«Ja dumaŭ, što ruskija chutka pieramohuć, ale vyjšła, jak zaŭsiody». Spoviedź idejnaha rasijskaha špijona, jaki atrymaŭ va Ukrainie pažyćciovaje
Ahienctva Reuters uziało intervju ŭ prarasijskaha kałabaranta, aryštavanaha va Ukrainie za zdradu dziaržavie. Jon byŭ čynoŭnikam i źlivaŭ FSB danyja ab ukrainskich vajskovych abjektach i pierasoŭvańniach pradstaŭnikoŭ ukrainskich uładaŭ i śpiecsłužbaŭ. Mužčyna patłumačyŭ svaju matyvacyju i raspavioŭ, ab čym ciapier škaduje.
25.12.2024 / 08:56
Ilustracyjnaja vyjava aryštu vajskovaj kontrvyviedkaj Słužby biaśpieki Ukrainy adnaho z rasijskich kałabarantaŭ. Fota: SBU
52-hadovy Aleh Kaleśnikaŭ, jaki da aryštu za špijanaž na karyść Rasii ŭ 2023 hodzie pracavaŭ u jakaści dziaržaŭnaha ziemleŭparadčyka ŭ Zaparožžy, daŭ intervju ahienctvu Reuters, dzie raspavioŭ ab svajoj matyvacyi zdradzić Ukrainie.
Mužčyna hutaryŭ z žurnalistami Reuters jašče da svajho pažyćciovaha prysudu, jaki atrymaŭ za pieradaču FSB danych ab pierasoŭvańniach ukrainskich vajskoŭcaŭ, čynoŭnikaŭ, śpiecsłužboŭcaŭ i pradastaŭleńni kaardynataŭ dla naniasieńnia rasijskich rakietnych udaraŭ.
Adnym z takich epizodaŭ stała źniščeńnie rasijskimi rakietami hatela Sunrise Park u Zaparožžy ŭ vieraśni 2022 hoda, jakoje zabrała žyćcio adnaho mirnaha žychara i paraniła jašče piać (u hateli pavinny byli sabracca ŭkrainskija čynoŭniki, ab čym viedaŭ Kaleśnikaŭ, ale sustreča tak i nie adbyłasia).
Uspaminajučy tuju padzieju i inšyja akty špijanažu na karyść Rasii, były ŭkrainski dziaržsłužačy zajaviŭ, što «škaduje pra niedakładnaść niekatorych rasijskich udaraŭ, jakija pryviali da śmierci mirnych žycharoŭ, i pra toje, što vajna zaciahnułasia». Ale Kaleśnikaŭ dadaŭ, što supracoŭničaŭ z Rasijaj nie dziela hrošaj, a tamu što ščyra vieryć u ideałohiju «ruskaha śvietu».
«Ja dumaŭ, što ruskija chutka prasunucca, ale vyjšła tak, jak zaŭsiody. Jany płanujuć adno, a adbyvajecca całkam inšaje», — zajaviŭ ahienctvu Reuters Aleh Kaleśnikaŭ.
Były čynoŭnik adznačyŭ, što vyras u savieckaj Ukrainie, a jahony baćka byŭ ahientam vyviedki SSSR, jaki pracavaŭ na Kubie pad prykryćciom pierakładčyka. Akramia taho, jahony stryječny brat ciapier pracuje ŭ FSB Rasii. Hetyja suviazi, na dumku Kaleśnikava, zrabili jaho «idealnym kandydatam» dla viarboŭki rasijskaj vyviedkaj.
«Žonka kinuła mianie adrazu paśla majho aryštu i zabrała z saboj naša 11-hadovaje dzicia. Maja budučynia vyhladaje zmročnaj, i adzinym sposabam vyratavać ułasnaje žyćcio ja baču ŭdzieł u budučym abmienie źniavolenymi z Rasijaj. Ja chacieŭ by, kab mianie abmianiali, ale heta zaležyć nie ad mianie», — padzialiŭsia Kaleśnikaŭ.
Słužba biaśpieki Ukrainy (SBU) vyjšła na Kaleśnikava paśla taho, jak jahony aŭtamabil byŭ zaŭvažany na miescy adnaho z rasijskich udaraŭ pa Zaparožžy ŭ sakaviku 2022 hoda. Supracoŭniki SBU ŭstalavali ŭ mašynie padazravanaha prasłuchoŭku, jakaja dapamahła zafiksavać jahonyja kantakty ź Vitalom Kusakinym, jašče adnym zavierbavanym Rasijaj špijonam. Abodvuch aryštavali tolki ŭ mai 2023 hoda paśla atrymańnia dastatkovych dokazaŭ ich złačynnaj dziejnaści.
Na zakrytym sudovym pasiadžeńni Kaleśnikaŭ pryznaŭ siabie «častkova» vinavatym, śćviardžajučy, što nie viedaŭ pra suviazi svajho stryječnaha brata z FSB. Sud adchiliŭ hetyja zajavy, pryznaŭšy byłoha čynoŭnika vinavatym u «śviadomaj dapamozie zamiežnaj dziaržavie». Kaleśnikavu prysudzili pažyćciovaje źniavoleńnie, a Kusakin atrymaŭ 15 hadoŭ pazbaŭleńnia voli.
Historyja Kaleśnikava stała častkaj bolš za 3200 kryminalnych spraŭ ab dziaržaŭnaj zdradzie, adkrytych paśla pačatku poŭnamaštabnaha ŭvarvańnia Rasii va Ukrainu.