Stała viadoma, čamu pieramožca biełaruskaha adboru «Mis Suśviet» nie jedzie na konkurs. Jana znajšłasia ŭ SIZA
Chutčej za ŭsio, pryčyny jaje zatrymańnia nie palityčnyja. Pa słovach siabroŭ, madel vinavaciać u machlarstvie i suteniorstvie.
16.11.2024 / 13:19
Karyna Kisialova. Fota ź jaje instahrama
Siońnia ŭ Mieksicy adbudziecca finał adnaho samych prestyžnych u śviecie konkursaŭ pryhažości — «Mis Suśviet 2024». Biełaruś u im udzielničaje ŭpieršyniu.
«Mis Biełaruś 2023» Eleanora Kačałoŭskaja ŭžo bolš za dva tydni tusić u Miechika. Jana raspaviadaje pra składanaje žyćcio madeli: navat na śniadanak treba prychodzić u poŭnaj bajavoj hatoŭnaści: z układkaj, makijažam dy ŭ čarhovaj raskošnaj sukiency… A jašče ž uvieś dzień treba biehać na abcasach dy paśmichacca ŭ abjektyvy kamier.
Eleanora Kačałoŭskaja na konkursie nacyjanalnych kaściumaŭ na «Mis Suśviet». Skrynšot jaje storys
Naŭrad ci inšaja biełaruskaja madel, Karyna Kisialova, moža paspačuvać Eleanory ad usiaho serca. Bo dziaŭčyna zamiest mieksikanskaj kuchni ciapier vymušana znajomicca z zusim inšaj (i značna mienš vytančanaj) ježaj — turemnaj bałandaj. A jak viadoma, kuchary ŭ biełaruskich SIZA zorak Mišlena nie majuć.
Voś tak pa roznamu skłalisia losy dvuch pryhožych biełarusak, jakija maryli pra konkurs «Mis Suśviet». Ale jak ža tak atrymałasia?
Karyna Kisialova (źleva) i Eleanora Kačałoŭskaja (sprava)
Heta historyja mahła b lehčy ŭ asnovu zachaplalnaha detektyvu — naprykład, «Źnikłaja. Biełaruskaja viersija».
Dyk voś, pieršaja dzieja: sioleta ŭ Biełarusi vybirali pryhažuniu, jakaja pieršaj budzie pradstaŭlać krainu na konkursie «Mis Suśviet». Karonu i tytuł atrymała 27-hadovaja Karyna Kisialova.
Pryhažunia nie chavała svajho ščaścia: 28 vieraśnia 2024 hoda dziaŭčyna nie biez honaru napisała, što stanie pieršaadkryvalnicaj «Mis Suśviet» dla Biełarusi. Ale toj dopis raptoŭna źnik ź instahrama. Karyna pakinuła tolki fota, zroblenaje pierad pačatkam finału. Jana piša ŭ sacyjalnych sietkach «I'm tired» («Ja stamiłasia»).
Źnik i instahram-akaŭnt missuniverse_belarus, dzie publikavalisia zdymki z konkursu pryhažości. A ŭ chutkim časie źnikła i sama Karyna.
Na scenie źjaviłasia novaja hierainia, užo dobra viadomaja hledačam. Eleanora Kačałoŭskaja ź pijanierskim entuzijazmam zaviarnułasia ŭ čyrvona-zialony ściah i nazvała siabie pieršaj pradstaŭnicaj Biełarusi na konkursie «Mis Suśviet».
Tym časam siabry Karyny pačali panikavać — źviazacca ź joj nie atrymlivałasia. Telefon pryhažuni adklučany, u sacyjalnych sietkach jana nie źjaŭlałasia bolš za miesiac.
Dyk što zdaryłasia? Kazka naadvarot: pryncesa pieratvaryłasia ŭ Papiałušku.
Insajdary raspaviali «Našaj Nivie», što dziaŭčyna trapiła za kraty. Surazmoŭca, znajomy ź situacyjaj, śćviardžaje, što konkurs «Mis Suśviet Biełaruś» sama Karyna i arhanizavała. Jon kaža, byccam dziaŭčyna nabyła ŭ arhanizataraŭ suśvietnaha konkursu licenziju na ŭdzieł dla Biełarusi i praviała konkurs pryhažości, u jakim imia pieramožcy było viadoma ad samaha pačatku. Jaje imia.
Uskosna heta paćviardžajuć niekatoryja fakty. Pa-pieršaje, heta nievialikaja kolkaść udzielnic konkursu. Na fota z dabračynnaj akcyi ŭ Červieńskim sacyjalnym pansijanacie «Śviet dabryni» vidać tolki siem dziaŭčyn. Na fota ź finału i taho mienš — šeść. Dla paraŭnańnia: u finale «Mis Biełaruś 2023» udzielničała 24 pryhažuni.
Pa-druhoje, kastynh na «Mis Suśviet Biełaruś» pijaryŭ akaŭnt u instahramie, nazva jakoha suhučnaja z nazvaj akaŭnta samoj Karyny. Darečy, toj samy profil rekłamavaŭ i niejki nie vielmi zrazumieły kastynh «na mižnarodnyja konkursy pryhažości». Biełaruskam abiacali «vyklučna topavyja konkursy» i pisali, što «heta dobraja mahčymaść zajavić pra siabie».
I pa-treciaje, heta faktyčnaja adsutnaść infarmacyi pra chod konkursu ŭ biełaruskich ŚMI — pra finał napisaŭ tolki adzin rehijanalny sajt.
Pa infarmacyi insajdaraŭ, Karyna pad śledstvam za machlarstva (art. 209), a taksama za suteniorstva. Nazva artykuła niezrazumiełaja — ci to ŭciahvańnie ŭ prastytucyju (art. 171-1), ci to arhanizacyja prastytucyi (art. 171)
Na hety momant Karyna Kisialova znachodzicca ŭ SIZA ŭ Kaladzičach.
Mis Biełaruś Eleanora Kačałoŭskaja chvalicca adpačynkam u akupavanym Krymie FOTY