta nie tak. U Jelisiejskim pałacy nazvali marku hadzińnika Makrona-Bell & Ross BR V1-92 ź piersanalnym hierbam. Anałahičnyja madeli biez hierba ŭ internecie možna kupić za 2400 jeŭra (2600 dalaraŭ).
«Jon nosić hety hadzińnik rehularna ŭžo paŭtara hoda», — dadali ŭ Jelisiejskim pałacy.
U Francyi praciahvajucca pratesty z-za pastanovy ŭrada pravieści zakon ab pavyšeńni piensijnaha ŭzrostu praź nižniuju pałatu parłamienta, dzie ŭ jaho niama absalutnaj bolšaści, biez hałasavańnia. U piatnicu z-za pratestaŭ admianiŭ svoj vizit u Francyju karol Vialikabrytanii Karł III.
Lidary prafsajuzaŭ zaklikajuć praciahvać pratestnyja vystupleńni, kab nie dapuścić pavyšeńnia piensijnaha ŭzrostu ŭ krainie z 62 da 64 hadoŭ. Nastupnaja demanstracyja pryznačanaja na aŭtorak.
Pa danych Ministerstva ŭnutranych spraŭ, u čacvier na vulicy haradoŭ pa ŭsioj krainie vyjšła bolš za miljon pratestoŭcaŭ, ź ich kala 120 tysiač u Paryžy. U stalicy demanstracyi miescami pieraraśli ŭ biesparadki, i palicyja ŭžyła ślozaciečny haz, kab razahnać pratestoŭcaŭ.
Pa ŭsioj krainie było zatrymana 475 čałaviek, 441 supracoŭnik palicyi atrymaŭ ranieńni.
Čytajcie taksama:
Makron: Ja chaču pieramohi Ukrainy, ale suprać taho, kab Rasija była razdušanaja
Makron abviaściŭ pra zakančeńnie epochi «francuzskaj Afryki»