Minabarony spyniła budoŭlu novaj vajskovaj čaści na miažy z Ukrainaj. Jaje pieršyja abjekty pavinny byli zdać u sakaviku
U studzieni 2024 hodu «Svaboda» paviedamlała, što pad Homielem budujecca novy vajskovy haradok. Ciapier vydańniu stała viadoma, što budoŭla spynienaja.
25.10.2024 / 09:43
Vajskovy haradok pad Homielem. Archiŭnaje fota
Plany zbudavać novy vajskovy haradok i palihon u Homielskaj vobłaści, niedaloka ad miažy z Ukrainaj, byli prapisanyja ŭ dziaržaŭnaj investycyjnaj prahramie i źjavilisia ŭpieršyniu ŭ minułym hodzie. Miesca budoŭli tady nie nazyvałasia, adnak, jak stała viadoma «Svabodzie» ŭ studzieni 2024 hodu, novy vajskovy abjekt pavinien byŭ źjavicca na miescy byłoha pijanerskaha lahieru «Čajka» niepadalok ad Homla. Pra heta paviedamlali miascovyja žychary, u redakcyi jość fotazdymki pašparta abjekta i miesca, dzie razharnułasia tady budoŭla.
U sakaviku 2024 hodu pieršaja čarha miełasia być skončanaja, takija terminy prapisvalisia ŭ pašparcie abjekta. Adnak ź nieviadomych pakul pryčyn budoŭla spyniłasia. Pa stanie na 23 kastryčnika na miescy byłoha lahiera nie źjaviłasia nijakich novych budynkaŭ.
Krynica «Svabody» dasłała ŭ redakcyju fatazdymki, zroblenyja na miescy novaha abjekta Minabarony Biełarusi. Na ich vidać, što aktyŭnaj dziejnaści tam nie viadziecca. Pakul što adzinaje, što zrabili budaŭniki, — heta źnieśli budynki byłoha pijanerskaha lahieru. Na abjekcie niama ni techniki, ni pracoŭnych, ni vartaŭnikoŭ.
«Visić, jak i raniej, pašpart abjekta z terminam zakančeńnia pieršaj čarhi budoŭli ŭ sakaviku. I ŭsio na hetym. Cicha, pusta. Moža, pieradumali budavać», — kaža surazmoŭca «Svabody», jaki byŭ na miescy, dzie maje źjavicca vajskovy abjekt.
«Svaboda» taksama atrymała spadarožnikavyja zdymki, jakija paćviardžajuć atrymanuju ad krynicy infarmacyju. Na zdymku sa spadarožnika za 10 kastryčnika 2024 hodu vidać, što na terytoryi byłoha lahiera nie źjaviłasia anijakich novych abjektaŭ. Adnak u paraŭnańni sa spadarožnikavym zdymkam, zroblenym 22 červienia 2023 hodu, možna zaŭvažyć vysiečki lesu ŭ vakolicach abjekta.
Miesca budoŭli vajskovaha abjekta la Homla, spadarožnikavy zdymak, kastryčnik 2024
Miesca budoŭli vajskovaha abjekta la Homla, spadarožnikavy zdymak, lipień 2023
Što za novy vajskovy haradok i ŭ jakim jon ciapier stanie
Pavodle ahučanaj u aficyjnych krynicach infarmacyi, planavałasia, što na budoŭlu novaha vajskovaha haradka ź biudžetu ŭ 2023 hodzie budzie vydzielena 500 tysiač rubloŭ, u 2024-m i 2025-m — 10 i 40 miljonaŭ adpaviedna. Prajekt mielisia raspačać u 2023-m i skončyć u 2027-m.
Z pašparta abjekta, raźmieščanaha na płocie byłoha lahiera, vynikaje, što zamoŭnik — Upraŭleńnie kapitalnaha budaŭnictva Ŭzbrojenych siłaŭ. Hieneralny padradčyk — Homielski domabudaŭničy kambinat. Terminy budoŭli pieršaj čarhi haradka: kastryčnik 2023 — sakavik 2024 hodu.
«Nia vyklučana, što vajskovy haradok budzie razbudavany nia tolki na terytoryi byłoha lahiera «Čajka», ale i zakinutych susiednich lahieraŭ — «Halaktyka», «Lasnaja palana», «Liciejščyk». Tam pakul nie viadziecca nijakaj dziejnaści, ale «čužych» adtul užo vyhnali. Naprykład, ź pijanerskaha lahiera «Halaktyka» vyhnali amataraŭ strajkbołu, jakija raniej tam stała zajmalisia», — śćviardžała raniej krynica «Svabody».
Pašpart budaŭničaha abjekta, zdymak zrobleny zimoj 2024 hodu. Taja samaja šylda visić i dahetul.
Pašpart budaŭničaha abjekta, zdymak zrobleny zimoj 2024 hodu
Tender na vysiečku lesu
Miž tym 18 kastryčnika 2024 hodu na elektronnaj placoŭcy dziaržaŭnych zakupak źjaviŭsia pošuk subpadradnaj arhanizacyi, jakaja mahła b vysiekčy drevy i kusty, vykarčavać pni, a taksama vyvieźci adkidy na abjekcie «Budoŭla vajskovaha haradka ŭ Homielskaj vobłaści, 3 čarha budaŭnictva, padrychtoŭčy peryjad».
Tender abviaściŭ hieneralny padradčyk — Homielski domabudaŭničy kambinat. Subpadradnaj arhanizacyi za vysiečku lesu i jahonuju pryborku abiacajuć kala 1,5 miljona rubloŭ. Zajaŭki prymajucca ad 18 da 24 kastryčnika. Zamovu treba vykanać u termin ad listapada 2024 hodu da sakavika 2025-ha.