«Visić na vałasku». Padzieńnie režymu Asada stavić pad pahrozu rasijskija apieracyi ŭ Afrycy
Adzin sa šlachoŭ, jaki Uładzimir Pucin abraŭ dla baraćby z Zachadam, byŭ aprabavany jašče ŭ saviecki čas — praz padtrymku režymaŭ u biednych krainach. Jak i tady, lepš za ŭsio heta ŭdałosia ŭ Afrycy, a dapamahła ŭ hetym rasijskaja prysutnaść u Siryi, dyktatara jakoj Pucin vyratavaŭ ad parazy ŭ hramadzianskaj vajnie. Ciapier ža ŭcioki Asada pahražajuć Rasii strataj dźviuch vajskovych baz u Siryi i vialikimi prablemami na afrykanskim kirunku, piša The Moscow Times.
12.12.2024 / 16:45
Avijabaza Chmiejmim u Siryi. Fota: Minabarony Rasii
Padzieńnie režymu Asada značna abciažaryć vajennyja apieracyi Rasii ŭ Afrycy, ličyć Ulf Lesinh, dyrektar prahramy «Sachiel» (u hety rehijon uvachodziać, u pryvatnaści, Burkina-Faso, Mali i Nihier, dzie aktyŭna dziejničaje Rasija) u niamieckim analityčnym centry Fond Konrada Adenaŭera.
«Usie paloty dla zabieśpiačeńnia najmitaŭ, ratacyi vojskaŭ, dastaŭki bojeprypasaŭ i zbroi ažyćciaŭlalisia praź Siryju», dzie ŭ Rasbi znachodzicca avijabaza, cytuje Lesinha Bloomberg:
«Lacieć z całkam zahružanym transpartnym samalotam z Rasii ŭ Afryku zanadta daloka. Rasii pryjdziecca skaracić svaju dziejnaść u Afrycy, i abychodzicca jana budzie značna daražej».
Sprabujučy adnavić upłyŭ u krainach treciaha śvietu, jakija jašče SSSR vykarystaŭ dla baraćby z «zachodnim impieryjalizmam i kałanijalizmam», Uładzimir Pucin praz bajevikoŭ Jaŭhienija Pryhožyna, a ciapier i praz padviedamasny Minabarony Afrykanski korpus ustalavaŭ supracoŭnictva z vajskovymi chuntami ŭ šerahu krain Čornaha kantynienta.
Atrymanyja ŭ 2017 hodzie ŭ arendu na 47 hadoŭ marskaja i avijacyjnaja bazy ŭ Siryi vykarystoŭvajucca dla ŭzajemadziejańnia z družalubnymi ŭ dačynieńni da Kramla afrykanskimi režymami.
Užo ŭ 2018 hodzie pavietrany most praz avijabazu ŭ Chmiejmimie dazvoliŭ bajevikam z PVK «Vahnier» vysadzicca ŭ Centralnaj Afrykanskaj Respublicy (CAR), kab abaranić jaje prezidenta ad paŭstancaŭ. Na nastupny hod vahnieraŭcy ŭdzielničali ŭ sprobie (niaŭdałaj) vajennaha lidara ŭschodniaj Livii Chalify Chaftara zachapić stalicu krainy Trypali. Supracoŭnictva z Chaftaram praciahvajecca ŭžo na aficyjnym uzroŭni.
Akramia taho, Rasija sprabuje adyhryvać rolu ŭ vajennym kanflikcie ŭ Sudanie. Praź Siryju dastaŭlajucca piersanał i vajskovyja hruzy ŭ Mali, Burkina-Faso i Nihier, dzie ŭ apošnija hady adbylisia ŭzbrojenyja pieravaroty, a novyja ŭłady razarvali suviazi z Zachadam.
Baza ŭ Chmiejmimie i port u Tartusie, adzinaja zamiežnaja vajskova-marskaja baza Rasii, dazvolili joj tanna i efiektyŭna pašyryć svoj vajskovy, palityčny i ekanamičny ŭpłyŭ u Afrycy. Ale ciapier u Maskvie ličać vierahodnym poŭny sychod ź Siryi sa strataj abiedźviuch baz, pra heta The Moscow Times raskazali dva rasijskija dypłamaty na ŭmovach ananimnaści.
Rasijski vajskovy kantynhient byŭ zabłakavany ŭ miescach dysłakacyi paśla taho, jak apazicyjnyja siły ŭstalavali poŭny kantrol nad terytoryjami, dzie znachodziacca Tartus i Chmiejmim.
Pakul što samaloty, viertaloty i abstalavańnie zastajucca na avijabazie, ale karabli ŭ apošnija dni pakinuli port, choć dva frehaty znachodziacca ŭ 7-12 kiłamietrach ad bieraha, piša Bloomberg sa spasyłkaj na spadarožnikavyja zdymki kampanii Maxar.
«Rasijanie nie chočuć, kab pa ich udaryli, tamu adviali ich u mora», — skazała pra karabli śpiecyjalistka pa rasijskich uzbrojenych siłach Dara Masikot, staršy navukovy supracoŭnik Bierlinskaha centra Karnehi pa vyvučeńni Rasii i Jeŭrazii. Evakuacyja, pa jaje słovach, pakul nie idzie. Kali b jana pačałasia, u Chmiejmim prylacieła b šmat «Iljušynych» i «Antonavych», h. zn. hruzavych samalotaŭ, u Tartus pryjšło b bolš karabloŭ, «kab dapamahčy vyvieźci rečy», skazała Masikot Financial Times.
«Rasija, vidavočna chacieła b zachavać choć by simvaličnuju prysutnaść na hetych bazach, kab jaje paraza nie vyhladała takoj vidavočnaj. Ale adbudziecca heta ci nie, zaležyć ad taho, jak budzie raźvivacca palityčny praces u samoj Siryi», — ličyć śpiecyjalist pa rasijskich uzbrojenych siłach Pavieł Łuzin, zaprošany supracoŭnik Škoły prava i dypłamatyi Fletčara pry Univiersitecie Taftsa.
Biez padtrymki ŭ Siryi Rasii daviadziecca pierabudoŭvać usiu sistemu pracy ŭ Afrycy, skazaŭ Bloomberg Anas el-Hamaci, dyrektar livijskaha analityčnaha centra Instytut Sadeka:
«Biez nadziejnaha pavietranaha mosta zdolnaść Rasii prajecyravać svaju siłu ŭ Afrycy burycca. Usia jaje apieratyŭnaja stratehija ŭ Mižziemnamorji i Afrycy visić na vałasku».
Kali Rasija pazbavicca mahčymaści ŭ poŭnaj stupieni vykarystać avijabazu ŭ Chmiejmimie, heta stanie «istotnaj strataj» dla afrykanskich apieracyj, dadaje Rusłan Puchaŭ, dyrektar Centra analizu stratehij i technałohij:
«Usie pastaŭki išli praz Chmiejmim, heta asabliva važna dla krainy biez porta, takoj jak CAR».
Fidel Huandžyka, daradca prezidenta CAR, praŭda, zapeŭnivaje, što ŭ Rasii «jość płan B», chaj heta buduć avijapastaŭki praź Liviju abo dostup u CAR praz party Kamieruna abo Konha sa stalicaj u Brazavili. Huandžyka dadaŭ, što CAR hatovaja dapamahčy Kramlu ŭ dastaŭcy hruzaŭ i sałdat z Rasii ŭ inšyja krainy Sachiela.
Pa słovach ekśpiertaŭ, častku avijacyjnych apieracyj sapraŭdy možna było b pieranieści ŭ Liviju, raźmieščanuju prykładna za 1500 kiłamietraŭ na paŭdniovy zachad, adznačaje «Radyjo Svaboda». Ale pierakidać tudy z Rasii hruzavyja samaloty ź ciažkim uzbrajeńniem budzie składaniej, navat kali dapuścić, što Maskva zmoža atrymać prava na ich pralot u Turcyi, jakaja maje inšyja intaresy na Blizkim Uschodzie i ŭ Afrycy.
Strataj Siryi i ŭpłyvu ŭ Afrycy sprava moža nie abmiežavacca. Padzieńnie Asada — heta «surjozny ŭdar pa pretenzijach Rasii na toje, kab zastavacca hłabalnaj dziaržavaj z punktu hledžańnia zachavańnia vajskovaha i palityčnaha ŭpłyvu za miažoj», ličyć Chamidreza Azizi, navukovy supracoŭnik Niamieckaha instytuta mižnarodnych adnosin i biaśpieki. Paśla hetaha krainy ŭ inšych rehijonach, takich jak Łacinskaja Amieryka i Afryka, mohuć «pačać pieraasensoŭvać svaje suviazi z Rasijaj i zaležnaść ad jaje», miarkuje jon.
Pałkoŭnik z Vajskovaj akademii Biełarusi: Toje, što adbyvajecca ŭ Siryi, heta paraza Rasii
Siryjskija paŭstancy atrymlivali i biełaruskuju zbroju
U siryjskaj Łatakii spalili trunu ź ciełam baćki Bašara Asada
Dziejač apazicyi ŭznačaliŭ pierachodny ŭrad krainy Siryi
Krach režymu za 11 dzion. Čamu armija Asada tak chutka razvaliłasia?