Francuza asudzili ŭ Rasii da 3 hadoŭ kałonii. Kaliści jon davaŭ intervju «Našaj Nivie» i sustrakaŭsia z Vaskrasienskim
Zamaskvarecki sud Maskvy vynies prysud hramadzianinu Francyi Łaranu Vinaćje pa spravie ab zbory źviestak u halinie vajskova-techničnaj dziejnaści Rasii biez rehistracyi «zamiežnaha ahienta» (častka 3 artykuła 330.1 KK RF). Jaho asudzili da troch hadoŭ kałonii.
14.10.2024 / 18:24
Łaran Vinaćje ŭ redakcyi «Našaj Nivy»
U svajoj pramovie pierad vyniasieńniem prysudu Vinaćje, havoračy pa-rusku, paćvierdziŭ, što pryznaje vinu, i paprasiŭ sudździu ab pamiłavańni, piša Associated Press.
Francyja raniej zajaviła, što Vinaćje byŭ «advolna zatrymany» rasijskimi ŭładami, i zapatrabavała jaho nieadkładnaha vyzvaleńnia.
Vinaćje — supracoŭnik Centra humanitarnaha dyjałohu, šviejcarskaj arhanizacyi pa pasrednictvie ŭ kanfliktach. Jaho supracoŭniki pracujuć u roznych krainach śvietu i «rehularna sustrakajucca z šyrokim kołam aficyjnych asob i ekśpiertaŭ z metaj prasoŭvańnia namahańniaŭ pa praduchileńni, źmiakčeńni i ŭrehulavańni ŭzbrojenych kanfliktaŭ».
Darečy, pra kantakty z hetym francuzam bolš za try hady tamu, u pačatku lutaha 2021 hoda paviedamlaŭ Juryj Vaskrasienski. Pavodle pasta ŭ jahonym błohu, jon nibyta «pravioŭ pieramovy z daradcam centra humanitarnaha dyjałohu Łaranam Vinaćje». Pra što była taja razmova, padrabiaźniej nie paviedamlałasia.
U 2015 hodzie Łaran Vinaćje jak žurnalist naviedvaŭ redakcyju «Našaj Nivy» i navat daŭ nam ekskluziŭnaje intervju pra niezajezdžanyja miescy adpačynku ŭ Francyi, dzie možna spaznać sapraŭdnuju cuisine francaise.