Biełaruskaja błohierka pakazała, jaki žach moža adbyvacca z vusnami, kali chočaš ich pavialičyć — a potym pamienšyć
Biełaruskaja błohierka Alena Kardon-Miełavackaja prademanstravała svaje niaŭdałyja ekśpierymienty z vusnami. Spačatku jana sprabavała ich pavialičyć, ale atrymałasia nieidealna. Kab vypravić vynik, błohierka vyrašyła vyvieści filer. Ale efiekt atrymaŭsia jašče bolš žudasny.
27.09.2024 / 13:24
Tut i dalej skrynšoty videa ŭ tyktoku Aleny Kardon-Miełavackaj
U Aleny Kardon-Miełavackaj 140 tysiač padpisčykaŭ u instahramie i 30 tysiač padpisčykaŭ u tyktoku. Raniej jana pazicyjanavała siabie jak seks-koŭč, ciapier ža navučaje inšych ekśpiertaŭ, jak vieści sacyjalnyja sietki.
Błohierka vyrašyła pavialičyć vusny z dapamohaj ukołaŭ, ale vynik jaje rasčaravaŭ. Filer raźmierkavaŭsia niapravilna, i ŭ vusnach utvaryłasia dva šaryki, asabliva prykmietnyja pry naniasieńni makijažu.
Niepryjemny efiekt — tamu błohierka znoŭ źviarnułasia da śpiecyjalistaŭ, kab vyvieli filery. Jana žartavała, što budzie «vydalać vusny».
U takich vypadkach zvyčajna ŭ patrebnuju vobłaść uvodzicca śpiecyjalny preparat — fiermient hijałuranidaza, jaki rasščaplaje hijałuronavuju kisłatu. Tearetyčna vusny pavinny pryjści ŭ normu litaralna praz paru hadzin. Ale ad pabočnych efiektaŭ nichto nie zastrachavany.
— Ja viedała, što hijałuranidaza — davoli alerhičny preparat, — raspaviała błohierka ŭ tyktoku. — A ja — alerhik. U mianie alerhija na miod, na pienicylin i na roznyja vidy ŭkusaŭ. Ja viedała, što maje vusny raźniasie. Ale što da takoha pamieru, ja, kaniečnie, nie padazravała…
Alena pryznałasia, što ŭvodzić fiermient hijałuranidaza davoli baluča, ale heta jaje nie spyniła. Jana stała čakać, kali ž filer rastvarycca. Z kožnaj hadzinaj vusny stanavilisia tolki bolš. Praź piać hadzin jany raspuchli tak, što błohiercy stała ciažka razmaŭlać. A praz šeść jana pajechała ŭ apteku pa antyhistaminnaje.
Žančyna nie hublała aptymizmu i žartavała ź situacyi:
— Nie mahu tolki zrazumieć, čamu ja jedu na «Fardzie», a nie na «Leksusie».
Paśla pryjomu lekaŭ ad alerhii aciok usio ž staŭ pastupova sychodzić. Viečaram nastupnaha dnia filer jašče nie rastvaryŭsia, ale na vusnach pačali źjaŭlacca marščynki i załomy — a heta značyć, što preparat narešcie pačaŭ pracavać jak treba.
— Acioku Kvinkie nie było, choć ja vielmi alerhieny čałaviek. Ja nie chvalavałasia. Mnie było ŭsio roŭna. Pamru dyk pamru. Moža, u božańki na mianie inšyja płany.
U kamientaryjach u tyktoku spytali, ci płanuje Alena znoŭ pasprabavać pavialičyć vusny. «Tak, ale dumaju, nie raniej, čym praź miesiac», — adkazała błohierka.
Błohierka-jabaćka vyjšła zamuž za prapahandysta z «Minskaj chvali»