Minabarony Rasii zajaviła ab źniščeńni piaci ŭkrainskich Su-27 na aeradromie va ŭkrainskim Mirharadzie
Minabarony Rasii zajaviła ab źniščeńni ŭkrainskich źniščalnikaŭ Su-27 na aeradromie ŭ Mirharadzie ŭ Pałtaŭskaj vobłaści Ukrainy. Viedamstva śćviardžaje, što ŭdar byŭ naniesieny 1 lipienia rasijskim apieratyŭna-taktyčnym rakietnym kompleksam «Iskander-M». Va Ukrainie zajavili, što «ŭdar byŭ», ale straty «zusim nie takija».
Rasijskija vojski 1 lipienia nanieśli ŭdar rakietami «Iskander-M» pa vajennym aeradromie Mirharad u Pałtaŭskaj vobłaści. «U vyniku ŭdaru rasijskaj armii było źniščana 5 dziejučych i paškodžana 2 źmieščanych na ramoncie šmatmetavych źniščalnikaŭ Su-27», — śćviardžaje Minabarony RF.
Blizki da avijacyi RF telehram-kanał Fighterbomber, piša, što rasiejskija vajskoŭcy ŭrazili nie mienš za piać samalotaŭ. «U lubym vypadku heta samy dziejsny ŭdar pa aeradromie z našaha boku z pačatku SVA », — dadaje kanał.
Udar pa aeradromie paćvierdziŭ były śpikier Pavietranych sił USU Juryj Ihnat. Pavodle jaho słoŭ, «udar byŭ» i «jość peŭnyja straty», ale «zusim nie takija», jak prypisvaje sabie armija RF.
Jon dadaŭ, što rasijanie rehularna abstrelvajuć vajskovyja aeradromy Ukrainy, i padkreśliŭ, što vajskoŭcy USU prykładvajuć «nievierahodnyja namahańni», kab abaranić ich. «Heta vajna, i, na žal, nie biez strat techniki», — napisaŭ Ihnat.
Siłaviki razhramili M1 — samaje papularnaje ŭ rasijan biełaruskaje kazino7
Kamientary