Rasijanie raskazali, jak namučylisia na biełaruskaj miažy
«Pahladzieŭšy ŭžyvuju na toje, što adbyvałasia i ź inšymi ludźmi, skłałasia ŭražańnie poŭnaha chaosu i marazmu», — kaža siamja Hantaroŭ, jakija viartalisia z doŭhaha jeŭrapiejskaha padarožža.
12.10.2024 / 16:08
Vadzim Hantar viez z saboju dron. Heta vyklikała vializnyja niepryjemnaści. Fota z błoha aŭtara z pikabu.ru
Hetaja historyja z rasijskimi bajkierami adbyłasia ŭ žniŭni. Jaje padrabiaznaściami maładyja ludzi padzialilisia ŭ svaim błohu.
Jak raskazvaje Taćciana Hantar, jany z mužam Vadzimam viartalisia ŭ Maskvu paśla doŭhaha transieŭrapiejskaha padarožža — z Turcyi praz krainy Bałkan, Vienhryju, Aŭstryju, Hiermaniju i Polšču praz punkt propusku Tarespal 11 žniŭnia hetaha hoda. Na miažy byli vielizarnyja čerhi. Ale dziakujučy tamu, što jany jechali na matacykłach, im udałosia paźbiehnuć šmathadzinnaha čakańnia.
Polskuju miažu jany prajšli lohka — jak i ŭsie jeŭrapiejskija miežy da taho. A voś kali rasijanie dajechali da biełaruskaha punkta, ich čakała detalovaja pravierka. «Nikoli nas tak nie treśli», —
zaŭvažaje Taćciana i raskazvaje, što ich spačatku adpravili na renthien, potym razvarušyli ŭsie rečy, pytalisia, navošta im spatrebilisia zapasnyja łancuhi i zmazki i inšyja važnyja ŭ padarožžy na matacykle rečy.
«Karaciej, prydziralisia da ŭsiaho biez vyklučeńnia, heta było padobna da ździekaŭ. Chacieli dakapacca da hadžetaŭ, ale ŭrešcie znajšli toje, što šukali… Heta byŭ dron. Nam, kali ščyra, navat i dumki nie prychodziła, što vyvozić/uvozić ź Biełarusi ich kateharyčna nielha», — piša žančyna.
Jak raskazvaje žančyna, dron u ich zabrali i niekudy adnieśli. Im skazali čakać. Maładyja ludzi pračakali try hadziny. «Nadyšła noč, i stała žudasna choładna». Kali jaje spadarožnik pajšoŭ daviedacca, to jamu paraili ŭziać dron, viarnucca ŭ Polšču i tam jaho pakinuć. Tolki paśla hetaha mužčyna zmoh by ŭjechać u Biełaruś. Dziaŭčyna ŭ hety čas pavinna była čakać na trasie pa-za terytoryjaj punkta propusku. Ad hetaj prapanovy jany admovilisia.
U čakańni na biełaruskaj miažy. Fota z błoha aŭtara na pikabu.ru
Ale praz šeść hadzin čakańnia da pary padyšoŭ pamiežnik i prapanavaŭ inšaje rašeńnie. Adzin ź ich pavinien byŭ pakłaści dron u pakiet i prajści razam ź im da pastoŭ na ŭjezd u Polšču, dzie pradać ci addać dron. Rasijanin tak i zrabiŭ, addaŭšy dron ludziam na vyjeździe ź Biełarusi.
Ale na hetym sprava nie skončyłasia. Bajkieram daviałosia zapłacić štraf u pamiery 6000 rubloŭ (nie ŭdakładniajecca, rasijskich ci biełaruskich) za administracyjnaje pravaparušeńnie. Tolki paśla hetaha ich adpuścili.
Vadzim Hantar z žonkaj da pryhodaŭ na biełaruskaj miažy. Fota z błoha aŭtara na pikabu.ru
«U cełym, pahladzieŭšy ŭžyvuju na toje, što adbyvałasia i ź inšymi ludźmi, skłałasia ŭražańnie poŭnaha chaosu i marazmu. Ja razumieju, što ludzi, jakija pracujuć tam, usiaho tolki vykonvajuć svaje abaviazki, ažyćciaŭlajučy zahady zvyš, ale heta, spadarstva, užo biesčałaviečna», — piša dziaŭčyna.
Nahadajem, što zhadanaja zabarona na ŭvoz, zachoŭvańnie, abarot, ekspłuatacyju i vyrab bieśpiłotnikaŭ fizičnymi asobami ŭ Biełarusi dziejničaje z 28 sakavika hetaha hoda ŭ adpaviednaści z ukazam, padpisanym u vieraśni 2023 hoda.
Na biełaruska-polskaj miažy zapracavała novaja pasłuha, kab nie stajać u čarzie
Papularny brytanski videabłohier naviedaŭ Biełaruś i raskazaŭ, što jaho ździviła