Užo amal pałova rasijan zajaviła, što vajna pryniesła Rasii bolš škody, čym karyści
Praktyčna tracina rasijan zhodnyja viarnuć Ukrainie ŭsie akupavanyja padčas raspačataj u lutym 2022 hoda poŭnamaštabnaj vajny terytoryi, kab zaviaršyć bajavyja dziejańni, zaśviedčyła apytańnie, praviedzienaje «Levada-centram», piša The Moscow Times.
10.10.2024 / 22:29
Prypynak hramadskaha transpartu ŭ Ćviary. Fota z sacyjalnych sietak
Pavodle hetaha daśledavańnia, 31% respandentaŭ padtrymajuć rašeńnie Uładzimira Pucina, kali toj spynić vajnu na ŭmovach Kijeva — heta značyć z poŭnym vyvadam rasijskich vojskaŭ z usich zachoplenych ziamiel. «Adnaznačna» hatovyja padtrymać takoje raźvićcio padziej 14% rasijan, jašče 17% zajavili, što «chutčej» jaho padtrymajuć.
U pieršuju čarhu, jak vynikaje z apytańnia, hramadzianie Rasii hatovyja rasstacca z Zaparožskaj i Chiersonskaj abłaściami, jakija byli dałučanyja da Rasii vosieńniu 2022 hoda biez abłasnych centraŭ — Zaparožža, jakoje nie ŭdałosia zachapić, i Chiersona, jaki rasijskaja armija była vymušanaja pakinuć. Viartańnie hetych rehijonaŭ u skład Ukrainy padtrymajuć 21% respandentaŭ, ź jakich 7% ličać taki varyjant «pažadanym», a 14% — «dapuščalnym».
Viarnuć «DNR» i «ŁNR» dziela miru z Kijevam zhodnyja 16% apytanych «Levadaj». Adnak «pažadanym» taki scenar nazvali tolki 5%, a 11% — «dapuščalnym».
U cełym, «nieadkładnaje spynieńnie ahniu» ŭ jakaści ŭmovy mirnaha pahadnieńnia nazvali «pažadanym» abo «dapuščalnym» 78% rasijan — rekordnaja za dva hady dola. Dla paraŭnańnia: u mai 2024 hoda taki adkaz davali 70% respandentaŭ, a ŭ mai 2023 hoda — 64%.
Praktyčna pałova apytanych — 47% — zajavili, što vajna pryniesła Rasii «bolš škody, čym karyści», i ich dola ŭ paraŭnańni z majem 2023 hoda pavialičyłasia na 6 adsotkavych punktaŭ. «Karysnaj» vajnu pa-raniejšamu ličać 28% rasijan — na 10 pracentnych punktaŭ mienš, čym paŭtara hady tamu.
Vyniki apytańnia demanstrujuć, što ŭ rasijan pastupova nazapašvajecca stomlenaść ad vajny, skazaŭ «Ahientstvu» dyrektar «Levada-centra» Dzianis Vołkaŭ. Zrešty, dramatyčnych źmienaŭ u hramadskich nastrojach, pavodle jahonych słoŭ, nie adbyvajecca: 76% kažuć, što «padtrymlivajuć» dziejańni armii va Ukrainie, a 60% miarkujuć, što vajna prachodzić «paśpiachova», niahledziačy na sukupnyja straty, jakija pieravysili miljon čałaviek.
«Bolšaść moža žyć svaim pryvatnym žyćciom dalej, — tłumačyć Vołkaŭ. — Bolšaść choča miru, ale pakidaje hetaje rašeńnie na vodkup uładam».
Kolkaść niezadavolenych žyćciom rasijan skaraciłasia da histaryčnaha minimumu — «Levada-centr»
Siarod rasijan zafiksavali rost kolkaści prychilnikaŭ mirnych pieramovaŭ z Ukrainaj
Dla rasijan niama nikoha radniejšaha za biełarusaŭ — sacapytańnie