Čałaviek zdolny źmianić mnohaje, a što z ułasnym stareńniem?
Miedyki navučylisia lekavać mnohija chvaroby, ale pakul niazdolnyja spynić praces stareńnia. Ci heta štości niepaduładnaje čałavieku?
09.10.2024 / 21:44
Fota: pixabay.com
Novaje daśledavańnie pakazała, što čakanaja praciahłaść žyćcia ŭ krainach z vysokim uzroŭniem dachodaŭ bolš nie raście tak chutka, jak u XX stahodździ.
Na praciahu XX stahodździa miedycynskija dasiahnieńni i palapšeńnie sistem achovy zdaroŭja pryviali da značnaha pavieličeńnia praciahłaści žyćcia. U niekatorych z najbolš «doŭhažyvučych» krain siaredniaja praciahłaść žyćcia pry naradžeńni pavialičvałasia prykładna na try hady za dziesiacihodździe.
Pieršapačatkova heta było źviazana sa skaračeńniem dziciačaj śmiarotnaści, a zatym — sa źnižeńniem śmiarotnaści siarod ludziej siaredniaha i starejšaha ŭzrostu. Naprykład, u Biełarusi ŭ 1897 hodzie siaredniaja praciahłaść žyćcia składała 38 hadoŭ, a da 2000 hoda jana ŭzrasła da 69 hadoŭ.
Adnak, zhodna z novym daśledavańniem, vyniki jakoha apublikavanyja ŭ časopisie Nature Aging, rost hetych pakazčykaŭ u krainach z vysokim uzroŭniem dachodaŭ ciapier adbyvajecca pavolniej. Pavodle prahnozaŭ, za nastupnyja try dziesiacihodździ čakanaja praciahłaść žyćcia pavialičycca tolki na 2,5 hoda.
Jak paviedamlaje Live Science, navukoŭcy praanalizavali danyja za pieryjad z 1990 pa 2019 hod u dziesiaci krainach z samymi vysokimi pakazčykami daŭhalećcia: Aŭstralii, Francyi, Italii, Japonii, Paŭdniovaj Karei, Ispanii, Šviecyi, Šviejcaryi, Hankonhu i ZŠA. Na padstavie hetych danych praviedzieny retraśpiektyŭny analiz dla prahnazavańnia budučych tendencyj u praciahłaści žyćcia ŭ hetym stahodździ.
Vyniki pakazali, što paśla 2010 hoda palapšeńni ŭ hetaj śfiery značna zapavolilisia. Šancy ludziej sučasnych pakaleńniaŭ dažyć da 100 hadoŭ zastajucca nizkimi: dla žančyn — 5,1%, dla mužčyn — 1,8%. Najbolšaja vierahodnaść dasiahnuć stahodździa siarod dziaciej, narodžanych u 2019 hodzie, nazirajecca ŭ Hankonhu: dla dziaŭčynak — 12,8%, dla chłopčykaŭ — 4,4%.
Pa słovach daśledčykaŭ, najbolš imaviernaje tłumačeńnie zamarudžvańnia rostu praciahłaści žyćcia źviazana z tym, što čałaviectva nabližajecca da naturalnaj miažy žyćcia. Z pavieličeńniem kolkaści ludziej, jakija dažyvajuć da starečych hadoŭ, asnoŭnymi pryčynami śmiarotnaści stanoviacca faktary, źviazanyja z naturalnym stareńniem — pastupovym znošvańniem kletak i tkanak, jakoje niepaźbiežna z časam.
My navučylisia praduchilać dziciačuju śmiarotnaść ad adru, ale pakul nie možam spynić praces stareńnia, kali čałaviek dasiahaje 60, 70 hadoŭ i starej.
Džej Alšanski, viadučy aŭtar daśledavańnia i prafiesar epidemijałohii i bijastatystyki ŭ Ilinojskim univiersitecie ŭ Čykaha, adznačaje, što baraćba z asobnymi zachvorvańniami, źviazanymi sa stareńniem, jak, naprykład, chvaroba Alchiejmiera ci rak, — heta nakštałt naklejvańnia «časovaha płastyru vyžyvańnia». Heta tolki časovaje rašeńnie, jakoje adterminoŭvaje prablemu, ale nie likviduje asnoŭnuju pryčynu — stareńnie.
Navukoviec padkreślivaje, što dla dalejšaha pavieličeńnia daŭhalećcia nieabchodna nadać bolš uvahi daśledavańniam bijałohii stareńnia. Znachodžańnie sposabaŭ zapavolić abo spynić kletkavaje stareńnie moža dazvolić ludziam daŭžej zachoŭvać maładość i palepšyć ahulnuju jakaść žyćcia ŭ stałym uzroście.
«Ciapier treba zasiarodzicca na vytvorčaści samaha kaštoŭnaha resursu na Ziamli — zdarovaha žyćcia», — adznačyŭ vučony ŭ intervju vydańniu.
Vučonyja adkryli amaładžalny efiekt raspaŭsiudžanaha preparatu ad dyjabietu
Žyćcio pobač z parkami zapavolvaje bijałahičnaje stareńnie
Navukoŭcy vyjavili, što ŭdziačnaść dapamahaje žyć daŭžej
Ci adpaviadaje vaša fizičnaja forma vašym hadam? A nu praviercie z dapamohaj hetych testaŭ
Źmiena zvyčak zapavolvaje stareńnie