«Mučymsia». Dalnabojščyk raskazaŭ, što ŭ čarzie na miažu pad Brestam stajać tydniami
Kiroŭca z Uźbiekistana raskazaŭ vydańniu «Pieršy», što pryjechaŭ u čarhu ŭ minuły čaćvier, 12 vieraśnia, i staŭ niedaloka ad zapraŭki «Łukojł» prykładna za 25 kiłamietraŭ ad miažy. Za 4 dni, kaža, prajechaŭ kiłamietraŭ ź piać.
16.09.2024 / 23:21
«Čym zajmajemsia ŭ čarzie? Mučymsia. Hladzim načami, nie možam spać. Nazirajem zaŭsiody. Kab pradukty padvozili, ja nie bačyŭ. U Litvie, Łatvii bačyŭ, tam furhončyk pradukty vozić. A tut nie bačyŭ. Kali takoje prasoŭvańnie budzie, to stajać jašče tydzień, bolš navat moža być», — raskazaŭ kiroŭca.
Vadu ŭ haračyja dni kiroŭcam u čarzie pryvoziać u supravadžeńni supracoŭnikaŭ DAI bresckija kamunalniki. Vadavoz prajazdžaje i spyniajecca kala achvotnych nabrać vady. Što da charčavańnia, to, jak praviła, zapasajucca praduktami, kali prajazdžajuć mima kramaŭ. Abo prosiać padvozić miascovych znajomych, ci kalehaŭ, jakija prajazdžajuć.
Pavodle infarmacyi Pamiežnaha kamiteta, pa stanie na 16 vieraśnia 2024 hoda ŭ čarzie fur u bok prapusknoha punkta «Kazłovičy» znachodzicca 850 hruzavikoŭ. Kali pamnožyć hetuju kolkaść na 17 (siaredniaja daŭžynia fury), heta praktyčna 15 km. Plus pa paru mietraŭ dystancyi i razryvy na skryžavańniach, voś i budzie zvyš 20 kiłamietraŭ, a heta značyć, što chvost čarhi znachodzicca na M1.
Čarha pad Brestam raściahnułasia da M1
Heta što tyčycca polskaha kirunku. Pavodle źviestak pamiežnaha viedamstva, na litoŭskim kirunku fur jašče bolš. Ranicaj 16 vieraśnia ŭ čarzie stajała 1140 hruzavikoŭ.
Nazirajecca rost kolkaści aŭtobusaŭ na polskaj miažy
Na polska-biełaruskaj miažy pamior dalnabojščyk
Biełaruskija dalnabojščyki skardziacca na skaračeńnie zarpłat u Jeŭropie