BiełAZ pradaje kitajski varyjant lehiendarnych botaŭ Timberland. Jany ŭ niekalki razoŭ tańniejšyja za aryhinalnyja!
Vyśvietliłasia, što BiełAZ ciapier handluje nie tolki karjernymi samazvałami, ale i abutkam. Vizualna mužčynskija boty vielmi padobnyja da lehiendarnych Timberland Premium 6-Inch Boot. Kaštuje kłon śmiešnyja hrošy.
13.11.2024 / 09:22
Skrynšot sajta shop.belaz.by
U anłajn-kramie BiełAZu paznačana, što zroblena da bolu paznavalnaja madel z naturalnaj skury:
«Kanstrukcyja i ŭłaścivaści, zakładzienyja pry stvareńni hetaj madeli, dazvalajuć vykarystoŭvać jaje nie tolki ŭ haradskim, ale i zaharadnym režymie. Materyjały, jakija vykarystoŭvajucca dla vyrabu abutku BiełAZ, padbiralisia z ulikam ich vykarystańnia ŭ ahresiŭnym asiarodździ».
Na miescy, dzie ŭ aryhinalnych Timberland znachodzicca łahatyp u vyhladzie dreva, u biełazaŭskich botach z honaram krasujecca minijaciurny samazvał.
Kali vy dumajecie, što heta biełaruskija majstry zrabili kopiju papularnych va ŭsim śviecie botaŭ, dyk nie — jany made in China. Kitajski kłon kaštuje krychu bolš za 120 rubloŭ.
Darečy, u biełaruskich kramach znajści aryhinalnyja Timberland Premium 6-Inch Boot davoli składana: na sajtach, jakija handlujuć imi, paznačana, što ŭsio raskupili.
Jość novaja para na «Kufary». Aŭtar śćviardžaje, što maje siertyfikat aryhinalnaści i pradaje za stolki, za kolki nabyŭ (ale pamyliŭsia z pamieram) — 750 rubloŭ.
Skrynšot abjavy na «Kufary»
Treby adznačyć, što biełazaŭskija «cimbierłendy» vyjhrajuć pa košcie navat kali paraŭnoŭvać z abutkam inšych biełaruskich brendaŭ. U siarednim mužčynskija boty ad Marko ci Belwest kaštujuć na 100—150 rubloŭ daražej.
U anłajn-kramie BiełAZa praduhledžany raździeł «Adzieńnie». Tam jość tolki niekalki cišotak (24-36 rubloŭ), kiepak (kala 11 rubloŭ) i kurtak (pa 86 rubloŭ). Z aksiesuaraŭ prapanujuć skurany remień za 28 rubloŭ.
Stała viadoma, kolki dyvidendaŭ Prezidencki spartyŭny kłub atrymaŭ ad prodažu BiełAZaŭ
Jak na BiełAZie zarablali biznesmieny Čyž i Kułujeŭ
U prybiralniach Pałaca kultury BiełAZa kamiery pastavili prosta nad unitazami
«Dziakuj za tyja «BiełAZy». U Kryvym Rohu raskazali, jak BiełAZy dapamahli adbić rasijski nastup