Да выбараў у КР у камандзе Пракоп'ева-Ягорава распрацавалі цэлы фірмовы гардэроб — як вам?
25-27 мая адбудуцца выбары ў Каардынацыйную раду. Цяпер ужо стартаваў этап агітацыі. Мы заўважылі, што блок Пракоп’ева-Ягорава для свайго прасоўвання распрацаваў цэлы мерч і ўласны лагатып. Спыталі, што ён у сабе нясе і колькі гэта каштавала.
У камандзе адзначылі, што лагатып для іх распрацавалі бясплатна.
«Гэта зрабілі беларускія дызайнеры, якія працуюць у адным з вядомых міжнародных рэкламных агенцтваў. У якім менавіта мы сказаць, на жаль, не можам, каб іх не звольнілі за падпрацоўку (там з гэтым усё строга). Але мы дакладна не пацягнулі б аплату іх працы па афіцыйных тарыфах».
Цэнтральным элементам брэндынгу з’яўляецца салатавы прамавугольнік. Ён створаны па матывах выдзялення маркерам чагосьці найбольш важнага. Тое, што ў назве блока такіх прамавугольнікаў тры — гэта сімвал вежы лідарства.
Выбар на карысць тэрмаядзерных колераў быў мэтанакіраваным.
«Мы хацелі адысці ад звыклага чырвонага-белага спалучэння, бо разумелі, што большасць будзе выкарыстоўваць менавіта гэтыя колеры, і тады б мы не вылучаліся. А тут нам дызайнеры адразу сказалі, што з такімі колерамі людзі звыкнуцца не адразу, шмат хто будзе абмяркоўваць гаму. А абмеркаванне і, як вынік, запамінальнасць — гэта тое, чаго мы дамагаліся».
Працягам працы на запамінальнасць стала распрацоўка мерчу.
Ён уключае ў сябе не толькі кубкі, але амаль цэлы гардэроб — бейсболкі, лонгслівы, світшоты, футболкі, кашулі, пола, гольфы і нават сукенкі.
«У нас ёсць дзяўчына, для якой стыль — жыццёвае крэда. Яна і падбірала мадэлі для каманды на выбар. Праўда, праз тое, што людзі з нашага блоку жывуць у 15 краінах свету, ім трэба адправіць гэты мерч, але праз святы ў Польшчы назіраюцца невялікія накладкі ў лагістыцы».
Некаторых актывістаў ужо можна было заўважыць у абноўках у прамых эфірах і каментарах. Вось, напрыклад, Таццяна Хоміч, сястра Марыі Калеснікавай, у фірмовай кашулі.
Ці Вадзім Пракоп'еў у футболцы.
У камандзе адзначаюць, што прыклад з распрацоўкай лукбука для іх вельмі паказальны.
«Гэта прыклад, як беларусы могуць дапамагаць адно адному развівацца і рабіцца заўважней. З моцнай дыяспарай нашы магчымасці ўплываць на сітуацыю ўнутры Беларусі і палітыку заходніх краін у дачыненні да нас значна павялічваюцца. Вось вы бачылі, каб у габрэяў былі праблемы з візамі? Ну, вось. А ўсё праз іх згуртаванасць і ўзаемападтрымку».
Чытайце таксама:
Пракоп'еў патлумачыў, навошта ідзе ў Каардынацыйную раду
Апублікавалі спісы кандыдатаў у новы склад Каардынацыйнай рады
Байпол назваў імёны магчымых забойцаў Андрэя Зельцэра. І заявіў, што сілавіка «Нірвану» застрэліў свой жа5
Каментары