Kanada abvinavaciła Indyju ŭ arhanizacyi sačeńnia i zabojstvaŭ na kanadskaj terytoryi
Kanadskija ŚMI raskazali detali rezanansnaj spravy, jakaja pryviała da masavych vysyłak dypłamataŭ i istotnaha paharšeńnia adnosin pamiž dźviuma krainami.
15.10.2024 / 09:39
Premjer-ministr Kanady Džaścin Trudo i premjer-ministr Indyi Narenda Modzi. Fota: Evan Vucci / AP
«Indyjskija ŭłady majuć pramoje dačynieńnie da adsočvańnia, cisku, šantažu i zabojstvaŭ svaich palityčnych apanientaŭ na terytoryi Kanady, jakija majuć kanadskaje hramadzianstva. Heta nadzvyčajnaja situacyja i pramaja ataka na našych hramadzian», — zajaviŭ kamisar fiederalnaj palicyi Kanady Majk Dziuem, pieradaje ahienctva CBC.
Viedamstva infarmuje, što sabrała značnuju kolkaść dokazaŭ i śviedčańniaŭ «ab hłybokaj złačynnaj dziejnaści indyjskich uładaŭ na terytoryi Kanady», jakaja ažyćciaŭlałasia praź indyjskich dypłamataŭ i čynoŭnikaŭ u Kanadzie. Śćviardžajecca, što jany źbirali danyja pra indyjskich apazicyjanieraŭ, prymušali niekatorych zvyčajnych kanadskich hramadzian pracavać na indyjskija śpiecsłužby, praz pasiarednikaŭ umiešvalisia ŭ demakratyčnyja pracesy ŭ krainie, a taksama zamaŭlali ŭ arhanizavanych złačynnych hrupovak likvidacyju apanientaŭ indyjskich uładaŭ, jakija mieli kanadskaje hramadzianstva.
Tak, u minułym hodzie indyjskaj vyviedkaj byŭ zastreleny kanadski hramadzianin Chardyp Sinhch Nidžar, lidar sikchskaj abščyny Kanady i aktyvist baraćby za niezaležnaść Chalistana ad Indyi, adznačaje kanadskaja fiederalnaja palicyja. U Kanadzie pražyvaje kala 770 tysiač sikchaŭ, častka ź jakich vystupaje za stvareńnie asobnaj dziaržavy Chalistan na terytoryi indyjskaha štata Piendžab. Indyjskija ŭłady ličać aktyvistaŭ niezaležnaści Chalistana pahrozaj terytaryjalnaj cełasnaści i nacyjanalnaj biaśpiecy krainy.
Rezanansnuju spravu prakamientavaŭ i kanadski premjer-ministr Džaścin Trudo, jaki abvinavaciŭ urad Indyi ŭ arhanizacyi zabojstvaŭ i inšych złačynstvaŭ na terytoryi Kanady.
«My nikoli nie dapuścim situacyi, kali zamiežny ŭrad budzie pahražać našym hramadzianam i zabivać ich na našaj ziamli. Vidavočna, što ŭrad Indyi zrabiŭ istotnuju pamyłku, ličačy, što moža biespakarana ładzić u Kanadzie zabojstvy, vymahańni abo inšyja hvałtoŭnyja dziejańni. Heta absalutna nieprymalna», — kateharyčna zajaviŭ premjer-ministr Kanady Džaścin Trudo.
Na fonie hetych zajaŭ kanadski MZS pastanaviŭ vysłać z krainy šeść indyjskich dypłamataŭ, jakija, pa infarmacyi śledstva, majuć niepasrednaje dačynieńnie da vyšejzhadanych złačynstvaŭ. Ułady Indyi ŭ adkaz na heta taksama vysłali šeść kanadskich dypłamataŭ. Pierad hetym Kanada adklikała ź Indyi zvyš 40 svaich dypłamataŭ i spyniła dziejnaść svaich konsulstvaŭ u bujnych indyjskich haradach.
Indyjski ŭrad, u svaju čarhu, admaŭlaje kanadskija abvinavačvańni i nazyvaje ich «niedarečnymi i nieabhruntavanymi», adznačajučy, što pakidaje za saboj prava reahavać na «niedružalubnyja kroki» Kanady.
Kanada ŭviała sankcyi suprać Koli Łukašenki
Indyja stała druhim pa vieličyni paśla Kitaja pastaŭščykom krytyčna važnych technałohij u Rasiju
Maštaby kitajskaha špijanažu ašałamlajuć zachodnija ŭrady — The Wall Street Journal