Канчатковае пахаванне музычнага фэсту Lidbeer. Хэдлайнерам стане Вольга Бузава
Сёлета ў Лідзе не будзе знакамітага музычнага фестывалю Lidbeer. Замест яго ў Дзень горада правядуць «ХарчФэст». Галоўнай зоркай стане расійская спявачка, чые фота «натхняюць салдат ваяваць».
13.08.2024 / 09:54
Вольга Бузава. Фота з яе інстаграма
Аб тым, што ўлады горада вырашылі адмовіцца ад паспяховага музычнага праекта «Лідскага піва», стала вядома нядаўна. Нагадаем: першы фестываль Lidbeer прайшоў у 2015 годзе. Традыцыйна яго праводзілі ў Дзень горада. Хэдлайнерамі ў розныя гады станавіліся «Бі-2», «Чайф», «Акіян Эльзы» і іншыя гурты. Арганізатары паведамлялі, што колькасць гасцей свята дасягала 130 тысяч чалавек.
Складаныя часы для мерапрыемства пачаліся разам з пандэміяй COVID19 — былі тры гады адмен і пераносаў. Летась Lidbeer усё ж адбыўся. Але, як кажуць, гэта было ўжо зусім не тое: замест папулярных гуртоў арганізатары далі сцэну розным кавер-бэндам і праўладным артыстам кшталту Skynet. Не абышлося без затрыманняў.
Дарэчы, харчфэст «PROСмак» год таму таксама праводзілі ў Дзень горада. Цікава пра гэта не змагла расказаць нават раёнка. «Лідская газета» абмежавалася літаральна некалькімі сказамі: «Прадпрыемствы Лідчыны прадэманстравалі сваю найлепшую прадукцыю, а таксама арганізавалі інтэрактыўныя пляцоўкі як для дарослых, так і для дзяцей».
Фотарэпартаж таксама наўрад ці каго здзівіць: на здымках тэматычныя стэнды розных прадпрыемстваў, не надта арыгінальныя фотазоны з бульбай, морквай (і чамусьці ананасам), а таксама дзеці з чырвона-зялёнымі сцягамі на шчочках. Карацей, абсалютна тыповы набор для Дня горада. Можа, людзям і не надта цікава, затое ідэолагі спакойныя, што сюрпрызаў не будзе.
І вось цяпер улады горада вырашылі аб’яднаць гэтыя два мерапрыемствы і зрабіць «ХарчФэст». Галоўным падарункам на Дзень горада стане выступленне расійскай спявачкі Вольгі Бузавай.
«Адкладай усе справы і танчы пад Бузаву», — заклікае тэлеграм-канал «Лідскі (не)афіцыйна».
Пазіцыя спявачкі наконт вайны была максімальна зразумелай адразу — пачынаючы ад запісу здзеклівай прапагандысцкай песні, у якой яна высмейвала суайчыннікаў, што з'ехалі з Расіі ад мабілізацыі: «Ты взял и променял Бузову на Грузию».
У расійскіх СМІ з'яўлялася інфармацыя пра тое, што Бузава купляе не толькі гуманітарную дапамогу для расійскіх вайскоўцаў, а яшчэ і набывае для іх рыштунак.
Сёлета Вольга трапіла ў цэнтр скандалу праз свой вельмі сэксуальны ўбор на Дні горада ва Уфе. Артыстку абвінавацілі ў тым, што яна дазваляе сабе такія нясціплыя вобразы, калі людзі паміраюць на вайне.
Але за Бузаву ўступіўся палкоўнік запасу Цэнтральнага апарата Мінабароны Расіі Уладзімір Трухан. Ён заявіў, што партрэты артысткі папулярныя сярод вайскоўцаў і нават матывуюць іх ваяваць:
«Я зараз у сёмы раз паеду на СВА, там наогул ніхто гэтымі рэчамі не замарочваецца і ў якім-небудзь бліндажы будзе партрэт менавіта гэтай Вольгі Бузавай, таму што ў войску гэта модна, калі хто не ў курсе, усякія мужчынскія часопісы, партрэты напаўаголеных дам. Яны нармальна за гэта ваююць».
На фестывалі Lidbeer у Лідзе затрымалі двух мужчын — яны выкрыкнулі «Жыве Беларусь»
«Пока ты без дел». Рэктарка Гродзенскага ўніверсітэта ўзарвала тыкток абсцэннай лексікай
Бузава паслізнулася і звалілася на «Мінск-арэне». Ані Эйсмант, ані Прыгожын не падхапілі яе