Zabity lidar CHAMAS i hałoŭny arhanizatar uvarvańnia ŭ Izrail u 2023 hodzie
Jachja Sinvar, jaki niadaŭna staŭ kiraŭnikom palitbiuro paleścinskaha terarystyčnaha ruchu CHAMAS, a pierad hetym adkazvaŭ za vajskovy błok arhanizacyi, byŭ zabity izrailskaj armijaj u siektary Haza.
17.10.2024 / 17:19
Lidar paleścinskaha terarystyčnaha ruchu CHAMAS Jachja Sinvar. Fota: AP Photo/ Adel Hana
12-y telekanał Izraila zajaviŭ ab likvidacyi lidara paleścinskaha terarystyčnaha ruchu CHAMAS Jachja Sinvara, adkaznaha za ŭvarvańnie hrupoŭki ŭ Izrail 7-ha kastryčnika 2023 hoda, padčas jakoha byli zabity zvyš 1200 izrailskich hramadzian. Pa infarmacyi kanała, usie praviedzienyja testy DNK śviedčać ab śmierci Sinvara.
Kanał paviedamlaje, što izrailskaja armija i śpiecsłužby likvidavali Sinvara ŭ siektary Haza, zaminiravaŭšy budynak, u jakim Sinvar sustrakaŭsia ź inšymi členami hrupoŭki CHAMAS.
«Padčas apieracyj Armii abarony Izraila ŭ siektary Haza byli likvidavanyja try terarysty. Armija abarony Izraila i Izrailskaje ahienctva biaśpieki praviarajuć mahčymaść taho, što adnym z terarystaŭ byŭ Jachja Sinvar. Da hetaha času ŭsie praviedzienyja testy pakazvajuć, što Jachja Sinvar sapraŭdy byŭ likvidavany», — prakamientavali ŭ CACHAŁ.
Izrail abviaściŭ pra zabojstva premjer-ministra siektara Haza
U čym fienomien CHAMAS? U čym ich ideja i adkul jany ŭzialisia? Raskazvaje arabist