Vučonyja raskazvajuć, jak prostaja źmiena ŭ racyjonie charčavańnia moža palepšyć stan skury i imunitet
Dla hetaha vam spatrebicca morkva.
15.09.2024 / 10:58
Fota: Hana Mara / pexels.com
Viadoma, što karacinoidy — pryrodnyja arhaničnyja pihmienty, jakija nadajuć jarki koler šmat jakoj sadavinie i harodninie — dapamahajuć abaranić kletki ad paškodžańniaŭ i źnizić ryzyku raźvićcia sardečna-sasudzistych zachvorvańniaŭ i niekatoryja vidy raku. Vysoki ŭzrovień karacinoidaŭ u skury źviazany z palapšeńniem jaje stanu i abaronaj ad škodnaha ŭździejańnia ŭltrafijaletavych promniaŭ.
Jak piša SciTechDaily, raniejšyja daśledavańni pakazali, što ŭzrovień karacinoidaŭ u skury možna pavialičyć, spažyvajučy ŭ try razy bolš za rekamiendavanuju porcyju sadaviny i harodniny kožny dzień na praciahu troch tydniaŭ.
Novaje daśledavańnie vučonych Stendfardskaha ŭniviersiteta prademanstravała, što nievialikaja i prostaja źmiena ŭ racyjonie charčavańnia — uklučeńnie maładoj morkvy ŭ jakaści pierakusu try razy na tydzień — prykmietna pavyšaje ŭzrovień karacinoidaŭ u skury maładych ludziej. Pakazčyk vyras jašče bolš, kali morkvu złučyli z polivitaminami, jakija ŭklučajuć beta-karacin.
Dla svajho daśledavańnia vučonyja vypadkovym čynam raźmierkavali 60 maładych ludziej na čatyry hrupy.
Na praciahu čatyroch tydniaŭ pieršaja hrupa pierakusvała łustačkami jabłykaŭ hatunku Hreni Śmit (kantrolnaja hrupa), druhaja — maładoj morkvaj (roŭna 100 h na porcyju). Treciaja hrupa prymała polivitaminny dadatak, jaki ŭtrymlivaje beta-karacin, a čaćviortuju prainstruktavali jeści maładuju morkvu i adnačasova ŭžyvać vitaminny kompleks z beta-karacinam.
Pierad pačatkam i pa zaviaršeńni ekśpierymientu navukoŭcy acanili ŭzrovień karacinoidaŭ u skury kožnaha dobraachvotnika.
Vyniki pakazali, što ŭ tych, chto jeŭ tolki maładuju morkvu, hety pakazčyk pavialičyŭsia na 10,8%. A voś u hrupie, dzie morkva spałučałasia z pryjomam polivitaminaŭ, jakija ŭtrymlivali beta-karacin, uzrovień karacinoidaŭ byŭ udvaja bolšym — 21,6%. U ŭdzielnikaŭ dvuch astatnich hrup nijakich źmien u skury nie było zaŭvažna.
U dalejšym vučonyja płanujuć daśledavać miechanizm, jaki pryvodzić da takich vynikaŭ, a taksama vyvučyć upłyŭ na kolkaść karacinoidaŭ u skury inšych praduktaŭ, bahatych imi.
Jak adnavić skuru paśla leta? Asnoŭnyja praviły
Cybula nie tolki ježa, ale i dobry srodak dla vyrašeńnia prablem sa skuraj
Nazvanyja try pradukty, abaviazkovyja dla štodzionnaha ŭžyvańnia
Zdarovy abied: što dać dziciaci z saboj u škołu