Aktyvist fondu Tałaja pachvaliŭsia, što finansava damahaje rasijskaj armii i robić uniosak u «ahulnuju pieramohu»
Fond Tałaja lubić padkreślivać, što źbiraje dapamohu dla mirnaha nasielnictva, jakoje pakutuje praz vajnu. Ale adzin z hałoŭnych aktyvistaŭ vyrašyŭ pachvalicca tym, što sabranyja hrošy pieradajuć rasijskim vajskoŭcam.
25.09.2024 / 17:07
Jaŭhien Nazarevič. Tut i dalej fota ź jaho instahramu
Biełaruski spartsmien-hiravik Jaŭhien Nazarevič — adzin z paplečnikaŭ Alaksieja Tałaja i aktyvist jahonaha fondu. Pieryjadyčna jon jeździć na akupavanyja Rasijaj terytoryi Ukrainy, a ŭ volny čas udzielničaje ŭ prapahandysckich mierapryjemstvach u biełaruskich škołach i kaledžach.
Jaŭhien jeździć dastaŭlać «humanitarnuju dapamohu» ź Biełarusi va akupavanuju častku Ukrainy, a taksama rasijskija harady, jakija znachodziacca blizka da zony bajavych dziejańniaŭ. Zvyčajna ŭ telehram-kanale «Biełaruś z Danbasam», jaki, vierahodna, taksama viadzie Jaŭhien, pišuć, što na achviaravanyja biełarusami hrošy nabyli soki dla dziaciej ci ladoŭniu ŭ balnicu.
Siońnia spartsmien-aktyvist pachvaliŭsia ŭ instahramie dypłomam ad kamandzira vajskovaj čaści 04185, pałkoŭnika Haradzieckaha. Voś za što dziakujuć biełarusu rasijskija vajskoŭcy: «Kamandavańnie i asabovy skład 34-j asobnaj motastrałkovaj bryhady (hornaj) vykazvaje vam udziačnaść i ščyruju padziaku za akazanuju maralnuju padtrymku i materyjalnuju dapamohu, pryznačanuju dla vykanańnia pastaŭlenych zadač u zonie śpiecyjalnaj vajennaj apieracyi! Vaš układ u našu ahulnuju pieramohu vielmi važny! Naša siła ŭ adzinstvie!»
Videa z dypłomam Jaŭhien padpisaŭ tak: «Bieražy vas Haspodź, braty».
Połackaja škoła vyrašyła sabrać humanitarku dla Kurska
Jak Śviata-Jelisaviecinski žanočy manastyr pieratvaryŭsia ŭ sapraŭdny biznes-chołdynh
Alaksiej Tałaj zdymajecca ŭ rasijskim filmie pra vajnu