Paŭnamaštabnaja vajna pamiž Izrailem i «Chiezbałoj» moža pačacca ŭ bližejšy čas
Šerah krain, u tym liku ZŠA i Rasija, zaklikali svaich hramadzian pakinuć albo nie pryjazdžać u Livan, jaki faktyčna znachodzicca pad kantrolem «Chiezbały». Što heta za hrupoŭka i čamu jana macniejšaja za CHAMAS?
Amierykanskaja vyviedka kanstatuje vielmi vysokuju ryzyku izrailskaha ŭvarvańnia ŭ Livan z metaj poŭnamaštabnaha supraćstajańnia «Chiezbale», paviedamlaje vydańnie Politico.
Vysokapastaŭlenyja krynicy vydańnia va ŭradzie ZŠA prahnazujuć, što novaja vajna moža pačacca ŭžo «ŭ bližejšyja tydni».
Izrail i «Chiezbała» padrychtavali bajavyja płany i znachodziacca ŭ stadyi zakupak dadatkovaha ŭzbrajeńnia. Abodva baki, niahledziačy na namahańni administracyi Bajdena pa deeskałacyi, chutčej za ŭsio pačnuć vajnu, jakaja moža paciahnuć za saboj humanitarnuju katastrofu i pramy ŭdzieł ZŠA.
Pryčym niekatoryja jeŭrapiejskija raźviedki čakajuć pačatku vajny ŭžo ŭ najbližejšyja dni», — piša Politico sa spasyłkaj na dvuch amierykanskich čynoŭnikaŭ.
Krynicy adznačajuć, što praduchilić amal niepaźbiežnuju vajnu moža tolki pahadnieńnie pamiž Izrailem i terarystyčnaj hrupoŭkaj CHAMAS ab spynieńni ahniu ŭ siektary Haza i poŭnaje vyzvaleńnie izrailskich zakładnikaŭ. Adnak pieramovy na dadzienym etapie iduć składana i naŭrad ci buduć paśpiachovymi.
«My prykładajem namahańni dla kančatkovaha zaklučeńnia ŭhody, jakaja ŭstaluje doŭhaterminovy mir u Hazie i praduchilić novuju vajnu suprać «Chiezbały». Ale zaraz usio zaležyć ad pazicyi i zhody CHAMASa», — zajaŭlajuć čynoŭniki.
«Chiezbała» (ad arab. «Partyja Ałacha») źjaŭlajecca livanskaj radykalnaj vajenizavanaj isłamisckaj hrupoŭkaj i adnačasova palityčnaj partyjaj ź miescami va ŭradzie i ŭ parłamiencie Livana. U mnohich krainach śvietu «Chiezbała» pryznana terarystyčnaj arhanizacyjaj (Biełaruś nie pryznaje jaje takoj, a Rasija, Kitaj i Iran uvohule nazyvajuć hrupoŭku paŭnapraŭnaj palityčnaj siłaj). Kolkaść členaŭ i prychilnikaŭ «Chiezbały» składaje dziasiatki tysiač čałaviek nie tolki ŭ Livanie, ale i va ŭsim śviecie.
Hrupoŭka ŭźnikła ŭ ahni livanskaj hramadzianskaj vajny 70-90-ych hadoŭ minułaha stahodździa ŭ jakaści adkazu na pieršaje ŭvarvańnie Izraila ŭ Livan i z tych časoŭ aficyjna maje metu tatalnaha źniščeńnia jaŭrejskaj dziaržavy.
Usiaho Izrail uryvaŭsia na terytoryju Livana dvojčy. Pieršy raz — u 1982 hodzie, kali Izrail vajavaŭ suprać Arhanizacyi vyzvaleńnia Paleściny i padčas kampanii zachapiŭ livanskuju stalicu Biejrut razam z poŭdniem krainy. Izrailskaja armija kančatkova syšła ź Livana tolki ŭ 2000 hodździe, a zatym praz 7 hadoŭ paŭtaryła ŭvarvańnie ŭžo suprać «Chiezbały», jakoje skončyłasia dziakujučy ŭmiašalnictvu AAN.
Livanskaja «Chiezbała», u adroźnieńnie ad paleścinskaj CHAMAS, ujaŭlaje saboj paŭnavartasnuju armiju z roznymi rodami vojskaŭ. «Chiezbała» maje dobra abstalavanuju piachotu, tanki, BMP, RSZA, sistemy SPA, bieśpiłotniki i navat balistyčnyja rakiety.
Kolkaść bajevikoŭ u «Chiezbały» składaje ad 45 da 100 tysiač čałaviek, što jak minimum u 3-4 razy pieravyšaje pakazčyki CHAMAS.
Hrupoŭka ŭ płanie finansaŭ, resursaŭ i vajskovaj padrychtoŭki amal całkam zaležyć ad Irana, jakomu dała aficyjnuju klatvu viernaści (što taksama adroźnivaje jaje ad CHAMAS, jaki viadzie bolš samastojny ład žyćcia).
Mocnaja suviaź pamiž Iranam i «Chiezbałoj» padmacoŭvajecca jašče i tym faktam, što pamiž imi praktyčna niama nijakich hieahrafičnych i palityčnych pieraškod. Iran moža spakojna i ŭ luboj kolkaści pastaŭlać resursy «Chiezbale» napramuju praź siabroŭskija Irak i Siryju, dzie isnuje vialikaja kolkaść prairanskich vajenizavanych hrupovak.
CHAMAS u svaju čarhu hieahrafična izalavany Izrailem u Hazie i nie moža raźličvać na choć niejak značnuju padtrymku sajuźnikaŭ.
Chto taja prafsajuznaja aktyvistka z MAZa, jakaja paprasiła Łukašenku razabracca ŭ jutubie z «biehłymi»?18
Kamientary