U Maskvie zaviaršajecca sud nad dvuma biełarusami, abvinavačanymi ŭ dyviersii. Prakuror zapatrabavaŭ vializnyja terminy
U Maskoŭskim abłasnym sudzie sudziać hramadzian Biełarusi Arcioma Breskaha i Kiryła Baśko, abvinavačanych u dyviersii, ździejśnienaj u čyhunačnym depo padmaskoŭnaha Arechava-Zujeva. Pavodle abvinavačvańnia, biełarusy nibyta pa zadańni SBU padpalili kabinu elektravoza UŁ-10, piša rasijskaja «Miediazona».
25.10.2024 / 20:05
Kirył Baśko (źleva) i Arciom Breski (sprava) u sudzie. Fota: Miediazona
Sud idzie z pačatku hoda i ciapier nabližajecca da zakančeńnia. Prakuror paprasiŭ prysudzić abvinavačanych da vialikich terminaŭ u kałonii strohaha režymu: Arcioma Breskaha da 14,5 hadoŭ, a Kiryła Baśko, da 14 hadoŭ.
Pradstaŭnik Rasijskaj čyhunki taksama zajaviŭ hramadzianski pazoŭ na sumu ŭ pamiery 2 miljony 874 tysiačy rasijskich rubloŭ. Abodva padsudnyja vykazvajuć hatoŭnaść pakryć škodu, ale nie pahadzilisia z sumaj. Breski ličyć, što jana «niapravilna paličanaja», tamu što «bačyŭ łakamatyŭ, jon byŭ uvohule nierabočy».
Uradžencaŭ Viciebska Baśko i Breskaha, jakija pryjechali ŭ Maskvu na zarobki, zatrymali ŭ Maskvie 27 śniežnia 2022 hoda. U toj dzień na ich skłali pratakoły ab drobnym chulihanstvie i aštrafavali za łajanku ŭ hramadskim miescy. Paźniej sud aryštavaŭ biełarusaŭ pa artykule ab naŭmysnym paškodžańni majomaści, i tolki paśla abvinavačvańnie pierakvalifikavali pa artykule ab dyviersii.
Pavodle viersii śledstva, Baśko i Breski za ŭznaharodžańnie padpalili elektravoz u łakamatyŭnym depo «Arechava-Zujeva». Takoje zadańnie daŭ im nieviadomy, jaki raźmiaściŭ abjavu ab pracy ŭ telehram-kanale «Vpiski-Moskva» i pradstaviŭsia «Juryjem».
Pavieł Pamitun, opierupaŭnavažany FSB, jaki vystupaŭ u sudzie śviedkam, śćviardžaŭ, što «Juryj» nibyta akazaŭsia ŭkrainskim raźviedčykam, choć śpiecsłužba i nie vyśvietliła jaho asobu. Na pytańnie, jak jon pryjšoŭ da vysnovy, što «Juryj» słužyć u HUR, Pamitun adkazać nie zmoh.
Pavodle pakazańniaŭ, jakija Baśko i Breski davali na śledstvie, padpał elektravoza byŭ nie adzinym zadańniem «Juryja» — spačatku toj prapanavaŭ padpalić aŭtamabil, a paśla jašče adzin łakamatyŭ, ale ŭžo ŭ Maskvie. Pry hetym, jak vynikaje z začytanaha ŭ sudzie pratakołu dopytu Baśko, jany z Breskim padmanuli «Juryja»: vydali znojdzieny ŭ internecie rolik za videaspravazdaču ab padpale mašyny i atrymali hanarar u bitkoinach.
U sudzie abodva padsudnyja admovilisia ad hetych pakazańniaŭ. Baśko zajaviŭ, što padpisaŭ pratakoł nie čytajučy, bo padčas dopytu niejki mužčyna biŭ ich z Breskim i pahražaŭ nadzieć miašok na hałavu. Breski, kali ŭ sudzie začytali pratakoł jahonaha dopytu na śledstvie, skazaŭ: «Takoha nie było, jak tam pišuć! Takija pakazańni nie davaŭ».
Pavodle chadajnictva prakurora sud dapytaŭ śledčuju Kaciarynu Birudzienku, jakaja viała dopyt Baśko i Breskaha ŭ statusie padazravanych i raspačynała suprać ich kryminalnuju spravu. Joj pradstavili na ahlad pratakoł dopytu. U im abaronca Breskaha pisaŭ, «što jon nie spaŭ bolš za sutki i drenna siabie adčuvaŭ». Birudzienka zajaviła, što jon sam na samaj spravie «adčuvaŭ siabie dobra», ničoha nie kazaŭ pra toje, što pravioŭ u adździele ŭnutranych spraŭ «Basmanny» dvoje sutak biez snu i nie prasiŭ rabić pierapynkaŭ u dopycie ci nie pravodzić jaho ŭ načny čas. Ci razhladała jana zaŭvahu advakata, Birudzienka nibyta nie pamiataje.
Abodva padsudnyja prasili pierakvalifikavać spravu pa artykule ab paškodžańni majomaści, nastojvajučy, što ničoha nie viedali pra vierahodnuju suviaź «Juryja» z ukrainskaj raźviedkaj (toj nibyta pradstaviŭsia błohieram-prankieram) i nie źbiralisia vyvodzić z ładu transpartnuju infrastrukturu. Łakamatyŭ, jaki jany padpalili, byŭ starym i niaspraŭnym, a ŭ kabinie mašynista «ŭsio było razłamana», kazali Baśko i Breski ŭ sudzie.
Maładyja ludzi raskazali, što vykarystoŭvali tolki «trošački» zapalnaj sumiesi, a zaplečnik z pakinutym paśla padpału palivam pakinuli ŭ chostele. Jaho znajšła prybiralščyca i vyklikała palicyju — tady biełarusy sami adpravilisia zabirać zaplečnik u AUS «Basmanny», dzie i byli zatrymanyja.
Dvuch biełarusaŭ sudziać za dyviersiju na čyhuncy pad Maskvoj
Dvuch biełarusaŭ aryštavali ŭ Maskvie i abvinavacili ŭ padpale elektravoza
Zatrymanaha ŭ Lelčyckim rajonie «dyviersanta» buduć sudzić pa niečakanym artykule