Расійскі баец пра штурм Ваўчанска: «Засталося 12 чалавек са 100. Нас крышаць: паклалі кулямётам і дабілі дронамі»
Пра тое, як адбываюцца чарговыя мясныя штурмы, расказаў у відэазвароце расійскі кантрактнік.
Баі за горад Ваўчанск у Харкаўскай вобласці працягваюцца некалькі тыдняў. Змаганне ідзе літаральна за кожны дом, Ваўчанск разбураны на 90%.
У адным з паблікаў у тэлеграме з'явілася відэа, на якім расійскі кантрактнік Антон Андрэеў з 5-й роты 1009-га мотастралковага палка расказвае пра баі за горад.
Па словах байца, першапачаткова афіцэры казалі, што яго рота будзе знаходзіцца на мяжы Расіі і Украіны. Аднак іх адправілі ў Ваўчанск. Але перад наступам, яшчэ да ўзяцця апорных пунктаў, частка байцоў палегла ад артылерыйскага агню.
«Аперацыя [па ўзяцці Валчанска] пачалася ўжо не па часе. Пачалі гнаць «наперад-наперад». Мінамёты б'юць, а туды людзей адпраўляюць. За першую ноч палова роты адразу палегла. Большая частка трохсотымі, дзякуй Богу. Двухсотых таксама хапала», — расказвае акупант.
Па словах Андрэева, у Ваўчанск афіцэры адправілі байцоў толькі з бронекамізэлькамі і аўтаматамі. У першую ноч у горадзе ўдалося захапіць адну з вуліц, але пасля пачаліся маштабныя страты:
«Больш-менш нармальна занялі адну вуліцу. І потым пайшла «спёка». Групу адпраўляюць штурмаваць вуліцу. Здаецца, вуліцу праходзіш. Усё нармальна. [А пасля] трапляеш пад замес, пад кулямёты. Асабліва FPV-дроны — проста выводзяць столькі асабістага складу».
Па яго словах, расійскае камандаванне патрабуе працягу штурму нягледзячы на істотныя страты і дазваляе адступіць толькі ў выпадку максімальных страт:
«Камандаванне па рацыі крычыць «Наперад! Наперад!» Адкатаў нельга. Не даюць. Назад адысці нельга. Калі ўжо застанецца чалавек пяць-дзесяць з усіх груп, тады дадуць. Дык сярод іх палова 300-мі будзе вывезена».
Баец сцвярджае, што з іх роты колькасцю 100 чалавек засталося 12 чалавек. Як ён тлумачыць, гэта звязана з тым, што «прыйшлі свежыя групы, якія толькі ў вучэбцы былі чатыры ці пяць дзён». Ранкам іх адправілі на штурм. «Яны два дамы не прайшлі. Іх паклалі пад кулямётам. Яны скучкаваліся. І іх дабілі FPV-дронамі. Засталося чалавек пяць-шэсць».
«Ішла група да нас. З яе ўвогуле адзін чалавек застаўся. Атрымліваецца, што нас крышаць проста. І ўсё. Адпраўляюць пад кулямёты, дроны ў светлы час дня. І проста поўнае мяса. «Наперад, наперад»… Так што не ведаю, як прапятляю я, застануся ці не застануся трохсотым-двухсотым», —
расказвае мужчына і дадае, што ён разумее сваё камандаванне, якое выконвае загады зверху. «А хто сядзіць у Маскве, ім п***й».
Расійскія ваенныя блогеры паведамляюць, што кантрактнікі, якія ваююць у складзе расійскага 1009 мотастралковага палка, адмовіліся выконваць загад без падтрымкі тэхнікі і не пайшлі на штурм. Пазней камандаванне прыняло рашэнне праз значныя страты асабістага складу (да 90%) вывесці полк, замяніўшы яго іншымі падраздзяленнямі.
Каментары