Šrajbman raskazaŭ, čaho čakać ad vybaraŭ 2025 hoda, što moža zrabić apazicyja i na što pajści Łukašenka
Ekśpiert Bierlinskaha centra Karnehi Arciom Šrajbman vykazaŭ svajo bačańnie padrychtoŭki i praviadzieńnia vybarčaj kampanii 2025 hoda ŭ Biełarusi.
27.08.2024 / 07:00
Arciom Šrajbman. Fota: «Naša Niva»
Šrajbman ličyć, što źmieny ŭ atačeńni Łukašenki z «bolš spakojnych, pradkazalnych viałych biurakrataŭ na bolš dynamičnych i maładych (chacia i nie ŭsiudy)» radykalna nie źmieniać scenaryj kampanii 25-ha hoda.
«My ŭžo bačyli dźvie elektaralnyja kampanii — kanstytucyjny refierendum 2022 hoda i parłamienckija i miascovyja vybary pačatku hetaha hoda. Heta scenaryj Savieckaha Sajuza ci Turkmienistana abo Kitaja. Heta całkam dekaratyŭnyja vybary. Navat Rasija jašče nie pryjšła i blizka ŭ hety punkt. (…)
Nie dapuskajecca navat umieranaja alternatyva na stadyi zboru podpisaŭ, kab zarehistravacca. (…) Poŭnaja začystka palityčnaha pola. (…) Biezumoŭna, buduć niejkija partyi-spojlery, jakija vystaviać kandydataŭ. Ale ŭsio budzie śpiektaklem».
Šrajbman zaŭvažaje, što heta ŭžo asabliva i nie chavaje prapahanda: «prapahanda havoryć, što ŭsie tyja minułyja ekśpierymienty ź niejkim pluralizmam, ź niejkimi roznymi kandydatami ŭ biuleteniach my pakidajem tam».
Što moža zrabić apazicyja
Šrajbman ličyć, što ŭ budučaj vybarčaj kampanii niama voknaŭ dla palityzacyi, ale jany jość dla prapahandysckaj miedyjakampanii, što apazicyja i budzie imknucca vykarystać.
Na dumku Šrajbmana, dla biełaruskaj apazicyi bolš važna aryjentavać kampaniju pa delehitymizacyi vybaraŭ za miažu, na zachodnich partnioraŭ. Dla jaje krajnie važna mieć pryznańnie mižnarodnych partnioraŭ, bo staić pytańnie «što ź siabie ŭjaŭlaje alternatyŭnaje lidarstva Cichanoŭskaj pa zakančeńni piaci hadoŭ».
Pa słovach analityka, hetaje pytańnie zadajuć nie tolki krytyki demakratyčnaha łahieru, ale i niekatoryja mižnarodnyja partniory, tolki nie publična. «Pytajucca, jak doŭha moža praciahvacca situacyja isnavańnia paralelnaha ŭradu, ci jość u apazicyi niejkaja stratehija jaje źmieny».
«Tamu hetyja prezidenckija vybary — rubikon dla ŭsich, kab adkazać na hetyja pytańni i nie dać mižnarodnym partnioram, jak adnojčy skazaŭ Łukašenka, pieraharnuć staronku», — havoryć Šrajbman.
Čaho ad vybaraŭ čakaje Łukašenka
Šrajbman zaŭvažaje, što pakul nieviadoma, jakija prapahandysckija zadačy na budučyja vybary buduć u Łukašenki, bo da ich jašče dastatkova šmat času, za jaki mohuć adbycca niejkija źmieny:
«Łukašenka moža zachvareć, vyrašyć, što jon słaby (u pieršuju čarhu z-za zdaroŭja) i treba pieradavać niekamu ŭładu. Kanstrukcyja dla tranzitu ŭ krainie jość. Z 5% vierahodnaści my možam taki scenaryj pakinuć».
Inšy varyjant zaklučajecca ŭ tym, što vybarami 2025 hoda Łukašenka pasprabuje pierazahruzić svaje adnosiny z Zachadam. Na pohlad Šrajbmana, prykmietami takich namieraŭ moža być vyzvaleńnie palitźniavolenych.
Łukašenka, ličyć analityk, moža pasprabavać dabicca chacia b častkovaj admieny sankcyj, viartańnia pasłoŭ niejkich krain.
Ale najbolš vierahodnym Šrajbman ličyć scenaryj «poŭnaha Turkmienistana biez navat sprob hulać u pierazahruzku».
Šrajbman prapanavaŭ apazicyi, što možna rabić ź biuleteniami na vybarach-2025
Jakimi buduć vybary 2025 hoda? Razvažajuć Viačorka, Łatuška i Šrajbman