«Našy ludzi siarod ułady». Pavieł Łatuška daŭ acenku klučavym fihuram u atačeńni Łukašenki
Na kanale «Tok» vyjšła vialikaja razmova z Paŭłam Łatuškam. U joj palityk vykazaŭ svajo mierkavańnie pra toje, čaho čakać ad Ejsmant, Valfoviča, Sierhiejenki i inšych vysokich łukašenkaŭskich čynoŭnikaŭ.
Natalla Kačanava. «Choča vykonvać volu tolki adnaho»
«Heta toj čałaviek, jaki choča padabacca i vykonvać volu tolki adnaho», — charaktaryzuje Pavieł Łatuška staršyniu Savieta Respubliki Nacyjanalnaha schodu Natallu Kačanavu.
Jon ličyć, što dziela Łukašenki jana hatova na lubyja ŭčynki.
«Kali chtości kaža, što budzie lepš, kali zamiest Łukašenki budzie Kačanava, to jon pamylajecca. Ničoha lepš nie budzie. Kačanava vielmi hanarlivaja, stavicca da ludziej pahardliva, nie pavažaje ich».
Na dumku Łatuški, u stratehii Kramla isnuje varyjant pierachodu ŭłady da Kačanavaj. Rasija, jak i ŭsie bujnyja dziaržavy, prapracoŭvaje roznyja varyjanty i stratehii. Jość hałoŭny varyjant, na jaki Rasija źviartaje asnoŭnuju ŭvahu, — poŭnaja anieksija Biełarusi. Ale jość i zapasnyja. U jakaści takoha varyjanta moža być pierachod ułady da Natalli Kačanavaj. Jana, miarkuje palityk, prarasijski čałaviek.
Ejsmant. «Małajčyna, dobra pracuje!»
Łatuška miarkuje, što pres-sakratarka Łukašenki Natalla Ejsmant prysutničaje na viačerach u Łukašenki ŭ niadzielu. I na hetych viačerach prydumvajecca roznaje. Naprykład, hvałt u adnosinach da dvaravych aktyvistaŭ.
«Ale čas ad času, nazirajučy za tym, jak jana padaje infarmacyjnuju palityku, stvarajecca ŭražańnie, što heta naš čałaviek, bo, ź miedyjnaha punktu hledžańnia i prapahandy, joju stvarajecca taki durny vobraz Łukašenki.
Małajčyna, dobra pracuje», — iranizuje pra Ejsmant Pavieł Łatuška.
Anatol Hłaz. «Łović chajp»
Na dumku Łatuški, pres-sakratar Ministerstva zamiežnych spraŭ Anatol Hłaz zadavoleny tym, što trapiŭ na telebačańnie. Hetuju mahčymaść jon choča vykarystać dla siabie.
«Jamu ŭsio padabajecca, Hłaz prydumvaje niejkija dziŭnyja pasty ŭ instahramie, dzie ŭpraŭleńnie infarmacyi tancuje. Z hetaha jon łović chajp».
Dla dypłamataŭ staroj škoły, da jakoj adnosić siabie Łatuška, takija pavodziny vyhladajuć žachlivymi.
Ale, adznačaje Łatuška, Hłaz — syn viadomaha ŭ minułym dziejača namienkłatury i nie taki prosty, jakim moža zdavacca.
Kali Łatuška pracavaŭ ambasadaram u Polščy, Anatol Hłaz byŭ adkaznym za adnosiny z Polščaj. Dziakujučy suviaziam, jon mieŭ mahčymaść niepasrednych kantaktaŭ z sakrataryjatam Rady biaśpieki. U adnosinach z Polščaj u biełaruskich uładaŭ zaŭsiody byli składanaści, kaža Łatuška. KDB vioŭ vajnu z Polščaj, i dypłamaty sprabavali niejak vyjści z hetaj situacyi. Anatol Hłaz dapamahaŭ hetyja pytańni vyrašać. I na toj momant zdavałasia, što jon robić karjeru narmalnaha kłasičnaha dypłamata, jaki buduje adnosiny, a nie razburaje.
«Siońnia jon, jak Natalla Ejsmant, stvaraje adpaviedny vobraz Łukašenki. Lepš nie prydumaješ. Našy ludzi siarod ułady», — iranizuje Łatuška.
Valfovič. «Hety čałaviek budzie vykonvać toje, što treba Rasijskaj Fiederacyi»
Dziaržsakratara Rady biaśpieki Alaksandra Valfoviča palityk ličyć čałaviekam bajaźlivym.
«U krytyčny momant jamu budzie ciažka prymać rašeńni. I heta budzie toj momant, kali ź im možna budzie pasprabavać parazmaŭlać».
Heta nie pytańnie dyjałohu. Hałoŭnaje — nie dapuścić čahości horšaha, čaho nichto nie choča, naprykład, sutyknieńniaŭ hramadzianskaha charaktaru, kaža Łatuška.
Dla Łatuški Valfovič — ruski hienierał, jaki siadzić u strukturach ułady Łukašenki i pradstaŭlaje ruskija intaresy.
«Aceńvajučy jaho z hetaha punktu hledžańnia, Valfovič atrymaje vielmi mocnuju padtrymku z boku Rasii. Jon budzie vykonvać toje, što treba Rasijskaj Fiederacyi. Jon zaŭsiody budzie vybirać jaje intaresy».
Ihar Sierhiejenka. «Intelihient u pahonach»
Havoračy pra kiraŭnika Administracyi Łukašenki Ihara Sierhiejenku, Łatuška zhadvaje, što na pačatku 2010-ch Sierhiejenka byŭ pieršym namieśnikam staršyni KDB i adkazvaŭ za mižnarodnyja adnosiny. U toj čas była libieralizacyja ź Jeŭrapiejskim sajuzam i jon byŭ toj asobaj, jakaja zdymała prablemy. Sierhiejenka staraŭsia znachodzić kampramisy, kab nie napružvać adnosiny z peŭnaj krainaj ci ź Jeŭrasajuzam u cełym.
Łatuška adznačaje, što Sierhiejenka pracavaŭ u intaresach Biełarusi. Padavałasia, što heta taki «intelihient u pahonach», kaža Łatuška. Ciapier jon ličyć takoje ŭražańnie iluzijaj.
«My žyli ŭ inšym śviecie, u samapadmanie. Toj śviet užo nie isnuje. Adpaviedna i acenki ŭsie źmianilisia», — zaŭvažaje Pavieł Łatuška.
Kamientary